الموضوع: تجربتى المريرة مع لوجان بعد 40,000كم

المشاركة الأصلية كتبت بواسطة amrremah

انهاردة كانت علامة ال40,000كم فى عربيتى اللوجان 2011
دا كان انطباعى العام على العربية فى خلال السنتين .. مع العلم انى كنت راكب فيرنا قبلها

الميزات:
1. العربية اقتصادية جدا من حيث السعر و استهلاك البنزين
2. واسعة من الداخل
3. التوكيل طبعا مش زى الكورى لكن أنا شخصيا محصلش معايا الماّسى اللى بسمعها فى توكيلات تانية, بالنسبة لى التوكيل كويس
4. قطع الغيار مقبولة
5. العربية عالية و دا مناسب جدا للمطبات اللى فى بلدنا

العيوب:
1. سحب ضااااايعععع .. و ان كانت اتحسنت كتير بعد ال 20,000 لكن ما زال سحبها ضعيف جدا خصوصا لو فى ناس راكبين معايا فى العربية, و لو فى مطلع بتبقى فضيحة بيبقى الموتور بيصرخ و أنا جايب أخر دواسة البنزين و العداد مش بيتحرك
2. صوت الموتور عالى جدا جدا
3. العربية أبعد ما تكون عن الثبات .. أنا كنت فى طرق السفر بمشى على 120, 130 لو عربية عدت من جنبى بسرعة ممكن الهوا بتاعها بس يقلبلى عربيتى, و لو طريق الهوا فيه جامد ممكن جدا تفقد السيطرة على العربية .. و طبعا اللى مساعد على ده ان العربية عالية و دا بيخليها مش ثابتة خالص
4. التكيف فى حر الصيف ولا كأنه شغال, فى الظل و بالليل بيكون كويس جدا طبعا لكن فى الحر ولا كأنه موجود
5. من يوم ما جبت العربية و أنا بعانى من رعشة الفتيس و انا ماشى
6. الدريكسيون تقيل جدا
7. انا فوجئت بانى بحتاج أغير تيل فرامل كل 15,000 كم, مع العلم ان سواقتى هادية, لكن بعد 10,000 كم بسمع تصفير فى الفرامل و بغير التيل بعد 15,000كم, و فى التوكيل !! قليل جدا ان عربية تحتاج تيل فرامل جديد كل 15,000كم
8. بعيدا عن العيوب البسيطة و الغير مؤثرة زى (أماكن الزراير, الهوا اللى بيخرج من الهواية اللى عند رجل السواق حتى و التكيف مقفول, الخ)

بالنسبالى المعادلة الأوقع انى بفكر ابيع العربية و أفكر فى حاجة تانية أحسن .. و أعتقد لو الزمن رجع بيا مكنتش فكرت أجيب لوجان أبدا
دا كان رأيي المحايد فى العربية, البعض هيختلف معايا و البعض هيتفق معايا, لكن انا بأيد الموضوعات اللى بتقول ان العربية دى "مقلب"

كل كلمة كتبتها صح 100% وممكن نضيف على المميزات ان تنك البنزين بتاعها كبير وده شىء مهم في ظل ازمات البنزين اللي بتيجي من وقت للتاني , لكني اختلف معاك في موضوع قطع الغيار مقبولة لأنها كتير بتبقى مش موجودة واسعارها غالية جدا مقارنة بالكوري ويمكن الياباني في حاجات كتير , بالنسبة للسحب والثبات والتكييف وصوت الموتور اعوذ بالله
(هوه ده ملخص اللوجان مميزات وعيوب)

متفق معك في المميزات والعيوب وعن تجربتي حتي الان 10000 كيلو
1- الكاوتش زبالة بكل المقاييس ولا اعتقد انه هايعمر معايا حتي 30000 وبندم اني مبعتهوش اول ماجبت العربية وجبت كاوتش محترم
عيوبه ضعيف مع الفرامل ونقشته بتلم زلطوبيتخرم بسهولة
2- تيل الفرامل حضرتك نفس المشكلة معايا بدأ يصفر علي 8000 وفي صيانة ال10000 كيلو في توكيل العبور
مردتيش قالهم عشان اعرف هما فعلاً بيشيكوا علي العربية ولا آي كلام والسلام وطبعاً ولا قالوا حاجة !!!

سؤال هنا هل لرداءة الكاوتش دور في مشكلة تيل الفرامل ؟؟؟

انا شايف ان العيب الوحيد اللي فيها هوا صوت الموتور

متفق معاك تماما وزود على العيوب:
1- العيب الاول و الاخطر و الأزبل الصاج الضعيف جدا و السقف الفبر (متأكد 100%)
2- الكاوتش الزحافى اللى بيسرح مع الفرامل.

اهم ميزه لم تذكر وهى فى المانيوال انها اقتصاديه فى البنزين متوسط من غير تكيف 7.5 جوه البلد

التيل مش عارف ايه الحكايه مع كذا زميل مع انى مغير الفبريكه على 45 الف وكان فيه والقانى معدى العشرة الاف لغاية دلوقتى تمام

السحب بالنسبالى مرضى جدا خصوصا الثالث والرابع وعموما الاول والثنى فيها ممكن تنقل على سرعة 30 للثالث من غير العربيه ما ترجرج وده بيخلينى مستعملشى الاول ابدا غير من الثبات بس

صوت الموتور ووش الاسفلت اتعالجوا عندى بنسبة 50 فى المائه باللباد الحرارى الثقيل مع الارضيه الجلد وتغيير الكاوتش لنوع سيلنت زى اليوكوهاما الدنيا اختلفت كثير

موضوع الصاج بقى عادى فى كل الجديد اوبترا وافيو وتيدا كله صاج ورق

فعلا رعشة الفتيس ديه المفروض منشوفهاش فى عربيه موديل جديد لانها كانت عاديه فى القديم وتطورت العربيات فيها وفعلا بتضايقنى
الاتزان مرضى بس لغاية 140 وبتتاثر فعلا بالهواء لكن مش لدرجة التعويم وضغط الهواء بيفرق جدا فى العربيه دى وكل ده من غير الاستبليزر

موضوع الدركسيون ثقيل محستش بيه ابدا

التكييف اتحسن معايه جدا مع ضبط الفريون وستائر الكبس ومراعاة انى مخليهاش ضربه فى الشمس جامد عشان العربيه متسخنشى يعنى احاول دايما اركنها فى ظله او جراج ان امكن بتفرق جدا مع بداية التشغيل حتى لو فى عز الحر
واخيرا لازم نقول كلمة حق ان الكورى والصينى ماثر فينا بنعوميته فى خفة الدركسيون والتكييف الكورى الثلاجه وعدم وجود هزة الفتيس وقطع غيار ببلاش لكن اعتقد انه اهم نقط لصاح اللوجان الاعتماديه وقوة الشاسيه والتوكيل والوسع
ودول اللى خلونى اخترها