الموضوع: غير tie rod رينو ميجان بنفسك

السلام عليكم

ال tie rod أو البار اللى بيبقى راكب فى الديسك الأمامى للسيارة وهو اللى بينقل الحركة من الاسكترا للعجل ويخلى العجلة تلف يمين أو شمال

هو عمره طويل جدا بس الجلد بتاعه بيبوظ أحيانا وبيتغير وقتها ( معرفش إذا كان ينفع يتغير الجزء الجلد لوحده ولا لأ )

يقال كمان أن ليه علاقة بضبط الزوايا ... زى ما هنشوف دلوقت إنك ممكن لو ربطته أو لفيته لفة زيادة لجوا هيشد الديسك لجوا شوية كافية إنها تخلى العربية تحدف معاك لو سبت الدركسيون غير التأثير بقى على باقى أجزاء العفشة والكاوتش

عشان تغيره لازم يكون معاك مفتاح 22 ومفتاح 16
ودى أهم ملحوظة عايزكم تاخدوا بالكم منها :
فلنفرض إنك هتغير البار اليمين .... هتلف الدركسيون أقصى الشمال وبعدين ترفع العربية
فلنفرض إنك هتغير البار الشمال .... هتلف الدركسيون أٌصى اليمين وبعدين ترفع العربية
أنا هنا مغيرتوش بس فيكته عشان أوريكم أزاى تغيروه بنفسكم
اشتغلت على البار الشمال
لفيت الدركسيون اٌقصى اليمين
Uploaded with ImageShack.us
خلعت العجلة
وآدى صورة البار
مشاور بالسهم الأحمر على الصامولة اللى هتتفك بمفتاح 16
وباللون الأصفر على الصامولة اللى هتتفك بالمفتاح ال 22
Uploaded with ImageShack.us

هنبدأ بفك الصامولة ال 22 الأول
الصامولة دى بتتفك مع أتجاه عقارب الساعة Uploaded with ImageShack.us
بس ناخد بالنا لحاجة هنا قوى يادوب ما تسمع صوت طقطقة اللف متلفش تانى يعنى يادوب ربع لفة
وهنعرف ليه

وبعدين هنفك الصامولة ال 16 عكس أتجاه عقارب الساعة ونطلعها برا
Uploaded with ImageShack.us
هندق على القلاووظ بتاع البار بالمفتاح اللى معانا بشويش كدا هنلاقيه نزل وتحرر
Uploaded with ImageShack.us
هنلف البار عكس أتجاه عقارب الساعة هيطلع معانا بالشكل دا ومشاور فى الصورة على مكان الجلد اللى لما بيتآكل بيتغير البار
Uploaded with ImageShack.us

ملحوظة هامة ::

القصة وما فيها إن البار دا بيتربط على مسمار قلاووظ مفتوح يعنى بطول ما بتلف هيلف معاك

فهما عملوا ركبوا قبله صامولة 22 عشان تزنقه عند نقطة معينة ميقدرش يلف بعدها

النقطة دى اللى عندها الزوايا بتبقى مضبوطة تمام ( يعنى باختصار الصامولة دى ممكن تربطها شوية عشان تخلى البار يدخل معاك لجوا عشان تشد العجلة لجوا لو كانت العربية بتحدف شمال وممكن تطلعها لبرا سنة عشان تخلى البار يبعد العجلة سنة عشان تضبط معاك الحدفة اليمين ... طبعا العدلة اللى بتحصل دى تقريبا بيعملها بتاع الزوايا بس أنا مش فاهم الموضوع بيتم أزاى عنده لأ نه بيستعمل كمبيوتر .... لكن العدلة دى هدفها إنها تخلى الكاوتشات مستقيمة والدركسيون فى وضع الحياد

عشان كدا قلت متلفش الصامولة ال 22 أكتر من ربع لفة عشان ممكن وانت بتربط البار تلف لفة زيادة لجوا والعربية تحدف يمين

هتقولى الديسك هيمنعك ... هقولك الديسك إنت ممكن تحركه لجوا وبرا بإيدك على زى ما البار مربوط

فخلوا بالكم من النقطة دى

وآدى المسمار القلاووظ اللى هو جزء من الاسكترا اللى بيركب فيه البار وشايفين أهو الصامولة راكبة الأول .... وأنا قلت نفكها فى اتجاه عقارب الساعة بس الحقيقة إنك بتربطها لأنك لما تربطها هتفك هتدخل جوا عشان تعرف تلف البار عكس اتجاه الساعة
Uploaded with ImageShack.us
بعد ما نركب البار الجديد نربطه كويس

ونقرط على الصامولة دى بقى الربع لفة اللى فكيناها بس المرة دى عكس اتجاه عقارب الساعة عشان تزنق البار لبرا

أظن الموضوع سهل وبسيط وأى حد يعمله بسهولة إن شاء الله بس يركز فى الكلام دا عشان يتلاشى أخطاء ممكن تزعله لأن عفشة السيارة يعنى أمان ومينفعش الهزار فيها

استعملت wd40 لتسهيل الفك ... بس اكتشفت أنه ولا الهوا مبيعملش حاجة هو لو فكيت الصامولة حبة وبعدين رشيته هيسهل

إنما غير كدا ولا له تأثير معايا