الموضوع: الفانتازيا مالها وماعليها بعد استخدام 8 شهور!!

السلام عليكم
أنا إشتريت العربية بتاريخ 2012/9/16 من معرض بتاع تويوتا مش فاكر اسمه ,أول فئة ب 172 ألف جنيه
وقطعت بها إلى الآن حوالي 19000 كيلو


نبدأ بالمميزات:
- ثبات خرافي لدرجة إني مش لاقي كلام أوصفه بيه ,من الآخر إمشي على سرعة وعلى أي طريق وخد أي غرزة العربية مش حتقول لأ وكل ده على كوتشات 15 195 مش عارف على 17 215 في الخليجي ممكن تعمل إيه أحسن من كده!
- الفرامل باختصار شديد تاخد الدرجة الكاملة 10/10
- التوكيل منزل في أقل فئة كماليات ستاندرد زي البلوتوث والتعتيم والطارة الجلد الملتي ومسند اليد الأمامي وسنسور الإطارات والمرايات الضم وغيره
- العربية شكلها من بره تحس ليه هيبة مقارنتا بمثيلاتها في السعر وخصوصا الفانتازيا واجهتها الأمامية عجباني قوي وصوت الكوتشات من بره عالي زي العربيات الألماني
- 6 فتحات تكييف في الخلف
- صاج قوي ومتين والبوية كذلك وصوت قفلة الباب حاجة محترمة
- خامات داخلية ممتازة وفرش الكراسي حمال قاسية
- فيها كده كام حركة ذكية عجبتني زي إنه متقدرش تحرق عالمارش والإزاز لو قفلته أوتو وقابل أي عائق بيرجع تاني ولو مشيت وإنت رافع الهاند بريك بينبهك ولو قفلت بالريموت جميع الإضائات الداخلية بتقفل لو كنت مشغلها وغيرها
- نظام صوتي تحفة نظرا لأنه مزود ب8 سماعات وأمبيليفاير ومجهز بوصلة aux و bluetooth streaming
- مساحة الأرجل للركاب الخلفية واسعة
- تصميم الدركسيون متاخد من الأودي a8 2005 حرفيا ودي إضافة ليها
- الكراسي الأمامية مريحة جدا خصوصا على الطرق الطويلة مبتحسش بأي تعب في الضهر وقافلة من الجمب
- أكبر مساحة شنطة في فئتها وفئة إللي أكبر منها كمان تقريبا 590 لتر ,وياسلام لو عملت طي للكراسي الخلفية تبقى قلبت نص نقل!!
- عفشة ناعمة ومريحة والعربية عموما سواقتها ناعمة جدا
- عالية عن الأرض استحالة تحك في أي مطب في مصر مهما كانت الحمولة
- طلعة تقيلة وراسية مريحة في الزحمة ,مش مضطر تحسس عالدواسة طول الطريق لأ بتدوس براحتك بعكس الياباني إللي ممكن يقلب بطنك من كتر التنطيط في الزحمة
- دركسيون خفيف جدا على السرعات المنخفضة وتقيل جدا على السرعات العالية يعني تمشي على 180 وإنت بتاكل من غير أي قلق وبرضه ميتهزش عند أي حفرة في الطريق بعكس اللانسر
- عزل الصوت للأصوات الخارجية والهواء فقط جيد

نيجي بقى للعيوب :
- عزل الهواء جيد لكن road noise سيئ جدا والأسوء منه عزل المتور على رأي أخونا أحمد سامي تحس إن المتور في حجرك وإنت سايق ,ده غير إن صوت المتور كمان خشن
يعني لو مسافر سفرياية طويلة أعمل حسابك في شريط مسكن للصداع إللي حتاقبله
- تكييف متواضع مش جامد زي الفيرنا ولاتعبان زي الفلوانس ولكن تم التغلب تماما عالمشكلة دي بالفاميه بقى تلاجة الصراحة بس المشكلة بقى حتضر أشليه وأحطه تاني بسبب الكماين ورامي في الشنطة كام رول فاميه تحسبا للظروف دي
- الكراسي الخلفية جاية بزاوية قائمة بزيادة غير مريحة بالمرة للي قاعدين ورا
- الإضائة الخضرا مع العدادات البيضا مش لايقين الصراحة
- التكييف الclimatronic نظامه غبي ومستفز يعني مثلا لو قللت الحرارة إجباري المروحة تزيد معاها والعكس كذلك ولو قفلت العربية وشغلتها لازم ترجع تضبط سرعة المروحة تاني وتقفل الهوا من الخارج تاني برضو وغيرها
- مسند الإيد الخلفي وارتفاع كرسي الراكب الأمامي أوبشن . طب ليه كده
- وضعية القيادة مش ولابد ,دواسة البنزين مقربينها زيادة عن اللزوم فا ياإما تبقى طايل اللدركسيون لكن رجلك خابطة في التابلوه أو تريح رجلك لكن إيدك تبقى بعيدة عن الدركسيون حاجة بجد مستفزة ومش قادر أتأقلم عليها حتى الآن
- صحيح ثباتها ممتاز لكن الحلو مبيكملش نظرا لافتقارها لل ESP بالإضافة إلى إن الدركسيون مبوش شوية
- عدد الإيرباجز قليل 2 فقط يعيني لو لاقدر الله كان إتخبطت خبطة جانبية الموضوع حيبقى مش ظريف
- نظام ال voice tag فاشل ودايما بيقرا غلط مش عارف ليه حاطينه الصراحة
- الإضائة الخضرا مع العدادات البيضا مش لايقين الصراحة
-قطع غيار غالية نوعا ما مثلا مرايتي مرة إتسرقت رحت سألت عليها في التوكيل طلعت ب 4 آلاف بالتركيب رحت جبت الصيني ومن غير تعتيم كمان بألف ونص !
-متور ضعيف جدا مقارنتا بوزنها ,لازم تحرق عالغيارات عشان العربية تمشي ولحد إنهاردة ساعات بتزاول إن الهاند بريك مرفوع وأنا ماشي ,وتوب سبيد برضه قليلة (185 كم/س في الظروف العادية)

و أخيرا إختياري للأوكتافيا كان من أسهل القرارات إللي خدتها في حياتي وبعد أما جبتها أعجبت بيها أكتر وحبتها جدا جدا
الحاجة الوحيدة إللي ندمان عليها إني مجبتهاش مانيوال إتخنقت من الأوتو جدا لتعودي عالفيتيس المانيوال وكانت ساعتها المنيوال ب 149 ألف ( بتمن الريو الهاي لاين حاليا !!)
والفوكس والأسترا مع إحترامي ليهم لسه بدري شوية إنهم يخشوا في مقارنة مع الأوكتافيا.