مضايق اوووووي

**Ahmedelwakil07** · 09-05-2013 12:59 AM

مساء الخير يا رجالة
في البداية دي اول مشاركة ليا من زمان أوووي :)
المهم باركولي
الحاج ربنا كرمه وأشتري لانسر ٢٠١٣ basic اوتوماتيك من الجيش :) وبصراحة عربية جميلة جدا
استلمنا من يوم ١٧-٤ والعربية لغاية دلوقتي عاملة ٧٤٠ كيلو وما شاء الله تحفة
المهم
العربية انا بسوقها - رغم أني تحت السن ومش معايا رخصة - بس الحج بيثق في سواقتي وكده وبردو عشان انا اللي بقضي المشاوير وكده وينزل مع مامتة عشان هيا مش بتعرف تسوق وكده يعني
انا طبعا عشان ساكن أي مدينة الضباط الهايكستب (اللي علي طريق إسماعيلية الصحراوي) عشان كده بسوق براحتي والحمد لله انا متعلم من يجي ٦ سنين وسوقت عربيات كتير زي فيات ١٢٧ و ٢٨ و٣٢ ولانسر عيون صفية وأخيرا فيرنا يعني مستوايا كويس
ندخل في الموضوع
العربية كانت معايا النهاردة في مشوار والمهم انا ركنها في حتة جنب الطريق رملة يعني وكده وعادي وطلعت لصحابي وخلصت ونزلت بعد ساعتين ولقيت منظر زعلني أوووي
واحد ربنا يسهله لازق العربية بتاعته (نوبيرا) في عربيتي المهم دورت العربية وطلعت يجي نص متر كده عشان أشوف في حاجة في الاكصطدام ولا لأ ونسبته تسخن ونزلت لقيت ٣ مش خرابيش لكن دوائر كده- تقريبا - متقشرة والدهان بتاع العربية متشال ولون الفيبر الأسود ده باين وعشان العربية لونها اسود بابنة وشكلها وحش اووي (هرفع الصور بكرة)
كان معايا واحد صاحبي عرف العربية المهم قلته انا هروح اتخانق معاه منعني وهداني وقالي مش مستاهلة عشان الراجل ده مجنون وغريب أوووي وبلاش مشاكل وبصراحة العربية صعبت عليا أووووي وبالأخص عشان لسه زيرو وكده المهم فكرت كويس وخفت عشان بردو مش معايا وكده وتوكلت علي الله ومشيت وأنا لسه في قمة الزعل حتي الأن
اللي انا عايز اعرفه هل في حل للي حصل في الاكصطدام ده عشان بجد انا زعلان علي العربية وبابا كمان هيزعل أوووي
أرجوكم فيدوني

**delaga** · 09-05-2013 01:07 AM

يا باشا عادى اولا الحمد لله على كل حاجة وكوبس انها ماحصلهاش اكتر من كده كويس انها جت فى الاكصدام عادى معظم العربيات لازم تلاقى فيها شوية خرابيش فى الاكصدام
حلها ممكن تروح لبتاع دوكو يرشلك الحتة الصغيرة دى بعد مايصنفرها من غير معجون ولا حاجة وماعتقدش هاتبان بس اسال الاول برضه

**youssef_u** · 09-05-2013 01:47 AM

بسيطة يا باشا بسيطة تتحل عند اي حد بتاع دوكو

**el diesel** · 09-05-2013 02:43 AM

يا جميل ولا يهمك انت فى مصر
قول حسبى الله وحده نعم الوكيل وبعدين حلها بسيط عند اى بتاع دوكو مش هاتخد فى ايده كتير هو يمكن اللى مزعلك قوى انها علشان لسة جديدة بس هانعمل ايه
انا امبارح الصبح نزلت لقيت واحد واخدلى العربية من باب السواق للباب للى ورا وكانت عربية سودة وانا عربيتى بيضاء :) :)

**Elsebily** · 09-05-2013 10:03 AM

المشاركة الأصلية كتبت بواسطة delaga

حلها ممكن تروح لبتاع دوكو يرشلك الحتة الصغيرة دى بعد مايصنفرها من غير معجون ولا حاجة وماعتقدش هاتبان بس اسال الاول برضه

عادي ولا يهمك اصلا مينفعش عربيه تمشي جديده في مصر لازم تاخدلها ختم الجوده وعامة لو مفيهاش مشاكل مع والدك سيبها كده اما لو كانت الدواير كبيره شويه فهتترش وعلي فكره مادام وصلت للسواد بتاع الاكصدام يبقي لازم معجون