آخر كلام

**ahmedalaahosny** · 11-05-2013 12:48 AM

عايز عربية ف رينج 35 الف وكله بيرشح الاكسيل ال1300 بس انا شايف ان شكلها مش شيك خالص خاصة من ورا عذرا اذواق بقي وكانت عند جارنا وشوطت مرة الكورة جبتها ف الرفرف اتعوج كان قطر دخل فيه ومن ساعتها وانا قافل منها و كنت هجيب سويفت برده 1300 بس محدش جاب سيره عنها كله الاكسيل ولاقيت دوجان وماروتي وغيرها لما تفتح كونتكت كار وتحط الفئة السعرية ولقيت شاهين بس كارونة و1400 ولقيت الاوروبي بونتو وجولف وبولو وكليو وكورسا بس الصنايعية استحالة يظبطوها ف الميكانيكا لازم تروح تصلح حاجة يبوظولك حاجة تانية من الآخر وبعد الرغي ده كله انا عايز عربية تنفع الواحد يروح بيها الجامعة ويقضي مشاويره ويركب معاه بتاع 3 صحابه ولو تكيف لان المنصورة ف الصيف بتبقي نار وتكون حنينة ف قطع الغيار وعم عبده البقال يفهم فيها مش مهم شنطة لان انا مش هسافر بيها غير مرة كل شهر ولا حاجة وكمان لما ربنا يكرم واخلص تعليم واطلع الرخصة وآسف للاطالة

تم نقلة لقسم المقارنات .

**dedo_ryo** · 11-05-2013 01:33 AM

فكر في بيجو 405 موديل 91 و 92 و 93 عربيه قويه 1588 سي سي " يعني مدعمه " و تكيييييييييف تلاجه بمعني الكلمه
و صلابه عاليه جدااااااااااا و قطع غيار ولا ارخص و شكل فخم جدا

**sherif moneer** · 11-05-2013 02:09 AM

بص يا باشا انته تركب كورسا وعلي ضمانتي :d
مين قالك ان الصنايعيه مش هيعرفو يظبطوها هنا ف المنصوره؟
عندك شكري ده ميكانيكي اوبل بس و رمضان كهربائي ف اخر الشارع والكورسا كويسه جدا وتكييفها حلو
يا اما بقى تجيب لانسر بطه او لانسر عيون صفيه ودول كويسين جدا يا اما تجيب لانوس 1 وهيا في الحدود دي
والاوبل قطع غيارها متوافره جدا والكورسا حاجتها مش غاليه
ده الفتيس بتاعها ب 300 جنيه

**p r i n c e** · 11-05-2013 05:24 AM

اسبرانزا a113
ممكن تزود الفلوس اللي معاك شوية و تجيب a113 فابريكة برا و جوا و عداد قليل و موديل حديث.. هتبقى ف حدود 40

**p r i n c e** · 11-05-2013 05:25 AM

عربية شيك و موديل حديث و منتشرة جدا و هتلاقي قطع غيار متوافرة و ناس كتير بتفهم فيها
و مبروك مقدما أيا كانت العربية :-)

**S O P H O S** · 11-05-2013 06:00 AM

متفق علي a113
عربية معقولة

**ahmedalaahosny** · 11-05-2013 07:55 AM

متشكر ياجماعة علي سرعة الرد بس هما 35 مش اكتر يعني مافيش 113 كده وبردوا لانوس 1 لو ماكانتش اربعينات يبقي دي هتخليني ابات عند الميكانيكي انا برده لقيت ابيزا تسعينات دي برده ايه نظامها هل في حد بيفهم فيها ولا ايه ؟ كما البولو هل في حد بيفهم فيها؟

**p r i n c e** · 12-05-2013 06:33 AM

إذا كان كدا يبقى الإكسيل هيا الحل
بس بشرط الحالة
متستعجلش و دور براحتك
انا عارف أول عربية الواحد بيشتريها بيبقى مستعجل و عاوز يشتري
بلاش استعجال خالص و دور على إكسيل نضيفة و ربنا يوفقك ل عربية ترضيك :-)

**bassemali** · 12-05-2013 02:53 PM

أنا مع الأوبل الكورسا بصراحه شكلها شبابي وثباتها حلو وتستحمل الهري .. وقطع الغيار مش غاليه قوي يعني بس طبعا أغلى من الإكسيل .. ربنا يوفقك إياك إياك إياك تستعجل ودور وشوف كذا حاجه لغاية لما تقع في حاجه لقطه بإذن الله .

**ahmedalaahosny** · 12-05-2013 03:09 PM

انا متعقد منها من يوم ماشوطت الكورة جت ف الرفرف عجنته كآن قطر خبطها يبقي ازي الحال لما اتعلم واخبط فيها انتوا بتكلموا ع 1500 ولا 1300 اصل انا هعمل ايه ب 1500 سي سي جوا البلد ف الزحمة وكمان شكل ال 1300 مش عاجبني حسسني اني راكب سكودا فيفوريت نفس الشكل البشع عذرا مجرد اختلاف اذواق انا عجبني ف الاوروبي شكله زي البونتو والابيزا والكورسا لان كان معروض عليا برايد هاتش باك وصراحة عاملة شبه علبه السالمون زيها زي الماروتي برده اختلاف اذواق عايز بقي حد يقولي اخبار الابيزا 94 ايه ف المنصورة والبولو 94 لان شكلهم مقبول جدا علي عكس موديلات سنتها