الموضوع: تغيير ماستر فرامل العجله الخلفية

دى تجربتى مع تغيير ماستر فرامل العجلة الخلفية للشيرى A11.
منذ ايام لاحظت نقص فى زيت الفرامل وكملته وامبارح لقيته ناقص تانى زودته وتممت على باقى الحاجات(زيت ومية وباور) وقبل ما اطلع اروح مشوارى بتمم على العجل (ليكون نايم ولا حاجة) لقيت العجلة الخلفية يمين مرشحة زيت وماكانش ينفع اسيب العربية المهم روحت مشوارى ورجعت.
النهاردة الصبح .... مش الصبح اوى يعنى على الساعة 11 كده ... نزلت ورفعت العربية فكيت العجلة لاقيت مسمار صليبه ماسك الطنبورة فى الصرة حليت المسمار وسحبت الطنبورة للخارج لقيت الدنيا جوه غرقانه زيت التيل والماستر والسوست وكله المهم حليت ف الاول ماسورة الباكم (زيت الفرامل) (مفتاح 11مم) وسديتها بعود كبريت خشب علشان الزيت ما يروحش كله على الارض.
لقيت مسمارين النكيه 5مم خلف الماستر هما اللى ماسكين الماستر قمت بحلهم وسحبت الماستر للخارج.
غسلته بالماء والصابون وروحت لبتوع الالمانى قالى ده ماستر جولف2 بـ 45 جنية واللى عنده صناعة ايطالى (المهم انه مش صينى) اخذته وصورت العلبه واشتريت مسمارين جداد بالمرة وروّحت وصورته لكم القديم والجديد اخوات!!!.



طبعا قبل التركيب قمت بغسيل التيل والسوست والطنبورة وكله بالماء والصابون ونفخه بالهواء لحد ما بقى زى الفل.


تم وضع الماستر مكانه وربط المسامير الالنكيه جيدا وتركيب ماسورة الباكم وفتح مسمار الهواء (مفتاح 7مم) لملو الماستر بالزيت لحد ما جاب زيت وقفلته مؤقتا لحين تركيب الطنبورة.


تم تركيب الطنبورة النظيفه وربط المسمار الصليبه وبدأت اخد الهواء من مسمار الهواء لملو الماستر جيدا ولعدم وجود هواء فى الديرة.... ازاى... اقولك.
ح تزود الماستر العمومى بالزيت مكان اللى وقع على الارض.
ح تجيب حد يقعد فى العربية ويدوس على الفرامل ويسيب ويدوس تانى ويسيب (يكارك بلغة الميكانيكية) وبعدين يدوس ويفضل ديس وانت تفتح مسمار الهواء وتطلع الهواء وتقفله تانى وتكرر العمليه دى مرتين او تلاته لغاية ما تجيب زيت صافى من غير هواء تربط المسمار جامد.
وتركب العجله وتنزل العربية زى ما انا عملت.
ح ارفع لكم الصور بقى بسرعة قبل ما النور يروح!!!!.