#التقرير الثانى بالصور عن فرش لانسر بومة 2013 #

**Dr.lancer** · 17-05-2013 01:41 PM

امبارح روحت لجينز كار و عملت فرش و أرضية جلد للعربية. طبعا المحل ده غنى عن التعريف و فى مشاركات كتيرة عن شغله بس للأمانة فعلا شغله عالى جدا و الناس اللى شغاله عنده محترفة و عارفه شغلها.

فى الأول كنت مرعوب وانا شايف السروجى عمال يشيل فى الكراسى و الكنب و باكيتات البلاستيك وكان منظر العربية فاضيهههههه ويصعب على الكافر و كنت خايف لحسن لما يجى يركبهم تانى حسمع أصوات تزييق و حاجات من اللى كنت بسمعها فى اللانوس لما الزمن جاه عليها. بس الحمد لله كل كلبسة او مسمار اتشالت رجعت زى الأول بالضبط زى ما يكونوا حافظين اللانسر.

شوية صور أخدتها علشان تبين نضافة شغلهم. انا اخترت لون رمادى غامق مع فضى علشان يفتح شوية

هنا أخترت دخله اللون الفاتح بالشكل الدائرى علشان يدى احساس سبور شوية مش كلاسيك

وده الشكل من ورا كنت بفكر أعمل مسند الرأس باللون الفاتح بس الحمد لله إنى لغيتها فى أخر وقت

طلبت يعملى الغرزة الدبل علشان تظهر فى مساند الرأس

ده شكل الكنبة. فى مشكله هنا أن الشباك اللى بيفتح على الشنطة من جوه بقى صعب تفتحه. بس حشوف لو حتليين مع الوقت

الصورة دى بتبين نضافة التقفيل للكونسوله من تحت (السهم)

أنا عملت الارضية جلد رمادى و فرشت الشنطة بالمرة. ودى صورة الكاسيت اللى نازل فيها

أه نسيت أقول التكلفة كانت:

1) الفرش 1600 (حسب نوع الخامة) و عمل خصم الى 1440 (علشان خاطر نايل موتورز)
2) الأرضية 450 بعد الخصم 400 لانى طلبت النوعية اللى من تحت فيها زى الصوف علشان يمسك فى الفرش الفبريكة و ميتحركش تحت رجلك و ده كان أغلى شوية بس فى انواع لحد 200 جنية
3) خياطة دبل 200 بعد الخصم 180
التكلفة كلها 2000 جنية بحاول أنسى الموضوع ده ........بس بجد يستاهل كل قرش

أتمنى أن يكون التقرير أعجب حضراتكم. و أى إستفسار أنا تحت أمركم

**manfromegy** · 17-05-2013 02:16 PM

بسم الله ما شاء الله.سبحان الله و لا حول ولا قوة الا بالله.تحفه.انا عامل اخوه بنفس التفصيله بس الغامق اسود و الفاتح يبقي الغامق بتاعك .ربنا يباركلك و يكفيك شر العين

**Dr.lancer** · 17-05-2013 02:29 PM

المشاركة الأصلية كتبت بواسطة manfromegy

بسم الله ما شاء الله.سبحان الله و لا حول ولا قوة الا بالله.تحفه.انا عامل اخوه بنفس التفصيله بس الغامق اسود و الفاتح يبقي الغامق بتاعك .ربنا يباركلك و يكفيك شر العين

والله انا كنت حعمل الأسود فى الأول لانه بيدى وقار و شكله ما شاء الله شيك على الفضى بس ماينفعش قوى مع الأولاد حيبهدلوه بدرى، و الحاج احمد مشعل اكد لى المعلومة دى و قال لى ان الأسود شيك جداً بس محتاج عناية زى الأبيض و الفواتح عموما

**aboamina** · 17-05-2013 02:32 PM

الصالون شكله روعة ماشاء الله

**Abo.Omar** · 17-05-2013 03:34 PM

الف مبروك يا باشا وماشاء الله تقفيل فبريكه

بس استفسار رفيع .. هو بيعمل للتابلوه والابواب؟؟ وبالنسبه للشنطه هل عندهم اللوح نفسه ولا لا لان انا عندى مشرووخ . ولو حد عمل الحاجات دى ممكن التكلفه

شكراااا

**hermoine** · 17-05-2013 03:41 PM

ما شاء الله
هم شغلهم محترم و حضرتك ذوقك جميل بس بصراحة بحس الأسعار عالية شوية
أعتقد و الله أعلم إن دي ضريبة شهرتهم

**islamnasser10** · 17-05-2013 03:51 PM

المشاركة الأصلية كتبت بواسطة hermoine

ما شاء الله
هم شغلهم محترم و حضرتك ذوقك جميل بس بصراحة بحس الأسعار عالية شوية
أعتقد و الله أعلم إن دي ضريبة شهرتهم

+1
شغلهم نضيف فعلا بس الاسعار عالية اوووي 2000 جنيه ده فيه ناس بتفرش صالون وارضية بربع المبلغ ده طبعا مش هقول نفس الجودة بس برضة السعر مبالغ فيه وكمان ده بعد الخصم