مش لاقي حد يغيرلي زيت الكورولا

**maghnom** · 24-05-2013 10:19 AM

السلام عليكم
معايا تويوتا كورولا جاية من الخليج و فيها زيت بترومين 3000 كيلو
حبيت اكرمها و اغيرلها بأحسن نوع في السوق المصري (شل هليكيس الترا) الموتور صوته علي و حسيت فيه بخشونة و ندمت اني نزلت الزيت اللي كانت جاية بيه من الخليج على الرغم انه نظريا اقل في الاحتمال ومعاد تغييره وجب, مع انه كان منعم الموتور تماما و لما غيرته كان نازل اصفر وحتى العامل في شل استغرب اني بغيره

المهم معاد تغيير الزيت جه تاني قلت ما بدهاش رحت موزع معتمد لتويوتا جبت منه زيت لكزس و مصنوع في الامارات, المشكلة ان مفيش محطة عايزة تغيرهولي! رحت شل بمجرد ما قلت للعامل اني جايب زيت من برة قفل كبوت العربية و قالي ما ينفعش, رحت لحد بنزينة وطنية قالولي ما يجوزش, بقيت هتجنن, كأنهم بيقولولي هتحط زيت سيء يعني هتحط زيت سيء.
حد يا شباب يعرف اي محطة في مدينة نصر ممكن اغير فيها الزيت بزيت انا جايبه من برة بدون الفيلم الهابط بتاع زيوت المحطة وبس ده؟

**mohammadrashee** · 24-05-2013 10:27 AM

اي ميكانيكي

**maghnom** · 24-05-2013 10:47 AM

المشاركة الأصلية كتبت بواسطة mohammadrashee

اي ميكانيكي

شكرا يا باشا
بس مفيش حل تاني؟ الميكانيكية هلاقي عندهم زحمة و مش بثق في معظمهم
مفيش مركز نضيف يبقى زي المحطة يرفع العربية و ينزل اللي فيها لآخر نقطة زيت؟

**mohammadrashee** · 24-05-2013 11:01 AM

مركز ايه ده غيار زيت يعني طبة وفلتر وخﻻص
انا مره روحت البنزينه الواد معرفش يفك الفلتر نزلت انا فكيتهوله
عادي جدا

**kar!m** · 24-05-2013 11:39 AM

أي حد بتاع زيت .. انت مكبر الموضوع أوي.

**maghnom** · 24-05-2013 12:55 PM

المشاركة الأصلية كتبت بواسطة kar!m

أي حد بتاع زيت .. انت مكبر الموضوع أوي.

مش مكبره ولا حاجة انا متعود علطول بغير زيت في محطات البنزين وامبارح رحت 4 محطات وكنت حاسس كاني بشحت على حد يقبل يغيره علشان معايا نوع من برة المحطة وكأني ماسك تهمة
لو اعرف كده ما كنتش جبت الزيت من برة ورحت التوكيل غيرته برضه بنفس النوع الاصلي لاني اعتقد انه موجود في التوكيل

و سؤالي كان واضح
في حد يعرف مكان في مدينة نصر تحديدا لتغيير الزيوت كخدمة متخصصة ومش بيشترط عليك تكون شاري الزيت من عنده؟

و ياريت بلاش ردود من عينة اي حد بتاع بتاع, انتو كلكم تويوتاوية و عارفين ان العربية بتبقى عزيزة ومش اي حد يحط ايديه فيها حتى لو في غيار الزيت و ربط الطبة والفلتر

**mohammadrashee** · 24-05-2013 03:16 PM

عندك حق خصوصا لو الواحد بيعمل شغل عنط ميكانيكي وميعرفش يراجع ورا الصنايعي
من وجهة النظر ديه اقول لحضرتك روح غير الزيت في التوكيل اضمن
تصدق طول عمري بقول هو التوكيل بيكسب ازاي باﻻرقام المبالغ فيها جدا اللي بيقولوا عليها في المصنعيات
بس دلوقتي فهمت

**maghnom** · 24-05-2013 09:13 PM

المشاركة الأصلية كتبت بواسطة mohammadrashee

عندك حق خصوصا لو الواحد بيعمل شغل عنط ميكانيكي وميعرفش يراجع ورا الصنايعي
من وجهة النظر ديه اقول لحضرتك روح غير الزيت في التوكيل اضمن
تصدق طول عمري بقول هو التوكيل بيكسب ازاي باﻻرقام المبالغ فيها جدا اللي بيقولوا عليها في المصنعيات
بس دلوقتي فهمت

انا غير الزيت في محطة شل النهاردة بعد ما عملت التماس ووعدتهم اني ما اعملش كده تاني ابدا
وحياتك لو كنت شايف الصنايعي وهو مش عارف يفك فلتر الزيت ويركب الجديد علشان ابعاد الفلتر الاصلي مش مطبع على قاعدة مفتاح ربط الفلاتر عنده كنت فهمت اكتر التوكيل بيكسب كده ليه

**mohammadrashee** · 24-05-2013 09:31 PM

المشاركة الأصلية كتبت بواسطة maghnom

انا غير الزيت في محطة شل النهاردة بعد ما عملت التماس ووعدتهم اني ما اعملش كده تاني ابدا
وحياتك لو كنت شايف الصنايعي وهو مش عارف يفك فلتر الزيت ويركب الجديد علشان ابعاد الفلتر الاصلي مش مطبع على قاعدة مفتاح ربط الفلاتر عنده كنت فهمت اكتر التوكيل بيكسب كده ليه

حصلت معايا قبل كده في محطة طاقه اللي على الدائري عشان بغير زيت كاسترول
واول ما دخلت البنزينه سألت الصنايعي عندك الكوبايه بتاعة الفلتر عشان المكان عندي مزنوق ومينفعش الجنزير
قالي ايوه موجود
وبعد ما ابتدا اكتشفت انه معندوش الكوبايه وانه مش عارف يفك الفلتر عشان مكانه مزنوق
وكان نزل الزيت والفلتر القديم باظ
نزلت المجرى وفكيته بس مش هقولك انا عملت ايه اللي كان ماشي على الدائري كان ناقص يقف يتفرج