الموضوع: موضوع كامل لمميزات و عيوب اللوجان 2013

سلام عليكم يا رجالة

النهاردة انا قولت احكيلكو عن اللى انا شايفوا حلو و وحش ف اللوجان

أولا انا اشتريتها شهر اربعة اللى فات و لحد النهاردة عاملى 10000 و كسور
ده لأنها عربية شركة و بتحرك كتير ما بين المواقع فا جربتها كتير جدا على طرق السفر

انا بقضي ف العربية حوالى 3 أو 4 ساعات ف العربية يوميا

أولا ممكن أكلمكوا عن الراحة:-

1- الكراسي قعدتها مريحة
2- وانت بتركب او بتنزل من العربية بتكون مرتاح فا لا بتنزل أوي ولا بتعاني وانت بتخرج منها عكس العربيات الواطية
3- مواضيع زراير الإزاز اللى ف التبلوه مش عملى بالمرة ة الاحسن كانت تبقا في الباب زي العادي

التسارع:-

فرقت معايا بعد ال 5000 او بالخصوص لما كسرت ال 7000 التسارع زاد يعني بجيب 160 مستريح و مشغل التكييف و لو دوست تاني تجيب اكتر و الثبات لحد 140 رائع و 160 بيقل شوية "ملفات الطريق الصحراوي باخدها على 120 و 140 مستريح"

نقاط إضافية:-

بما اها عربية عالية فا انا بخش ف المطبات حتي لو 5 ف العربية و كمان ركبت قبل كده 6 ف العربية و ماشي مستريح بس طبعا التسارع قل معايا بشكل ملحوظ

مقاسات العربية سهلة.. بمجرد ما تاخد عليها

الدركسيون تقيل أوى, يعني هيقرفك لو سايق ف زحمة على ما تتعمود عليه، بس الصراحه حلو اوى تقل الدركسيون ده على طرق السفر

انا مبفهمش أوي ف مواضيع العفشة بس انا بعون الله مسبتش حفره الا و نزلت فيها و العربيه زي الفل الحمد الله *خمسه و خميسه*

الإضائة بتاعتها مش عجباني نهائي و أديها صفر من عشرة للأسف

شنطة العربية روعه و واسعه جدا بشيل فيها اى حاجه و كل حاجة

موضوع الكلاكس اللى في الدراع ده مستفز جدا و سمعت ان الدراع بيبوظ كتير و ربنا يستر

دراع المالتى فانكشن روعه مش عارف من غيره كنت هعيش إزاى

التكييف انا بشغله على 2 و يعتبر جميل مش عارف الناس بتشتكي منه ليه و كمان معظم الوقت بشغله على 1 على حسب الجو

سمعت كتير ان في سخونة بتيجي من عند الدواسات بتاعت البنزين .. لسه مقابلتش المشكلة دي

أى مقطوره أو عربيه كبيره تعدى من جنبي عربيتي تتهز جامد

المرايات الجانبية كبير و مبقلظه و بتكشف الطريق و ده محستوش الا لما ركبت اللوجان فتره بعد كده ركبت الالنترا فرق كبير

الفرامل جيده الحمد لله على عكس الفيرنا و العربيات اللى في نفس الفئة اللى معندهاش ABS

إستهلاك البنزين يعتبر إستهلاك أقتصادي لحد كبير

التابلوه جميل و فيه أماكن كتير تشيل فيها حاجتك ,, بس نفسي اركب مسند لليد

بيتهيألى كده دي كل الحاجات اللى عندي واللى عنده نقاط تانية سلبية أو إيجابية يضيفها على الموضوع ف الردود عشان الكل يستفيد


السبب انى جبت اللوجان هو المنتدي ده .. فا انا احب اشكركم على تقيمكوا للعربية بحيادية أفادت الجميع