الموضوع: انت ميكانيكي نفسك !!! (كل ما يتعلق بميكانيكا الدرجات النارية )

اولا
الكاربراتير
الكاربراتير هو قلب وعقل الموتور فلو فيه حاجة مش مظبوطة هيتهيالك ان الموتور فيه حاجة وبما ان الكاربراتير في البيك بيبقي عبارة عن اكتر من كاربراتير متوصلين ببعض فاحنا هنا بنواجه تصليح اصعب
عمتا في السبورت بيكس او الكروز بيكس او الصيني او او او او
هيا هيا نفس المبدا مع اختلاف الشكل
دا كاربراتير 400 يعتبر هو هو نفس باقي كاربراتيرات السبورت بيكس نوعا ما
احنا عندنا جمبين في كل كارب
جمب فية حاجة اسمها بساتم ودا غالبا مش بنقربلة كتير وجمب اخر فيه البكات ودا اللي بيبقي فيه معظم الشغل
الصورة دي عن جمب البكات



معلش علي الرسمة الغريبة دي معرفتش اوضحها اكتر عن كدة
اول حاجة هنعمل هنفك الاربع مسامير اللي مكتوب عليهم رقم واحد من كل غرفة (هيظهرلنا الشكل دا اللي في الغرفة اللي جمبيها )
2 دا بكات السرعة موجود منها اربعة في كل غرفة واحدة ودي مسؤولة عن توصيل البنزين في السرعات العالية
3 دي ابرة العوامة لو الابرة دي فيها حاجة او العوامة مش مظبوطة هتخلي البيك يشرق بنزين
4 بك السلانسية ودي اغلب المشاكل بتبقي فيه لو اتسد البيك لو جه يقف سلانسية هيقوم مبطل مرة واحدة
5 دا المكان اللي بيركب فيه خرطوم البنزين
6 مسمار ظبط الهوا ( ممنوع الاقتراب منة او التصوير الا في حالات معينة هنقولها دلوقتي ) ودا موجود منو اربعة في جانب كل غرفة وفي الفير بيبقا عن غطا اللي فوق
زي الصورة دي بالظبط
7 دا مسامير البوابات وموجد منها 3 بين كل غرفة والتانية (ممنوع الاقتراب منعا باتا الا في حالات معينة ) دا بيظبط البوابات انها تفتح مع بعض لما تدوس بنزين اي خلل فيه هيؤدي الي اختلال عمل الكاربراتير كله والموتور طبعا
8 دي العوامة وزي مقولنا ليها ظبطة معينة عشان متخليش البيك يشرق
لحد هنا كويس طيب نعمل اية بقي ؟؟؟؟
بعد ما تفك غطا كل غرفة ويبقي عندنا الشكل اللي هوا باين في الشمال
هنفك العوامة بحذر شديد ليها ابرة بتتشد من الجمب وتقوم العوامة فاكة وطالع معاها ابرة البنزين
نفك بك السرعة وبك السلانسية بمفك عادة خلي بالك في خدة في بك السرعة اللي انت بتفكة دا البك من فوق هتجيب مفتاح 8 وتفك البك نفسة
(طبعا الحكاية دي في الاربع غرف )
دا هيبقي شكل الكارب بعد ما يتفك منو كل حاجة في ناحية البكات



ودا من ناحية البساتم




واخدين بالكم من اللي معمول عليها سهم دي ؟
هنجيب مفتاح تي 10 وهنفك الاربعة دول هتطله وهتلاحظ جوا فية فلتر شفاف هنجيب اي ابرة ونطلعة
طيب دلوقتي اية العمل ؟
اول هنغسل الحجات اللي احنا طالعناها (البكات والعومات وكل الكلام دا ) بمنظف كاربراتير
Abro carb cleaner العبوة ب 23 جنية وكبيرة قوي
هنغسل كل حاجة كويس والبكات نفضل ننفخ فيها لحد منقدر نشوف من خلالها
نجيب بقي المنظف دا ونبخ في كل حتة في الكاربراتير زي محنا شايفين اي حتة فكل حتة
ويسلام بقي لو عندك كومبرسيور وشوية بنزين وتقوم فسسسسسسسسسسسسسسسس في كل حتة تنضيفة تمام
ونقوم مركبين كل حاجة تانية مكانها
وخلي بالك بعد ما تركب البكات والعوامة اوعي تقفل المسامير دلوقتي
___
جزئية البساتم
لو حطيت الكارب عدل هتلاقي في اربع حجات مدورة من فوق كدة
دخل صابعك وزقهم لو لقيت في مقاومة واول ماتشيل صبعك تقوم راجعة تاني مكانها يبقي فل قوي مش عاوزين نفتح الحتة دي (هتسمع صوت تفريغ هوا كدة )
لو لقيتها راحت ومرجعتش او بتعصلج اكيد هتحس بيها
يبقي هنفك غرف البساتم
هتلاقي سوستة طويلة نطت في وشك قوم اية هوب امسكها وهي طايرة وهتلاقي كاوتشة كبيرة مدورة شدها براحة هتلاقيها طالعة بابرة طويلة نضفها براحة وركبها تاني وركب السوستة واقفل الغطا تمام يبقي كويس مش تمام (لو لاقيت الكوتشة المدورة دي مشققة او مقطوعة ) يبقي عليك العوض ارمي الكارب دا عشان الحجات دي مش بتتباع في مصر هنا
:D
طيب اهم من الشغل ظبط الشغل
ازاي نظبط الكارب
الكارب عمتا ليه 3 انواع ظبط
1-ظبط العوامة
2-ظبط الهوا
3-ظبط البوابات
طيب نيجي للعوامة هنركب ابر العوامات ونشبطها يا دوب بالابرة ونقوم رافيعن العوامة ونجيب مسطرة ونحطها علي جمب الغرفة الحديد ونشوف اعلي حتة من العوامة المفروض تكون 7 مللي لو اكتر او اقل هنلاقي في العوامة الحتة اللي بيركب فيها الابرة بتاعت البنزين حتة حديد كدة بنحركها فوق وتحت لحد منوصل للظبطة اللي احنا عاوزنها
ونجيب الغطيان ونمعانا امبوبة من صمغ الاوهو وبلاش سيليكون لان البنزين بياكلة ونمشي علي حرف الغرفة ونقوم قافلين الغطا والمسامسير

ظبط الهوا ودا الاهم لو البيك كان بيقف سلانسية كويس ومش بيتخنق منك وانت بتجري يبقي بلاش نقرب لمسمار الهوا
طيب لو لا ؟
نجيب مفك ونقوم براحة قافلين المسمار بتاع الهوا براحة ونعد المفك لف كام لفة ونكتبها
خلي بالك اللفة الكاملة عشان نحسب لفة واتنين بتبقي عبارة عن لفة المفك مرتين يعني لو قدرنا نجيب قلم فلومستر ونعلم جزء من المسمار مع جزء من الكارب ونلف واول ما العلامة اللي عملناها تلف وترجع تاني لنفس النقطة اللي معمولة في الكارب دي لفة واحدة وهكذا
طيب تمام انا عارف كلامي ملخبط شوية
المفروض مسمار الهوا يتظبط علي لفتين كاملين ونص
طيب ازاي؟
نقفل مسمار الهوا علي الاخر بس متقرطش عليه لا يدوب اول ما يمسك يبقي كدة قفل
ونلفه اكننا بنفكة لفة ولفة كمان ونص لفة

طيب ظبط البوابات وما ادراك ما هو ظبط البوابات ودي سبب بيخلي اي ميكانيكي يقولك ارمي وهات كارب تاني عشان يستسهل
معاليك هتنزل تتمشي كدة لشارع الجمهورية هتجيب (حسب انت كام غرفة لو 4 تجيب 4 ) تجيب اربع عدادات فاكيوم بار واحد
ووصلات خراطيم
الخطوة دي اسمها
Carb sync
وبعد ما توصل كل حاجة وتسخن البيك وتدور تقوم هوب تشوف قراية كل عداد مع التاني المفروض يكونو نفس القارية لو لا
هتفض تلعب في المسامير اللي هيا رقم 7 في الصورة الاولي خالص لحد ما القرايات تبقي زي بعض
ودي شوية فيدوهات علي الدش الكتير اللي عمال اقولو من الصبح

[youtube]http://www.youtube.com/watch?v=exa467_eoXw[/youtube]

[youtube]http://www.youtube.com/watch?v=t0qf11BOx6o[/youtube]

[youtube]http://www.youtube.com/watch?v=1V-dxKZLkLc[/youtube]

[youtube]http://www.youtube.com/watch?v=-9y6o8wrv7I[/youtube]

[youtube]http://www.youtube.com/watch?v=-9y6o8wrv7I[/youtube]

السلام عليكم ورحمة الله وبركاته ...
تسلم ايدك على المجهود الرائع ده ...