الموضوع: تجربتى مع الامجراند7 و مقارنتها بالنوبيرا

بسم الله الرحمن الرحيم

فالبداية انا سعيد جدا لانضمامى لقسم جيلى و اتمنى اقدر افيد الاعضاء فاى حاجه يطلبوها ..
انا الحمد لله من ملاك الامجراند7 و بدلعها بأيمى .. انا كان معايا نوبيرا 2006 مانيوال اشترتها من الزيرو و بعتها و جيبت ايمى .. العربية عامله معايا 700 كم و هقول على المميزات و العيوب و انطباعاتى عنها لكن عاوز اقول الاول ان كلنا عارفين اد ايه النوبيرا عربيه اعتماديه و ثابته وجودها و الصراحه ماكنتش بعانى من اى مشاكل معاها وان تغييرى لايمى ده جه بسبب انى حبيت اركب عربيه فيها اوبشن اعلى و قلت كفايه 7 سنين عليها و بعد دراسه للامجراند و سؤال لملاكها و قرايه مواضيع كتير عنها كان فيها الايجابى و كان فيها السلبى لكن باستخارة المولى عز وجل قررت اشترى ايمى و الحقيقه لو رجع بيا الزمن برضه كنت اشترتها لانى راضى و سعيد جدا بيها لانها فعلا تستاهل اكتر من تمنها ...

انا فالموضوع ده هكلم عن تجربتى فى ال700 كم و اقارنها بنوبيرتى الى مشيت بيها 203 الف كم فى ال7 سنين و ارجو ان الموضوع ينفع بيه الناس و الى متردد انه يشترى الامجراند لعله يطمن...

هبتدى بتجربتى مع ايمى..
انا اشتريتها اسود فاميه من سمير ريان ب80500 استلمتها كان يوم خميس و شيكت عليها هناك و الصراحه الناس بتوع سمير ريان محترمين جدا جدا استلمت معاها وصله اليو اس بى و الولاعه و جربت كل حاجه فيها (انوار - زجاج - صوت موتور -تكييف - كاسيت ..الخ) و استلمت المفتاحين هما زى بعض عبارة عن ريموت فيه 3 زراير قفل و فتح الابواب و الاخير فتح الشنطه (الجميل لما تيجى تفتح بالريموت العربية بتنور العدادت و النور الصغير و الشبورة زى المرسيدس) دورت العربية و كان لمبة البنزين منورة و هنا ابتديت احط ايدى عالقلبى لسبـبـيـن .. لما قريت عن العربيه ديه لاقيت ملاك كتير ليها بيشتكوا لما بيحطوا بنزين لمبه التشيك انجين بتنور لو البنزين فيه مشكله تانى حاجه كذا حد و هو بيمون بيكسر فبرة التنك (اللسان الى بيقفل الغطا) فبيفضل الغطا مفتوح و ده بسبب ان عامل البنزين بيرزعه وهو بيقفله فنزلت انا اقفله بايدى (وكل مرة بمون بعمل كده والحمد لله مفيش مشاكل) المهم مونت و اللمبة مانورتش (ولغايه دلوقتى الحمد لله) ...
العربية ماشاء الله فخمه و واسعه لكن سرعان ما اخدت عليها و ده الجميل فيها بتحسسك ان التحكم فيها سهل و ده فعلا حقيقى و سحبها كان بالنسبالى معقول و طبعا انا لسه بلين فاخرى 3 على rpm
العربيه صوت موتورها هادىء و العزل بتاع الزجاج حلو اوى و قاعدتها كانت فى الاول مش مريحانى و كنت حاسس الكراسى ناشفه لكن مع الوقت مابقيتش حاسس ان فيه مشكله ممكن يكون انا اخدت على قعدتها او الكراسى بقت افضل .. الصالون واسع و العربيه عاليه عن الارض و مش بتحك فالمطبات و العدادات واضحه و الكاسيت معقول سماعتين الابواب كويسين جدا لكن البيضاوى الخلفى سيئين جدا (جولدى 20 وات و لا ليهم لازمه) المرايات الجانبيه بتبين كل حاجه و كذلك مرايه الصالون بتوضح الى وراك كويس ... العفشه بتاعتها جميله جدا و الفرامل اهم مايميز العربية ديه و تكييفها جميل جدا (تاتش) .. فنص التابلوه حاطين الساعه و جنبها شاشه بتبين لو الشنطه مفتوحه او الكابوت مفتوح او مشغل لمبة الشابورة الاماميه او لمبة الشابورة الخلفية ..بالنسبه للاضاءه فهى بروجيكتور لمض h1 وh7 و يمكن التحكم فارتفاع العدسات و فذراع النور فيه نظام اسمه auto ده عبارة عن سنسور بيحس بالاضاءة حوليك يعنى لما تشغله بالنهار النور مش بينور لكن بمجرد ما تتدخل نفق او جراج او الليل يليل تلاقى العربيه نورت لوحدها و العكس برضه لو مشغله بليل و النهار طلع عليك يطفى النور و النظام ده بيزود الاضاءه اتوماتيكيا (يعنى لو محتاج النور العالى بيشتغل لوحده دون تتدخل منك ) والحقيقه اللمض فى البروجكتور جميله و العالى فيها مبهر جدا مش محتاج تغيير للمض هالوجين تانيه او زينون ... استهلاك العربيه ممتاز حوالى 12 كم للتر وماحسيتش بان دواسه البنزين عاليه ولا حاجه و الشنطه واسعه جدا و ممكن طى ظهر الكنبه عشان تزود المساحه

العيوب :- من وجهه نظرى هى كلها عيوب فالتقفيل و ليس فالعربيه ذات نفسها يعنى ناس اشتكت من العربيه بتفصل كهربا او لمبة التشيك انجين تنور و العيب الى مضايقنى شخصيا صوت علبه الشكمان الى فالنص معلى صوت العربيه و ده للاسف بسبب الشكمان المصرى الى مركبينه و فرامل اليد ناشفه شويه فزى ماقلت هى كلها عيوب تقفيل

المميزات:- فراملها abs+ebd الصراحه ماشاء الله عالفرامل و جربتها اكتر من مرة و كل مره اتفاجىء بقوتها ولما بتدوس فرامل جامد و الabs يشتغل العربيه بتشغل الانتظار لوحدها عشان الى وراك ياخد باله .. الايرباج للسواق و للى راكب جنبه (ربنا يسترها علينا جميعا وما نحتاجلوش) .. الايموبلايزر وديه نقطه مهمه اوى و فيه عربيات كتير بضعف تمن الامجراند مافيهاش ايموبلايزر .. ثبات العربيه فالملفات حاجه جميله جدا مهما كان الملف ضيق و العربيه بتجرى انت جوه مش بتبقى حاسس بده .. التكييف الى بيسقع فعلا رغم ان فيه ناس قابلتهم مشكله فيه الا انى الحمد لله مبسوط جدا بيه .. العفشه المريحه مع عرض الكاوتش بيدى ثبات للعربيه مع الجرى و مش بيخلوك حاسس بشوارعنا الحلوة .. السنتر بيقفل لوحده بعد سرعه 20كم و تبتدى تديك انذار ارتداء الحزام لمده 30 ثانيه وبعدين يسكت .. العربيه فيها سنسور بارك بدون كاميرا .. لمض شبورة امامى و خلفى

مقارنتها مع النوبيرا:-

الشكل :- ايمى افضل (طبعا وجهات نظر)
الموتور:- النوبيرا 1600 (107 حصان) و ايمى 1500 (107 حصان) يعنى نفس القوة لكن ايمى اتقل فالوزن
صوت الموتور:- ايمى صوت موتورها اهدى رغم انه جنزير مش سير كاوتش زى النوبيرا
السحب :- فالاول الامجراند ماكنش سحبها قد كده لكن بعد ما وصلت ل500 كم بيها السحب بقى احسن و دلوقتى بقى زى النوبيرا و مش حاسس بفرق
الاداء بصفه عامه:- الاتنين زى بعض بس باور النوبيرا احسن و دى مشكله هشوفها فصيانه الالف لانه تقيل و العربيه واقفه و عفشه ايمى افضل و كمان القاعده فايمى اعلى ومش بتبقى قلقان من المطبات
الاعتماديه:- النوبيرا 7 سنين من غير عطل واحد (بعيدا عن انتهاء عمر البطاريه) و اتمنى ايمى تبقى كده برضه
التكييف:- النوبيرا افضل بفرق بسيط
الفرامل:- ايمى افضل
الثبات:- النوبيرا جيبت بيها 185 كم و كانت ثابته جدا و ان شاء الله لما الين هشوف هل ايمى عالسرعات العاليه بنفس الثبات ولا لأ و ان كان فيه ناس جابت بيها 190 كم و كانت ثابته جدا
استهلاك البنزين:- الاتنين زى بعض تقريبا

رايى الشخصى بعد تجربه الايمى انها فعلا سياره تستحق الاقتناء و مايتبصلهاش على انها صينى

ارجو ان يكون التقرير عجبكوا