الموضوع: تم تغيير البوابة اليوم

تم تغيير البواية اليوم فى التوكيل بواحدة جديدة
انا اشتكيت منها مرتين مرة فى صيانة 35 و قالولى دا واير البنزين و مرة فى صيانة 40 و نضفوها ... طبعا كل ده بيتهربوا من تغييرها

طبعا بعد التنظيف حصل موضوع الـ RPM تانى
نصحنى احد الاخوة مشكورا بأن أبعت شكوى للشركة الام و شكوى اخرى لشركة EIM نفسها و ان اشتكى على صفحة الفيسبوك بتاعتهم و اتصل بخدمة العملاء و اقدم شكوى

اتصلت بخدمة العملاء و قدمت شكوى كخطوة أولى و قلتله الموضوع ده اتكرر كذا مرة و فيه خطر كبير على حياتى و حياة عائلتى و مش هينفع تتهربوا من المشكلة اكتر من كده لإما هبعت للشركة الام فحجزلى ميعاد للصيانة و صممت ان يديلى الـ ticket number بتاع الشكوى ... قلتله عشان لو مفيش حل المرة دى هستخدمه و انا بشتكى للشركة الام.

رحت النهاردة و قلتلهم فى سموحة المشكلة اتكررت تانى فلازم تلاقولى حل... مهندس الإستقبال نده لمهندس الصيانة عشان يسأله قالى هيا بتفصل منك قلتله آه بتفصل على السلانسيه و كمان الـ RPM بقى بيلعب و بينزل عن الـ 500 و انا ماشى سلانسيه فقاله اكتب عندك انها بتفصل.

يبقى السر فى الموضوع يا جماعة كلمة إنها بتفصل بالإضافة لموضوع الـ RPMعشان يرضوا يغيروها.
أنا بيتهيالى لو مكنتش قلتله انها بتفصل كان هيدور على سبب عشان يتهربوا من تغييرها.

اللى ضحكنى بسأل مهندس الاستقبال الموضوع ده هياخد اد ايه قالى قدامك 3 او4 ساعات كده اصل هنفتح قلب الموتور و هنغير البوابة فالعملية دى هتاخد وقت

الصنايعى لما جابوا البوابة من المخزن غيرها فى خمس دقايق