ملاك اللانسر البومة محتاج مساعدة ضروري جدا

**A7medFox** · 03-06-2013 10:46 PM

السلام عليكم اعضاء نايل موتورز

امبارح كنت ماشي بسرعة شوية و خدت غرزة من قدام ميكروباص و فجأة لقيت تريللا قدامي رحت كابس فرامل العربية فضلت تزحف مني مسافة 70 متر مش راضية تقف رحت شادد الهاند عشان تقف برضه فضلت تزحف و مش عايزه تقف طبعا الدركسيون مش مستجيب معايا لا يمين ولا شمال عشان احاول افاديها بس رحت لابس في التريللا .. طبعا نزلت و انا مذهول مش مصدق اللي حصل و مش مصدق ان العربية موقفتش في مسافة اكتر من 70 متر (فرامل قوية جدا لكن مش ABS ) ببص على الخساير طلعت كالاتي :

1- كبوت معدش نافع
2- رفرف يمين معدش نافع
3- خبطة قوية جدا في القايم اليمين محتاج يتغير
4- لوح ازاز امامي

طبعا الحمدلله انا و اللي معايا في العربية طلعنا بخير مفيش اصابات لكن بطلب من اهل الخبرة يدلوني على احسن واحد اقدر اشتري منه الحاجات ديه استيراد مش تايواني ( في الحرفيين ) بأرخص سعر عشان الاسعار اللي سمعتها عندي هنا خياليه و انا عندي السمكري بتاعي بس محتاج واحد بتاع قطع غيار ذمته نضيفة عشان نخلص و ترجع زيرو ان شاء الله

**aboamina** · 03-06-2013 11:24 PM

الحمد لله على سلامتك وربنا يعوضك خير ان شاء الله...يوم بعد يوم بتأكد من اهمية الabs اللي ناس كتير في مصر بتعامله على انه كماليات

**aboamina** · 03-06-2013 11:27 PM

حمد الله على سلامتك وربنا يعوضك خير ان شاء الله ... يوم بعد يوم بتأكد من اهمية الabs اللي كتير من المصريين بتعتبره من كماليات (للأسف)

**waleedrahmy** · 04-06-2013 12:18 AM

الحمد لله قدر ما شاء فعل
بس
علي مااظن سبب عدم وقف العربية الكاوتش ماسح عند حضرتك

**mhkorayem** · 04-06-2013 12:30 AM

يااااااااااااه 70 متر والعربيه مش عاوزه تقف ليه هو حضرتك كنت ماش على كام؟؟؟؟
عموماً قدر الله وما شاء فعل والحمد لله على سلامتك انت واللي معاك وربنا يسترها معاك

**Optiplex** · 04-06-2013 12:35 AM

المشاركة الأصلية كتبت بواسطة waleedrahmy

الحمد لله قدر ما شاء فعل
بس
علي مااظن سبب عدم وقف العربية الكاوتش ماسح عند حضرتك

1111111111111111111

**ekmarei** · 04-06-2013 01:03 AM

حمد لله على السلامه و فداك العربيه
اكيد كنت على الدائرى

**شاهين - بنز** · 04-06-2013 01:24 AM

المشاركة الأصلية كتبت بواسطة aboamina

حمد الله على سلامتك وربنا يعوضك خير ان شاء الله ... يوم بعد يوم بتأكد من اهمية الabs اللي كتير من المصريين بتعتبره من كماليات (للأسف)

فرامل البومة سيئة جدا جدا جدا سواء كانت ب abs أو من غير وأنا مجربها بالإتنين والجديدة بقى إن بال abs كان أسوء كمان!!
وكل مرة بسوقها ببقى مذهول ومش متخيل إن عربية في الدنيا ممكن تكون فراملها بالسوء ده
وربنا يعوض على صاحب العربية أنا لسه برضه داخل في نص نقل بالجمب بسبب غرزة خدتها وربنا يستر طريقنا جميعا وياريت كلنا نهدى

**Ahmed Amin** · 04-06-2013 01:35 AM

أولا حمدلله علي سلامتك.
ثانيا العيب مش عيب فرامل. العيب عيب الكاوتش.
الي يخليك تسحف ٧٠ متر عال أرض هوا قلة أحتكاك الكاوتش بالارض لانه نشف وعمرة انتهي.
الكاوتش لو جديد اداء الفرامل ممتاز معاه وهيكون مقارب جدا للفرامل ب abs. لو بتضغط جامد عال دواسة من غير ما تعمل locking.

واللي بيقول فرامل البومة وحشة اكيد مش مالك للعربية أو جربها مرة مع واحد صاحبة.
لان العربية فراملها اكتر من ممتازة. وثباتها ممتاز.
وإلا مكنتش حققت النجاح الكبير دا في مصر وفي الدنيا كلها.!!
بس أكيد هوا ركب عربية متهانة وحكم عليها بحكم بناء علي تجربة غلط.!

إن شاء الله الاعضاء يفيدوك باماكن بيع واسعار قطع الغيار.