الموضوع: انطبعاتى عن ورش و محلات قطع غيار فولكس التعاملت معاها

بما انى ركبت عربيتين بورا, و جربت ورش متعددة فى مشاكل متعددة, قلت الخص انطباعاتى عن الورش و محلات قطع الغيار المتعارف عليها لدى مالكى فولكس و سكودا والكان فيه معاملة مباشرة بينى و بينهم:


هانى سمير شارع الأربعين: الأكثر دراية و الأكثر خبرة و الأكثر شهرة, و بينجز و بيجيب اعطال العربية من الأخر, مشكلتو انة علطول زحمة و طبعا صنايعية عادية البتشتغل فى عربيتك و هوا بس بيجى يطل عليها و يحدد العيب لو معقد و طبعا حراق فى اسعار مصنعيته. أنصح بالذهاب اليه لو عندك مشكلة معقدة, او عاوز بديل ارخص نسبيا من التوكيل بكفائة مماثلة تقريبا.


ياسر فى الحرفيين: زمان كان بيدى اداء احسن من دلوقتى فاهم العربيات, بس لو فيه مشكلة مستعصية مش دايما بيوصل للحل, انصح بيه لعمل الصيانات العادية و لكن مؤخرا بدأ يعلى السعر.


ايمن فى منطقة الورش فى زهراء مدينة نصر, ورا سوق السيارات: ده كان شغال مع خالد العاشر و متهيألى استقل عنه, و هوا راجل كبير فى السن ,و اقدر اقول انه الأكثر احتراما من حيث المعاملة و المصنعية و تحس انه بيخاف ربنا, مجربتهوش فى مشكلة مستعصية لأنى عرفته مؤخرا قبل مابيع البورا بشهرين تلاتة, لكن بشكل عام فاهم شغله و ناس شكرت فيه على الموقع هنا قبل كده.


محمد أصلان فى السابع: رحت كشفت عنده على العفشة, حسيتو قلبنى ,كشف على العربية قيادة بس و منزلش بص من تحت حتى, و كمان لقيتو طالب تغيير حاجات كتيرة اوى, حسيتو بينجز و بيفتح شغل و مارتحتش انى اشتغل معاه, و سمعت الشكوى ديه من ناس تانية, بس بشكل عام من الورش الناس تانية كتير شكرت فى ادائهم, انا بس مرتحتلهوش.

سيد جولف جسر السويس قدام السنترال: جربتو مرة واحدة بس, كشف على العربية البورا الأولانية قبل ماشتريها و ادانى تقرير انها تمام, و هيا كانت تمام فعلا بس كانت عاوزة شغل كتير فى العفشة ,المفروض كان يقلى عليه عشان انزل فى سعر العربية, لكن هوا اهتم انها فابريقة بره و جوه و حطها على الجهاز و شكرا على كده. اعتقد هوا اخرو يشتغل فى جولف 3 او على الاقل ديه تجربتى معاه.

فى واحد فى جسر السويس بردو مش فاكر اسمو (بيندهو عليه باسم المانى كده "كاوزك" أو "هاوزر" تقريبا), ده فى شارع ورا سيد جولف: ده الكشف على البورا التانية و انا ببيعها, يعنى العرفنى عليه الراجل المشترى, و رغم انى سمعت انه ابن سيد جولف, بس لقيتو فاهم البورا كويس, و هوا كان يمتلك جولف 4, الحسسنى الاحساس ده, انى كنت حاسس بمشكلتين محدش طلع فيهم عيوب, ان فيه دبدبة بسيطة من قدام, و سحب العربية انا كنت شايف ان لسه فيه احسن, و هوا طبع العيبين دول الأولانى تقريبا انى كنت مغير كاوتش الميزان بأخر مش اصلى و ده المحسسنى بدبدبة, و السحب كانت المشكلة ان طرمبة البنزين مش شغالة بكفائتها. بس عموما مجربتهوش فى شغل, لكن الاشترى عربيتى شغال معاه علطول و بيشكر فيه و الأعرفو ان الواد ده راح فترة المانيا اشتغل فترة فى حاجة تبع فولكس تقريبا و الله اعلم.

و أخيرا أحمد زاهر فى صقر قريش فى المعادى "متخصص فتيس فولكس": بردو مقعدتش معاه غير مرة واحدة, كنت شاكك ان عندى مشكلة فى الفتيس بس هوا طمنى , عموما مفترض انه الأشهر فى صيانة الفتيس و حل مشاكلو, و معظم الورش عارفاه و بينصحوا فيه لو فيه حاجة معقدة فى الفتيس او مشكلة و حسيت من كلامهم عليه ان لو قال على حاجة فى الفتيس يبقى مضبوط و مش هيعدلو عليه.

أنا اعرف ناس تانية و اراء الناس فيهم (الخواجة – سيد عبده – تامر و رشاد - ...), بس انا حكيت على الكان فى تعامل او كلام مباشر ما بينى و ما بينهم.

محلات قطع الغيار الجديدة:

اشرف الشهابى: افضلهم و اضمنهم هو أشرف الشهابى فى دمشق (مرسيدس و فولكس و أودى) قدام بنك عودة تقريبا, حاجته كلها اصلية و أقدر اقول من تجربتى ان جودة قطع غياره هيا الأفضل فى السوق, فاهم العربيات كويس و ممكن يديك نصايه تروح لمين و تعمل ايه, مشكلتو طبعا ان اسعاره حراقة و مبقاش يشتغل فى العربيات القديمة اوى (مش كل حاجات البورا بقيت الاقيها عندو) الأختيار الأول لو ناوى اشترى زيت فتيس و فلتر اصلى للعربية.

الهاشمية سكودا: فى ش الجيش جنب مستشفى القوات الجوية, مفترض بقطع غياره انها أصلية, و لو مش دايما بتكون الأعلى جودة لكن على الأقل مش مضروبة و متوفرة, يعنى زيت الفتيس مثلا تاخدو و انت مطمن , بس مثلا جبت منو مساعدين امامى اصلى بتوع سكودا فعلا, بس معجوبنيش اوى زى مساعدين كنت جايبها من أشرف من كام سنة.

فتح الباب: انا جربت فرع دمشق, بصراحة اتعامل معاه مرتين و كل مرة أندم انى تعاملت معاه ,اولا معاملة معجبتنيش, و تحسهم ممكن يتنكوا عليك و يشتغلوك, و يديك الحاجة و يقولك بتاعتى و فى الأخر ممكن يبيعك عادى, جوده قطع غيالره تعبانة و بردو بينصح بيها, يعنى نصحنى بتيل و طنابير رامسا اسبانى و بصراحة جبتهم استرخاص, لكن فى الأخر التيل كان علطول بيصفر و شاهرين و الطنابير بات بترج. لا انصح بالتعامل معاهم.

واحد مش فاكر اسمو: فيه واحد بيقول انى تبع او قريب الهاشمية بس مش فاكر اسمو اوى, اتعاملت معاه مؤخرا لأنه فى مدينة نصر ورا السلاب, تمشى علطوال و تدخل بعد الجامع شمال, عرفنى عليه ايمن الفى العاشر, و بصراحة لقيت عندو قطع غيار مش اصلية بس جودتها كويسة و بأسعار مناسبة و متساهل يعنى لو مزنوق و فى عيد مثلا ممكن يجى يفتحلك مخصوص.

قطع غيار الاستيراد:

(عموما محلات الاستيراد تتعامل معاها فى حالتين ياما يكون عرفك كويس فمش هيخمك او اعتمادا على الميكانيكى او الورشة البتتعامل معاه على اساس انه هوا اليضمنلك حاجته و يكشفلك عليها قبل ماتخدها و ممكن كمان ترجعهالو لو مكنتش كويسة بعد التركيب, و عموما انصح انك تلف على كذا محل استيراد عشان تعرف رنج الأسعارقبل ماتشترى قطعة غيار لأن اوقات ناس بتضرب اسعار فى العالى اوى)

مجدى بيومى فى الحرفيين: مش كل الناس شكرت فيه, بس هو مصدر هائل لقطع الغيار لموديلات كتير, هو معرفة لواحد صحبى عشان كده بسلك معاه و بيدينى حاجات جودتها و اسعارها كويسة.

الشهابى فى الحرفيين: كنت جبت منه جنوط استيراد حالتها تمام و سعر مناسب و عندو قطع غيار مناسبة للفولكس بس بيحتاج فصال

فيه محل جنب هانى سمير علطول, و هوا اخو هانى سمير للعلم , و لما بكون عند هانى شغال فى قطعة غيار و محتاجها فى السريع كنت بضطر اجبها منو, بس انطبعاتى عنو مش جيدة اوى, حسيتو فاتح بس على سمعة اخوه و على اساس ان اخوه هو الهيشغلو.

كل ما سبق هوا من نتاج تعاملاتى و انطبعاتى الشخصية مع أفراد او ورش او محلات معينة, ممكن تختلف من فرد لأخر, بس انا قلت اوضح بس أو اوجه ناس ممكن يكونو لسه شاريين جديد و ممكن اقصرعليهم لف و مشاوير كتير و شكرا.

المشاركة الأصلية كتبت بواسطة exelence

موضوع ممتاز جدا" و عندى سؤال

لو عاوز اكشف على عربية كشف كويس قبل الشراء يا ترى يبقى انهو واحد فى دول علما" ان العربية فى مدينة نصر و كنت عاوز اعرف كمان التكلفة إن أمكن

بالنسبة للكشف انصح بهانى سمير الخلف حديقة بدر الفى جسر السويس, التكلفة متهيألى فى حدود من 150 ل 200 ج, بس اغلب الظن انها كانت ب 150 ج من سنة تقريبا.