زيت الماتور والسوائل

**ger** · 16-06-2013 01:50 AM

دلوقتى أنا معرفش يا رجالة أى حاجة عن سوائل العربية
عايز اعرف مستوى كل سائل المفروض قد ايه وزيت الماتور المفروض ليه مستوى معين وكميه معينه يتحط بيها

**wassim_nasser** · 16-06-2013 02:40 AM

السوائل كلها هاتلاقيها مستواها مابين max و min و كل فترة تفحصها و تتأكد انها مانقصتش عن ال min .. عندك مياه التبريد هاتلاقيها في قربة كبيرة علي يمين الكبوت من فوق ولونها أخضر أو أحمر .. كذلك زيت الباكم ( الفرامل ) جنبها في قربة بيضا .. أما زيت الباور فا هاتلاقيه في نص الكبوت من قدام جنب القفل .. بالنسبه لزيت الموتور العربية فيها زيت توتال 10000 كم و بتاخد 3.4 لتر للمانيوال

**ahmedjemy** · 16-06-2013 11:20 AM

طيب سؤال لو المية جوة القربة زادت عن ال Max فى مشكلة وياريت لو فى شرح للمشكلة ؟

**wassim_nasser** · 16-06-2013 02:25 PM

بص حضرتك لو هى فوق ال max بحاجة بسيطة والعربية مبطلة أعتقد مفيش مشكلة .. انما لو العربية دايرة أو كنت في مشوار و لقيت المياه فوق max بص علي شرط الحرارة ان لقيتها زايدة يبقى كده فيه شوية هوا دخلوا الرادياتير و قطعوا خيط المياه اللي رايح من القربة للرادياتير وبالتالي الرادياتير رجع مياه للقربة .. هاتبطل العربية و تسيبها تبرد و تفتح القربة الهوا هايطلع و مياه التبريد ترجع للرادياتير تانى وبالتالي ترجع لمستواها الطبيعى في القربة .. وطبعا تجنب نهائيا انك تفتح الرادياتير والعربية سخنة