تغيير تيل الفرامل

**lidosasa** · 17-06-2013 03:35 PM

من كام يوم حسيت إن الفرامل ناعمة خالص ومش زى الأول وزيت الباكم كان فى النص بين علاميتن الماكس والمينى . وأنا شارى العربية مستعملة فمش عارف حاجة عن صيانة الفرامل
ولآن كان عندى مناسبة فقلت أمشى على مهلى لحد ما أخلصها وتمت بحمد الله وقمت نازل يوم السبت على ورشة متخصصة فى تيل الفرامل .
فك يا عم لقيت التيل متآكل وقالى إنه تيل الفبريكة وبما إن العربية عاملة 55000 كيلو يبقى كتر خيره على كده ورحت أشتريت تيل فرامل هوندا سيفيك 82 بيركب على الماروتى ونوع هندى تقريباً إسمه جونيور . وأشتريت زيت باكم بنديكس فرنسى . وغيرت التيل وكله تمام
بس الفنى عمل حاجتين حاسس إنهم مش صح
منزلش كل الزيت نزل حوالى نصه وقام مكمل بالزيت الجديد قولتله نزل الزيت كله وحط الجديد قالى كده أحسن دا زيت الفبريكة ومش بيتعوض ( حاسس إنها إشتغالة وإنه مكسل يفضيه ) بس كنت مستعجل وسكت .
تانى حاجة ملى زيت لحد الأخر خالص وبعد علامة الماكس فلما روحت طبعاً لقيت فيه زيت مدلوق فى حوض العربية .
ربنا يهدى الصنايعية مش بينفع معاهم المعاملة المحترمة بتاعت الأفندية اللى راكبين ملاكى

**dr.hazem** · 17-06-2013 10:33 PM

المشاركة الأصلية كتبت بواسطة lidosasa

من كام يوم حسيت إن الفرامل ناعمة خالص ومش زى الأول وزيت الباكم كان فى النص بين علاميتن الماكس والمينى . وأنا شارى العربية مستعملة فمش عارف حاجة عن صيانة الفرامل
ولآن كان عندى مناسبة فقلت أمشى على مهلى لحد ما أخلصها وتمت بحمد الله وقمت نازل يوم السبت على ورشة متخصصة فى تيل الفرامل .
فك يا عم لقيت التيل متآكل وقالى إنه تيل الفبريكة وبما إن العربية عاملة 55000 كيلو يبقى كتر خيره على كده ورحت أشتريت تيل فرامل هوندا سيفيك 82 بيركب على الماروتى ونوع هندى تقريباً إسمه جونيور . وأشتريت زيت باكم بنديكس فرنسى . وغيرت التيل وكله تمام
بس الفنى عمل حاجتين حاسس إنهم مش صح
منزلش كل الزيت نزل حوالى نصه وقام مكمل بالزيت الجديد قولتله نزل الزيت كله وحط الجديد قالى كده أحسن دا زيت الفبريكة ومش بيتعوض ( حاسس إنها إشتغالة وإنه مكسل يفضيه ) بس كنت مستعجل وسكت .
تانى حاجة ملى زيت لحد الأخر خالص وبعد علامة الماكس فلما روحت طبعاً لقيت فيه زيت مدلوق فى حوض العربية .
ربنا يهدى الصنايعية مش بينفع معاهم المعاملة المحترمة بتاعت الأفندية اللى راكبين ملاكى

الف مبروك التيل...
افتكاسة زيت الفبريكا دي مصيبه...
كنت في توكيل شيري في الاردن وجاي عميل ماتور عربيته قفش على60 ألف كيلو وجاي بيتخانق وبيزعبر وينطر... بيسالوه على تغيير الزيت....
الراجل مشي 60 ألف كيلو على زيت الالف كيلو بتاع التليين!!!!
الحقيقه وقتها احترمت ماتور الشيري ده لدرجة ان الزيت كان فاصل نص فوق زي الميه والنص التحتاني شحم....

قال زيت فبريكا قال....

اهم حاجه الزيت اللي اتدلق في الحوض تكون مسحته كويس جدا لانه بياكل البويه... امسحه وادلق عليه ميه كتير وامسحه....
تحياتي

Sent from my Xperia Arc S using Forum Runner

**Amr Axel** · 18-06-2013 12:00 AM

الف مبروك التيل الجديد

بس طبعا اللي هو عمله غلط جداا لأن كده ممكن الماستر يضرب عندك نتيجة خلط نوعين هو كبر دماغه معرفش ازاي ده متخصص فرامل ده محصلش متخصص مجاري

المفروض انه بينزل كل الزيت القديم و ينضف القربة لو مش نضيفة و يملي من الجديد و ينزل من كل عجلة الزيت لحد ما يشوف الزيت الجديد نازل نضيف و الزيت الجديد مع شخص يتابع اضافة الزيت و بكده هيعمل فلاش للدورة كلها و في نفس الوقت غيرت و استخدمت زيت جديد بدون اي مشاكل و في الاخر يسحب هوا من الدورة احتياطي

لأن زيت الفرامل بيتم تغييره كل سنتين او 40 الف تقريبيا لأنه بيفقد خواصه و بيلم شوائب

اي حد بعد كده يقولك زيت او مية الفبريكة السعه ع قفاه و سيبه و امشي مفيش اي حاجة في السوائل اسمها الفبريكة و لا زيت موتور و لا فتيس و فرامل و لا حتي مية ريداتير كله بيتغير
و زيت الفتيس بيتغير اول مرة ع 10-15 الف و بعد كده ك 20-30 الف ع حسب الزيت
زيت فرامل و مية ريداتير كل سنتين او 40 الف
زيت الموتور طبعا معروف قصته

و الأفضل تروح لأي حد يغيرلك الزيت و ينضف الدورة زي مقولتلك