السيارة السوزوكى سويفت موديل 1993 تعملها كام

**A3SAR** · 19-06-2013 03:03 AM

السلام عليكم
--------
معروض عليا سيارة سوزوكى سويفت 1993 والراجل طالب 23 الف جنيه
بصراحة انا استرخصها جدا رغم ان العربيه من بره شكلها حلو ومعقوله
بس هو السعر كده معقول ولا العربيه دي فيها ان !!
ياريت اعرف الاسعار التقريبيه كام
وشكرا

**وائل شويخ2** · 19-06-2013 04:39 PM

السلام عليكم

متوسط أسعار السويفت

بين 28 ألف ل 33 ألف حسب الحاله

ومش هتفرق بين تقفيل مصرى أوى يابانى المهم الحاله

بص على البارومه فى السقنف والفجاوى

والحاله العامه لصالون وهلى هى راشه دواخل ولا فابريكه

مكيفه ولا لا وظروف مكيفها أيه

التابلوه يكون نضيف وعداداته كلها شغاله

كل حاجه فيها تشيك عليها

__________________________

عموما السعر مش تمام أظن العربيه دى عامله مصيبه ومعجونه فى بعضيها

وبالتوفيق أن شاء الله

**وائل شويخ2** · 19-06-2013 06:21 PM

المشاركة الأصلية كتبت بواسطة a3sar

اشكرك لردك بس فيه ملحوظة يمكن هى السبب انها رخيصه
السياره هاتشباك .. ياترى بتفرق ؟

طبعا تفرق

ألغى كلامى ألى فات بخصو الأسعار

السياره اهاتش باك بيقل سعرها نوعا ما

وبعدين هى داخله مصر معوقين

لأن الموديل ده مدخلش مصر كده طبيعى

**A3SAR** · 20-06-2013 02:20 AM

هي 1300 سي سي .. بس هو قايل ان فيها مشكله في التكييف
المهم ان سيارات المعوقيين دي انا بقلق منها شويه
يعني اتوكل علي الله ولا لا
بصراحه كنت ناوي علي مازدا 323 بعدين لقيت السويفت قولت في بالي موديل احدث وعربيه اكيد انعم وكمان قطع غيارها متوفره ورخيصه ..

ارجو الافاده وهل كلامي صحيح علي قطع غيارها ولا لا وشكرا
وع فكرة شكل الهاتشباك عجبني اكتر من السيدان

**ahmedalaahosny** · 20-06-2013 03:25 AM

صراحة وانا كمان الهاتش احلى خاصة ف التعديل كده يبان عليها لو اكصدامين نضاف على زينون على اسبويلر خفيف كده ولو لونها ابيض او اسود او لون يكون غامق الصراحة بتبقى قشطة بالنسبة للتكيف خد معاك واحد يفحصوا ماعجبكش الموضوع اخصم من تمنها بالنسبة لقطع الغيار هى هى السيدان ماعد الشنطة والفوانيس انما الباقى سيدان وقطع الغيار مرطرطة ف دمياط والحرفيين وهى فعلا شايفها احسن من المازدا 323 وف الشكل كده تحسها عربية مش فرده اديدس مع احترامى لاصحاب المازدا بس يمكن تكون دى كانت موضة ايامها بالنسبة لموضوع معاقين ده مقلق حضرتك ليه هو مش الورق بتاعها سليم ؟ يبقى خلاص على فكرة ساعات المعاقين بتبقى فيها كماليات زيادة عن العادية وبتبقى لقطة بالنسبة لتمن السوق انت بس خد جد يكشفلك عليها كويس وارفعها كده ف بنزينة ولا عند ميكانيكى وافحص اساسياتك بعد الاساسيات عايزه سمكرة اخصم عايزه دوكو اخصم فرش اخصم تكيف اخصم اهم حاجة مافيش بارومة والمكنة هادية وبتدور مع دوسة بنزين خفيفة اهم حاجة حالة المكنة لان السويفت مافيهاش عمرة بتشيل وتحط واحد تانى

**A3SAR** · 21-06-2013 02:43 AM

متشكر اوى يا باشا علي اهتمامك
وربنا ييسرلي الحال والاقي عربيه كويسه وحالتها كويس ان شاء الله
وعلي فكره انا من طنطا مش دياط بس اعتقد ان قطع غيارها متوفره عموما لان فيه عربيات كتير منها علي مستوى الجمهوريه
بس ياتري قطع الغيار الخلفية بتاعتها موجوده زي الفوانيس مثلا والعفشه الخلفيه بتختلف في الهاتشباك ولا لا ..
معلش تقلت عليك في الاسئله بس واضح ان الخبره في الهاتشباك من النوع ده قليل نظرا لانها غير منتشره
اشكرك :)

**ahmedalaahosny** · 22-06-2013 04:09 PM

موجودة استيراد ف الحرافيين واساسا العفشة الكل بينصح بحاجات جديدة لان الاستيراد بتكون حالتها مش 100%

**A3SAR** · 26-06-2013 09:34 AM

اشكرك لردك الوافي
:)

-

الموضوع: السيارة السوزوكى سويفت موديل 1993 تعملها كام

LinkBack

أدوات الموضوع

عرض

السيارة السوزوكى سويفت موديل 1993 تعملها كام - انشر الموضوع فى :

-

-

-

المواضيع المتشابهه

موبينه السوزوكى سويفت

صيانة السوزوكى سويفت

عايزة استفسر عن السوزوكى سويفت

ايه رأيكم فى السوزوكى سويفت الجديدة ؟؟

مانيوال السوزوكى سويفت الجديدة

الكلمات الدلالية لهذا الموضوع

المفضلات

المفضلات

ضوابط المشاركة