الموضوع: تغيير زيت لمرسيدس s63 AMG 2012

موبيل من أسوء الزيوت في مصر,
حطهولي مرة في التوكيل, العربية كان صوتها أعلي وكانت بتسخن عن الطبيعي نزلته وغيرت لشل.
شل كويس جداً مشي عليه بقالي 6 سنين,, وفي فالفولين ناس كتير بتشكر فيه بس لسه مجربتشو.

وكان مكتوب علي منتدي لمرسيدي أنها بتاخد 5w-40

المشاركة الأصلية كتبت بواسطة midofayad

ربنا يخليك يا باشا :)

هى العربية جاية من الامارات واحد صاحبى والده هناك و جابها من هناك زيرو و بعتها و هتقعد 6 شهور و ترجع تانى و مشفتش منهااى واحده فى مصر
ده حتى التوكيل معندوش قطع غيار و بينصب هنا اللى هو فى سموحه لدرجة ان فى الزرار اللى فى الباب اللى بيعدل اوضاع مسند الراس اتخبط و اتكسر و رحنا التوكيل فطبيعى اننا مش عارفين نرفع و ننزل المخدع لان الزرار مكسور ف المهندس بيقولنا لا ده كده الماتور بتاعه كمان باظ و هنحتاج نغيره و عمل فيلم هندى رحت مثبت المسمار و ضغطت عليه اشتغل زى الفل
و كمان فى سينسور بيكون موجود ورا الشبكة الامامية مباشرة عشن يقيس المسافة بينك و بين اللى قدامك و يوقف العربية و فى مسمار فيه وقع و قالنا معندناش المسمار ده لانه مش بينزل فى ال s500 و قال هو كده متثبت لان فى مسمارين تانيين ماسكينه

بس بصراحه احلى حاجة لما واحد معاه s500 كان عايز يشد بيها الساعة 3 الفجر على الكورنيش و مش هقولك غير انه معرفش يشوف ظهر العربية لا فى ملفات و لا فى الطريق العادى لانه كان مفكرها s500 و متعدله من بره و خلاص و مرة تانية مع x6 و طبعا ال x6 مش محتاج اقول كان عامل ازاى

نصيحه مني أخفيها من الشوارع اليومين اللي جايين دوول,
حطها في جراج وغطيها وأتحرك بأي حاجة تانية..

وطبعاً في الصيف متمشيش بيها الصبح أبداً أبداً, ولا علي الكورنيش في الصيف بليل.
لأن العربية دي لو أتحكت أنا هزعل

الزحمة في أسكندرية في الصيف بتبقي زي الزفت,
أنهارده أي حد مش بيعرف يسوق طلع رخصة وجاب عربية أوتوماتيك,
غير الناس اللي بتسوق من غير رخص في كل حتة وهتشوف من دا كتير في أسكندرية في الصيف من المصيفين.

السنسور اللي ورا الشبكة واللي بيراقب المسافة بينك وبين اللي قدامك في حالة الكروز كنترول عشان يظبط السرعة لوحدة, أو عشان يوقف العربية لو حد عدي من قدامها بس دا ينفع في الدول المتقدمة اللي ليها سرعة محددة جوا المدن ومحدش بيعديها,
وطبعاً وأنت بتكون سايب مسافة بينك وبين اللي قدامك وماشي بالسرعة المقررة ودا بيساعد العربية كتير أنها تقف بسرعه ومتخبطش حد.

لكن عندنا الكورنيش يعتبر high way عشان السرعة اللي بنمشي بيها عليها,

وعندنا الناس تفكيرها مختلف, محدش بيعدي الهاي واي علي رجيله برة’ هنا ممكن حد تطلع في دماغة أنو يعدي الكورنيش ف جزء من الثانية, وطبعاً مهما العربية حاولت تقف لو الراجل عدي وهيا علي سرعة عالية برضة العربية هتاخد وقت علي ما تقف.

ولو أعتبرتها obstacle زي ما بيحصل في أي high way برة حاولت تفادية هيبقي عادي لأن لأن كله وماشي في حارته, أما الكورنيش في الغالب بيبقي زحمة وهتلاقي حد علي يمينك وعلي شمالك عن تجربة كذا مرة أحضن اللي جنبيا عشان أفادي حد. وبيبقي مش بأيديك يا هدوس عليه.

غير الناس اللي بتمارس رياضة التنطيط في الشوراع قدام العربيات, والعربيات اللي بتيجي من وراك وتحط بوزها قدامك علي أساس أنك عربية غالية وتقيلة وهتخاف وتخليه يعدي الأول.

عدي ال6 شهور علي خير.
وكويس أنها لحد دلوقتي حاجات بسيطة في العربية, وربنا يستر طريقك وطريقنا.