حد يساعدني .. أجيب سكوتر ولا بايك !!!

**mous6fa** · 29-06-2013 12:53 AM

السلام عليكم ورحمة الله وبركاته
بإختصار كده أنا بعد ما بعت عربيتي حسيت إنى أكتفيت بجد من الزحام وخنقة الزحام وعدم توافر مكان أركن فيه كل يوم عربيتي عشان بنزل بيها الشغل يومياً ... وفوق كل ده أزمة البنزين الطاحنة اللى الحمدلله حصلت بعد ما بعتها
المهم قررت إنى هاخد راحة من عالم السيارات وأركب حاجة عملية وموفرة ف البنزين وتخليني أسلك ف الزحام بتاع القاهرة وكمان أركنها ف أي مكان ..
أنا مشواري اليومي من فيصل لشارع قصر العيني .. يعني حوالي 18 كيلو رايح وزيهم وأنا راجع البيت .. بجانب مشاوير خفيفة فى فيصل والهرم ...
الميزانية مش عاوزها تعدي 7 أو 8 ألاف جنيه .. تفكيري أجيب سكوتر فيدل مثلا .. أو بايك صيني ..
الحيرة بقى إني مش عارف ايه المناسب ليا أكتر !!!! يعني الفيدل هيجري معايا حلو ع الدائري والكباري ولا هيبقى بطة !!! طب البايك الصيني طبعا 200 سي سي هل هحس معاه بفرق كبير ف العزم والتسارع عن الأسكوتر ولا لأ !!!!!
أنا عارف إن الاسكوتر دلوقتي أنتشر وكمان فكرة الناس أتغيرت عنه وبقي حاجة راقية جدااا .. بس أنا مش عشان منظري يبقى حلو ألاقي نفسي مخنوق وانا راكبه وحاسس إنى هوصل شغلي السنة الجاية
هل الاسكوتر أفضل من بايك صيني ولا البايك هتقوم بالمهمة أحسن !!! مع العلم إني ماليش ف سواقة الاتنين .. بس الاسكوتر اللى مشجعني عليه انه اتوماتيك .. إنما البايك مانيوال ..

**Hobgoblin** · 29-06-2013 02:24 AM

Bajaj Boxer 150 cc

**mous6fa** · 29-06-2013 03:09 AM

المشاركة الأصلية كتبت بواسطة GSoleiman

Bajaj Boxer 150 cc

متشكر جداا ع رد حضرتك .. بس بالفعل أنا نسيت أوضح إنى مقصدش بالبايك الصيني اني اركب البايك الدايون والحلاوة والحاجات الشعبي دي .. وحتى موديلات البجاج سواء البوكسر او الديسكفر برضو شعبية اووي .. أنا كنت اقصد بايك ريس صيني .. زي اللى ف الصورة .. والبايك والاسكوتر متقاربين ف السعر وعشان كده مش عارف مين هيستحمل اكتر ويكون مناسب لإستخدامي !!!!

**mous6fa** · 05-07-2013 11:13 PM

انا بحثت ف الموضوع كتير ولقيت إن البايك مش هيكون عملي زي الأسكوتر ...
بالنسبة للأسعار لقيت أن الفيدل بيبدأ من 7600 جنيه دلوقتي .. وطبعا الـ Jet 4 هيزيد عنه وداخل دماغي اكتر .. وكمان البينللي K3 نفس الرينج بتاع الفيدل ...

سؤالي هو الأتي .. لو حابب أوفر وأجيب سكوتر مستعمل .. أيه أقصى عدد من الكيلومترات المقطوعة هيكون مقبول !!! يعني بلاقي سكوترز للبيع عاملة 3000 كيلو و أكتر .. عشان كده حابب أعرف ايه رقم الكيلومترات المقطوعة المقبول اللى يخليني اشتري سكوتر مستعمل وأضمن انه مش هلكان وطالع عينه !!!!!
ولو بفكر فى البينللي او الفيدل مستعمل .. ياترى متوسط سعرهم مستعمل كام !!!!

**حسام ابو كرمة** · 10-07-2013 12:22 PM

[frame="7 80"]بداية انت شكلك بتدور ع الشكل و بالنسبة لك نقطة مهمة و لذلك انت اتجهت للسكوتر الsym و الريس jieda
انت اول حاجة تبص عليها قطع الغيار و ده افضل فى السكوتر الفيدل لانه توكيل حلاوة و عنده قطع الغيار فى محلاته عند شارع شبرا تقريبا و موضوع السحب طبعا فى الريس اقوى لكن انت مشاورك مش بعيد يعنى خلى موضوع السحب ده لما تشوف كل الامور و لو عايز سحب روح بجاج هتعرف معنى السحب بين دول و الصينى كله و البجاج (اوعى تقارن بيبانى)
ربنا يوفقك و يارب الاخوة يفيدوك
[/frame]

**refaat78** · 22-07-2013 05:05 PM

خليك فى الاسكوتر....عملى واوفر واسهل فى السواقه...كفايه انه اوتوماتيك...واولو فى الرينج ده يبقى sym symphony...تقريبا ٩٥٠٠
جنوط ١٦ ..فرامل باكم امامى وخلفى...٢ مساعد خلفى...ده احين موديل فى الsym 150 ccا

**tmedhat** · 28-07-2013 02:40 PM

عملت اية ياترى اشتريت و لا لسة
الاسكوتر افضل شئ فى و سط البلد و فى السريع سرعتة المعقولة 80 كيلو انا شايف انة مناسب جدا
البينيللى ابعد عنا خالص
خليك فى الsym
الفيدل او الجيت 4 او السيمفونى دول تمام و ربنا يوفقك
على فكرة انا معايا اسكوتر هوندا اليت 125 سى سى فقط و بروح بية كل حتة قريب و بعيد

**mous6fa** · 28-07-2013 04:20 PM

المشاركة الأصلية كتبت بواسطة tmedhat

عملت اية ياترى اشتريت و لا لسة
الاسكوتر افضل شئ فى و سط البلد و فى السريع سرعتة المعقولة 80 كيلو انا شايف انة مناسب جدا
البينيللى ابعد عنا خالص
خليك فى الsym
الفيدل او الجيت 4 او السيمفونى دول تمام و ربنا يوفقك
على فكرة انا معايا اسكوتر هوندا اليت 125 سى سى فقط و بروح بية كل حتة قريب و بعيد

والله انا محتار حيرة شديدة جدااااااا ... أدامي إختيارات كتير ومش عارف ايه المناسب والأفضل !!
1- فيسبا صباب سبيدي 150 سي سي جديدة
2- سكوتر فيدل 150 سي سي جديد
3- موتوسيكل باجاج ديسكفر 100 سي سي جديد
4- إختيار كده بفكر فيه من بعيد لبعيد .. وهو ان في سكوتر ماركة (جيدا) 125 سي سي وسعره متهاود جداااااا .. بفكر فيه بس خايف من قطع الغيار

الفيسبا الصباب طلعت ف دماغي لعدة أسباب : رخيصة - متينة و صاج مش فيبر زي الاسكوتر - قطع غيار متوفرة بالعبيط وأسعارها هبلة جدااا - سهولة الصيانة وقلة الأعطال - سهولة إعادة البيع ... بس اللى مضايقني منها اني حاسسها هتكون بطيئة ومش هتنجز ع الطريق وكمان شكلها شعبي شوية

الاسكوتر الفيدل ممتاز ولا غبار عليه .. بس كل قلقي من الفيبر بتاعه مش هيستحمل خبطات او تجريح زي صاج الفيسبا .. يعني شكله هيتبهدل بسرعة

الموتوسيكل الباجاج سعره معقول بس خايف يكون ضعيف أو ميستحملش زي الاسكوتر والفيسبا او يبقى بطىء اكتر منهم
أنا عاوز حاجة كويسة ع الطريق وتستحمل طبيعة الطرق المصرية المهببة والمنيلة بنيلة ورخيصة .. بس مش عاوز أندم وأحس إني إستعجلت فى اختيار غير موفق ... حيراااااااااااااااااااااا ااااااااااااان دلوووووني

**MohssenRashed** · 28-07-2013 04:44 PM

Fiddle 2 طبعا اريح و شيك جدااااااا و قطع غيار متوفره جدا (توكيل SYM هو حلاوه)

بخصوص الفيبر فبيستحمل و اخف من الصاج و لو لا قدر الله حصل حاجة بتروح تستري الجزء اللي اتكسر مرشوش نفس اللون و تركب في 5 دقايق