تغيير وتزييت سلك دبرياج الريجاتا العادية 85 اس

**nicegypt** · 10-07-2013 03:20 AM

السلام عليكم ورحمة الله .
انا عارف ان بقالى فترة معملتش شرح وعشان وعدتكم لازم اوفي .
شرح مصغر عن كيفية تغيير وتركيب سلك الدبرياج . قارئ الموضوع هيستفيد الاتى بأذن الله :

1 - كيفية تركيب او تغيير سلك الدبرياج خصوصا ّ " فى حالة الانقطاع لا قدر الله
2 - كيفية تزييت سلك الدبرياج من اجل تخفيف الدواسة
3 - منع اي اصوات غريبة تصدر من سوستة الدواسة
4 - تعلية او توطية الدبرياج

شكل سلك الدبرياج قبل التركيب :

نبدء بأسم الله .
اولا . العدة المطلوبة :
مفتاح عشرة + بنسة + مزيل الصداء WD40 + فوطة

1 -حط الفوطة تحت الدواسة عشان الزيت مينزلش عليها وبعد كدة رش ع السوستة دي كما ف الصورة
وحرك الدبرياج لفوق وتحت بأيدك او برجلك

الاستفادة : لو عندك اي صوت " زقزقة " او اي صوت غريب هيروح بالاضافة هتحس ان السوستة خفيفة تحت رجلك لان وظيفة السوستة دي انها بتضغط معاك الدبرياج وبالتالى لو السوستة تقيلة مش هتساعدك فالضغط " ملحوظة : السوستة مش بترجع الدواسة لاء دى بتساعدك ف الضغط ع الدبرياج "

2 - لاحظ انا مركب حلقة السلك بتاع الدبرياج ازاي قبل ما نبدء

3 - افتح الكابوت ومفتاح عشرة وابدء فك الصامولة دي بمفتاح عشرة :

قبل الفك اتأكد ان فرامل اليد مشدودة أو حجر العربية واتأكد ان العربية مش هتتحرك منك وانت شغال "

4 - اسحب السلك من الحلقة بتاعتة الموجودة بالفتيس وخلي بالك اوعي تضيع اي وردة او كاوتشة اي بعناية

5 - فى صدر العربية هتلاقي البلاستيكة البيضا الخاصة بالسلك لفها عكس عقارب الساعة " لفها عليك"
كأنك بتفك غطا زجاجة كمثال .. وبعدها شدها لبرة .. لو عصلجت معاك ادخل العربية وشيل الفرش من تحت الدواسات وبمفك عادة واضغط ع الشفة اللى تحت لحد ما يطلع معاك ..

لاحظ الاتي :
غطا جراب سلك الدبرياج الابيض " البلاستيك " فية علامة للتركيب والفك .. بمعنى . لاحظ الدوائر الحمراء
فى الصورة التالية :

الدايرة الاولي دى بتدخل فى فتحة على مقاسها فى صدر العربية
المستطيل اللى بلون احمر دي شفة بتعشق ف صدر العربية عشان تحكمها

5 - بعد ما تلف غطا الجراب الابيض " البلاستيك " هتلاقي الغطا فك معاك .. ادخل جوة العربية واسحب
الحلقة المعدن دي لفوق ثم يسار .. " اسحبها لفوق عشان تطلعها من مكانها "

الدواسة هتبقى ف الارض بالشكل كدة :

كدة مبروك فكيت السلك من العربية .. اقفل الكابوت وروح نام بقى .. وريح دماغك وقضيها مواصلات

يتبع للبوست القادم ...

**nicegypt** · 10-07-2013 05:19 AM

بسم الله وكل رمضان وانتم جميعا بخير .. وادعوا الله ان يتقبل منا صيامنا وقيامنا وصالح اعمالنا اللهم امين .

رايحين تركبوا مواصلات ولا اية لالا خلاص نكمل :) .. دلوقت السلك معاك برة العربية .. او لو كان انقطع هتشتري سلك جديد
اولا : لازم تلاقي كلمة Made in italy محفورة على الغطا البلاستيك او غطا اصفر حوالين سلك الدبرياج دة افضل سلك حتى الان .. تمنة ف حدود 30 ج وهتلاقية عند بعض الناس بـ 20 ج . عشان نضمن بس انك هتركب سلك كويس

تزييت سلك الدبرياج :
1 - فك الصامولة المعدن دي وشد الجراب هيتشد معاك وابدء زيت جراب السلك بالـ WD40

2 - فك كاوتشة التراب اللى تحت عن طريق فك الوردة لبرة وبعدها شد كاوتشة التراب لبرة هتفك معاك بس مش هتطلع من مكانها وابدء زيت السلك بنفس الطريقة

3 - حط قطعة بسيطة من الشحم على السلك من بدايتة من فوق وشد السلك نفسة جوة الجراب وطلعة بحيث ان الزيت والشحم يجري جوا الجراب

4 - ابدء بتركيب سلك الدبرياج " الغطا البلاستيك " فى صدر العربية ولاحظ ان الدائرة الحمرا دي تكون ف الثقب المخصص ليها ف صدر العربية وابدء لف السلك مع عقار الساعة مع الضغط لحد متسمع تكة وتثبت ف مكانها . " ممكن تدخلها كبس بدون متلفها لو حافظ مكان الثقب ومكان المشقبية هتجيبها من اول مرة"

ملحوظة مهمة : لو مركبتش الجزء البلاستيك ف صدر العربية بشكلة الطبيعي هيضرب السلك ف صاج العربية وهيتقطع لذلك عليك التأكد تماما ان الجزء البلاستيك ركب ومش بيتحرك مع حركة السلك " حزكة او هزة بأيدك " للتأكد انة مش بيتحرك ويمكن دة سبب قطع سلك دبرياج كتير من الناس هو التركيب الخطأ لذا وجب التنوية

5 - ارفع الدواسة بأيدك لفوق وابدء ركب طرف السلك ف التيش بتاعة على ان يكون بالطريقة دى تماما

لازم يكون بالعرض زي الصورة مش بالطول لان مسافة سنتى واحدة تفرق كتير ف تقل الدبرياج .. يعنى لو بعد التركيب لا قدر الله لقيت الدبرياج تقيل معاك عن الاول او تقيل بشكل غريب اعرف ان التركيب خطأ وراجع علية

6 - الحمد لله خلصنا الجزء المهم والاصعب اللى جوة العربية .. دلوقت الاسهل ابدء دخل السلك ف مكانة ف الفتيس ثم التيش وربط ورجع كل حاجة مكانها

7 - حاول تظبط فصل الدبرياج ف نص الدواسة .. يعنى تبدء العربية تتحرك ف نص الدواسة دة افضل ليك ف مشوار الدبرياج وبيحافظ على الديسك والاسطوانة .. علماّ ان :

لما تربط الصامولة بتعلي الدبرياج
لما بتفك الصامولة بتوطي الدبرياج

اربط الصامولة للنص وابدء دور العربية وجرب ع الغيار الاول ولازم ميكونش فية حاجة قدامك بمسافة كافية وميكونش على منزل لانك لو ربط جامد ممكن تنط منك فالحرص واجب ممكن تحجر العربية بحيث ان الحجر يكون بعيد عن العجلة بمسافة 15 سم لتجربة الدبرياج بس .. والف مبروك على السلك الجديد :)
متوسط عمر السلك : عام ونصف او 20 الف ك

**ahmed_moeaz** · 10-07-2013 11:56 AM

كل سنة وانت طيب يا باشا ورمضان كريم وجزاك الله خير عن الشغل الجامد ده بجد ، انا سيفت الموضوع عندى بالصور على الموبايل لقدر الله لو حصل حاجة يكون مرجع ليا ، ان شاء الله النهاردة هظبت طقم البدالات ونركب جلب انا من كتر مزهقت من قطع التيش الميكانيكى ربط البلاستيك اللى فى صدر العربية بتاع التيش بمسمارين عشان ميهربش من البلاستيك على الصاج ويقطع اه والله