الموضوع: احمد و سوزى

كل ما ابص ع المياة بتاعة الريداتيور الاقيها ناقصة و العربية بتسخن جامد و القربة بتتملى على اخرها و طبعا المياة جواها بتغلى .

روحت للراجل بتاع الريداتيور قولتله يا عمو يا عمو يا بتاع الريداتور عايزك تفكلى الردياتيور و تبصلى عليه عشان المياة بتنقص على طول .
الراجل قالى فكه 70 جنيه . قولتوا يا عم دوس بس .
الراجل فك الريداتيور و قلبه يمين و شمال و حبة فوق و حبة تحت . الريداتير سليم مفهوش حاجة . طب ايه يا عم الحج ؟
قالى العربية جايبة جوان وش سلندر روح غيره .
حاضر يا عم الحج . كام حسابك ؟ . 70 جنيه .

ادتله ال70 جنيه و مشيت روحت للميكانيكى بتاعى و قولتله يا عمو الميكانيكى يا عمو الميكانيكى ز العربية فيها جوان وش سلندر غيرهولى و اعمل الصح .
قالى طيب انت تروح تجيب جوانين وش سلندر و امبوبة سيليكون عضم .
قولتله طب و عايز اغير سير الكاتينة و البلية !
قالى هات سير كاتينة و بلية .

قومت انا بقى رايح جبت سير كاتينة هندى من مودرن موتورز ب 160 جنيه
و قومت طالع على سوق التوفيقية .
لقيت عندهم سير الكتينة الهندى بردك ب 120 جنيه ^_^

قولت يلا مش مهم .

جبت من سوق التوفيقية بلية كاتينة هندى بـ 125 جنيه
و جوانين وش سلندر الواحد ب50 جنيه يعنى الـ 2 بـ 100 جنيه
و جبت فلتر بنزين هندى بردك بـ 60 جنيه
و فلتر زيت كورى ب 25 جنيه
و مجتش يعنى على طقم تيل فرامل امامى هندى بـ 125 جنيه

كدة فاتورتك كام يا حج ؟
595 جنيه

و انا ماشى قومت معدى على محل زيوت و جبت جركن زيت شل الاصفر بـ 135 جنيه

بقى كدة توتال مشتريات 595 + 135 = 730 جنيه . و محدش لسة حط ايده فى حاجة .

اخدت الحاجة و روحت للميكانيكى . خد يا عم الحج اتشقلب فى العربية براحتك .

الراجل طلع مصارين العربية و قفش فى سجارة الحشيش
قالى الوش لازم يتقشط . خليت عيل من عنده ياخد تاكس و يروح يقشطه و ييجى .
الواد اخده قشطه و كان فى حتت عايزة بنط لحام عشان كانت متاكلة و ظبطه .
حساب القشط باللحامات بالتاكس 70 جنيه .
.. سبته انا و مشيت عشان كونت فيصت خلاص .
جتله تانى يوم كان خلصها . تمام يا اسطة !
قالى تمام و زى الفل و تجيلى كمان اسبوع اظبطلك التاكيات و اقرطلك على الوش يكون ريح .
قولتله اصلى يا كبير كام حسابك ! قالى 150 .
اديته ال150 و راضيت العيال الى شغالين معاه و خدت بعضى و مشيت

تانى يوم جالى مشوار على غفلة الصبح . نزلت دورت العربية دارت . توكلت على الله و مشيت . لقيت العربية بتسخن منى !

ريحت العربية و سبتها تهدى و فتحت لقيتها ناقصة مياة . زودت مياه و قولت مانيش ماشى اما اعرف المياه دى بتروح فين .
بدأت ازود بنزين من الصباع الى فى الكبوت دة . لقيت خرطوم مخروم و الماية طالعة منه بتغلى و ضاربة فى السقف .
بينى و بينكم قلبى ارتاح ^_^
هيييييييح

روحت ركنت العربية و الحمد لله المشوار كان قريب من بيتى و كنت نازل الصبح بدرى فى الطراوة .
و قومت راكب المترو طالع على سوق التوفيقية . روحت عند عادل و مشمش بتوع الخراطيم الى فى مجمع الحاج غريب . و دخلت قولت لعم عادل هاتلى خرطوم زى دة ، كنت انا طبعا فكيت الخرطوم عشان اجيب زيه .
و بما انى عارف ان عم عادل معندوش زيه بس لازم اطلع منه ب اى مصلحة xD
ادانى خرطوم سيفيك و وفقه عليه ^_^
اخدت الخرطوم و مشيت و طبعا مدفعتش فلوس عشان المحل الى قصاده بتاع حاجات ال 28 دة بتاع ابويا و قاعدين فى قرابيز بعض 24 ساعة

بس يا سيدى و قومت رجعت ركبت الخرطوم و تمام التمام .

بعدها بيومين قولت اخرج بقى اشم نفسى . و حظى الاسود وقعنى فى مدينة نصر تزامناً مع مظاهرات الشعرية .
طبعا العربية صوت ماتورها كان بيقولى كلام قبيح و حاجات مترضيش ربنا يا بيه . و فى الاخر عملت معايا الجلاشة و سخنت و حلفت ماهى ماشية . قومت منزل الناس الى معايا ركبتهم تاكس يروحوا و كانت الساعة 12 بالليل


انتظروا الحلقة التانية من يوميات احمد و سوزى بكرة فى نفس المعاد