الموضوع: مهازل فى وحدة مرور طنطا (تجربتى لفحص وتجديد رخصة تسيير الموتوسيكل)

[img3]http://i.imgur.com/SUAgH.png[/img3]





فيديو تفاعلي عن إجراءات التراخيص والمستندات المطلوبة

http://www.youtube.com/watch?v=ZaokO3AfRXI


أولا : الرسوم المطلوبة لفحص وتجديد رخصة الموتوسيكل 3 سنوات
1.5 جنيه رسوم اندفعت فى خزنة نيابة المرور وبعدها اخدت شهادة المخالفات والحمد لله لا يوجد مخالفات
2.1 جنيه أورنيك فحص
188 جنيه بوليصة تأمين لمدة 3 سنوات
164.80 جنيه ضريبة ترخيص للموتوسيكل 3 سنوات + تأمين النمر الجديدة للموتوسيكل
8.5 جنيه طوابع شرطة
1.5 طلب ترخيص وملف ورقى ملهوش اى لازمة
4 صور لبطاقة الرقم القومى الشخصية



ثانيا : قصة المعاناة مع المرور بالتفصيل


كان ليا تجربة ناجحه لنقل ملكية السيارة ووفحصها وتجديد الرخصة فى شهر فبراير الماضى
http://www.nilemotors.net/Nile/338242-a.html

انا كنت رايح مرور طنطا وانا متفائل وقولت احنا فى رمضان وهلاقى الدنيا هادية مفيش زحام وهيبقى فيه رحمه على الاقل بالصائمين .. طلعت بحلم !!



نيجى لقصة المعاناة فى تجديد رخصة الموتوسيكل .. الرخصة انتهت يوم 28-7-2013 وكنت بفكر اسلم النمر وامشى بدون نمر خصوصاً ان كل تحركاتى بالموتوسيكل فى شوارع جانبية وفى أماكن بعيده عن المرور أو اى كمائن للمرور ولكن ضميرى مسمحليش اعمل كده قولت فى بالى ليه امشى وانا خايف ومهدد من اى امين شرطة أو عسكرى ممكن يدينى مخالفة أو يسحب منى الموتوسيكل أو أدفع رشوه علشان امشى حالى... قولت مبدهاش امشى بإحترامك والتزم بالقانون احسن فى زمن الغابة اللى احنا عايشينه
فى الاسبوع الماضى توجهت الى نيابة المرور واستخرجت شهادة مخالفات والحمد لله لا يوجد مخالفات كالعادة لإنى بفضل الله عليا ملتزم وتقريبا الوحيد فى جمهورية مصر العربية اللى رخصه سليمة ومعلق نمر ولابس الخوذه دائماً



فى اليوم التالى توجهت الى مبنى مرور طنطا واخدت اورنيك الفحص وتوجهت الى محطة المرشحة اللى بيعملوا عندها الفحص وتمت اجراءات الفحص بنجاح بس اللى ضيع الوقت انتظار توقيع سعادة الباشا الضابط لإنه تقريبا إتأخر فى السحور ومعرفش يصحى بدرى يومها ... المهم الفحص عدى على خير الحمد لله واليوم ضاع على كده
توجهت الى مبنى المرور لإتمام باقى الإجراءات ودفعت تأمين 3 سنوات وصورت البطاقة 4 صور وتوجهت الى الموظف المدنى العامل فى المرور اللى عنده ملفى يوم الأربعاء 31-7-2013 .. طلع روحى يومها بمعنى الكلمة الموظف الهى ينتقم منه وبعد تعب ساعات طويلة ومماطلة وواقفه قدام معاليه من الساعه 9:30 صباحاً لحد حوالى 1 ظهراً قالى فوت علينا يوم السبت (واضح ان موضه فوت علينا بكره كانت ايام العصر البائد دلوقتى فوت علينا بعد 3 أو 4 ايام وابقى قابلنى ياسيد) اتخانقت معاه وعليت صوتى ورد عليا بعصبية ونرفزه وصوت عالى "المرور مش شغال علشانك انت ولو مش عاجبك روح للعميد " !!!
اشتكيت للرائد المسئول عن الوحدة وبعت معايا كذا واحد ومفيش فايده .... وبعدين اشتكيت لمكتب العميد أحمد زغلول مدير ادارة مرور طنطا بعتوا معايا واحد خلاه يخلصلى الورق ويبعت استمارة للكمبيوتر وبعد انتظار للساعة 2:30 سابوا الناس واقفه وقفلوا غرفة الكمبيوتر ومشيوا وقالوا فوت علينا بكره ياسيد ... حسبنا الله ونعم الوكيل فيهم وفى هذه الوزراة .
أنا مش فاهم إزاى امشى بدون رخصة لمده يوم واتنين وتلاته !!!
روحت لمكتب العميد تانى قالى عادى يابيه انت مش هتطلع تلاقى الكمين فى وشك .. قولتله افرض لاقيته افرض سافرت ... هوه ده القانون !!!

[img3]http://img706.imageshack.us/img706/5571/qk0n.jpg[/img3]

وعلى فكرة حتى الناس المحظوظة اللى استلمت رخصها يوم الثلاثاء الماضى كان فيه عك كتير جدا .... اللى مجدد 3 سنين يلاقيها فى الرخصة سنة واحده ... واخطاء بالجملة فى نوع السيارة وموديل السيارة وكل واحد ماشى بمشكلة شكل
حاجه تنقط بجد
انا حسبنت دلوقتى على وزارة الداخلية بس طبعا التعميم خطأ ودائما بنلاقى ناس محترمة فى كل مكان .. للأمانة الرائد اللى هناك اسمه الرائد محمد كان محترم قوى وابن ناس واتحمل نرفزتى ومشوفتش منه تناكه ولا تشنج زى غيره بالعكس اعتذرلى كمان وبعت معايا واحد للموظف علشان يخلصلى ورقى زى ما قولت ... للأسف العاملين المدنيين هناك هما اللى ما يعلم بيهم الا ربنا .. اشكال عليها الغضب وبياكلوا السحت والرشاوى ... طبعا مدفعتش جنيه رشوه لحد فيهم ومش هدفع حتى ولو هفضل رايح جاى اسبوعين والله العظيم فى شهر 2 اللى فات الأوضاع كانت احسن من كده مليون مره ومكنش فيه الهبل ده كله ....مش عارف ايه اللى جرى !!!

سيبت الخميس قولت علشان الرخصة تخلص براحتها فى الكمبيوتر وكنت متخيل بقى ان اسمى نادوا عليه 50 مرة ولا حاجه يوم الخميس وروحت النهاردة السبت 3-8-2013 الساعة 9:30 صباحاً وقولت اكيد هاخد الرخصة والنمر الجديدة فى اقل من 5 دقائق وامشى ... توجهت لقسم الحاسب الآلى فوجئت ان الاستمارات مركونة من يوم الاربعاء زى ما هيه ومحدش سأل فيها وبعد شد وجذب وكلام كتير وانتظار طويل مرير طلعت الرخصة الساعه 11:30 وقالى روح للموظف تانى علشان بعملك امر تسليم للنمر القديمة وتسلم للنمر الجديدة وتاخد رخصتك وتتوكل على الله .. روحت للموظف فضل يماطل ويزعق ويتخانق ويرمى القلم من ايده ويمشى وسيب الناس وفين بقى بعد ساعه على ما عبرنى وعملى امر تسليم وتسلم فى حته ورقه مأخدتش منه نصف دقيقة ... سلمت النمر القديمة ونزلت استلمت الرخصة واستلمت النمر الجديدة وفوجئت بغلطة فى رقم الشاسية فى الرخصة الجديده !!
رجعت تانى للموظف اللى ما يعلم بيه إلا ربنا وقولتله فيه غلطه فى رقم الشاسيه فضل ينفخ ويتنيل على عينه وبعدين كتبلى ورقة لتوريد 8 جنيه للخزنة لتصحيح رقم الشاسية ... المشكلة مش فى الـ 8 جنيه مع ان ديه غلطته وهوه اللى المفروض يتحملها ويعتذرلى كمان ... المشكلة ان بعد كل المماطلات ديه وتضييع الوقت الخزنة قفلت .. وفوت علينا بكره ياسيد !!!
طلعت تانى لمكتب مدير ادارة المرور العميد احمد زغلول وكتبت شكوى حكيت فيها اللى حصل واتهمت الموظف المذكور ويدعى محمود بتعمد تعطيلى وتضييع وقتى وتعمد كتابة رقم الشاسية خطأ فى استمارة الكمبيوتر يوم الاربعاء الماضى ودبست صورة من الرخصة مع الشكوى وأشر عليها العميد ونزل معايا امين شرطة الى الاستاذ عماد فى المرور فى غرفة فى الدور الأول لعمل تحقيق مع الموظف اللى تسبب فى الخطأ
أول ما نزلت لاقيت الناس اللى تحت فضلوا يتكلموا معايا كتير ويشرحولى صعوبة عملهم وقلة الموظفين والمشاكل اللى بتقابلهم خلونى تعاطفت معاهم وكنت هعيط هههههههههه وقالى انت عاوز ايه ؟ ؟؟؟ قولتله اللى غلط هوه اللى يتحمل غلطه ... الرخصة ديه تتصلح وتجيلى دلوقتى ومش هدفع مليم واحد ... قالى حقك ... هخليه يعملك اللى انت عاوزه



اتصلوا بالموظف الذى يدعى محمود وقاله هات الملف رقم كذا وتعالى حالاً ... وصل الموظف ودخل ... لسه بتكلم ومتوقع منه اعتذار لاقيته زعق وشوح بإيده قولت للأستاذ عماد شايف طريقته ... ده حتى مش هاين عليه يتكلم بطريقة مهذبه ويقدم اعتذار ... خلاص معدش ينفع الحلول الوديه مشى الشكوى رسمى وطز فى 8 جنيه أنا عندى استعداد ادفع 100 جنيه فى الفاكسات والشكاوى بس حقى يجيلى والمخطأ ياخد جزاؤه علشان يتعلم الأدب ولا يكرر اخطاؤه مع غيرى
اتلم عليا موظفين كتير من المرور وفضلوا يتكلموا كتير كطبيعة المصريين من عينه معلش بقى ... وانت هتستفاد ايه لما يتحول للتحقيق وياخد جزاء ... هوه مغلطش فى البخارى .. ومش هوه المخطئ وكده هيبقى كبش فداء والكلام ده اللى لا يودى ولا يجيب
اتعملت مذكرة تانية وادبست فى الشكوى بتاعتى وقالى بكره هيتعمل التحقيق واما نشوف

5 أيام فى اجراءات تجديد الرخصة وفى الآخر تطلع غلط كمان... الكلام ده يرضى ربنا !!!

طبعا أحنا بنعيش أزهى عصور الحكومة الإلكترونية ومبنى المرور مليان شعارات جميلة بتاعت وزراة الداخلية

[img3]http://img809.imageshack.us/img809/6872/aprw.jpg[/img3]

[img3]http://img20.imageshack.us/img20/1416/4teu.jpg[/img3]

أوعى حد يشوف التكييف فى الصور ويفكر ان الأجهزة ديه شغاله ... ديه بايظة من سنين ومحدش بيسأل فيها إحنا متكييفين خلقه

ده فيديو انا سجلته النهاردة بيوضح الأوضاع الكارثية وطريقة التعامل مع المواطنين فى مرور الغربية

‫مهازل فى مرور الغربية طنطا 3-8-2013‬‎ - YouTube

وعلشان تهدوا اعصابكم اتفرجوا على خدمات الحكومات الإلكترونية اللى بجد
فى دول مجاورة كنا بنتعالى عليهم ونقول احنا حضارة 7000 سنة
وبلدنا أم الدنيا

الحكومة فى خدمة الشعب
‫خواطر 7 - الحلقة 14 - الحكومة في خدمة الشعب‬‎ - YouTube

‫خواطر 6 - الحلقة 24 - الحكومة في خدمة الشعب‬‎ - YouTube

التكنولوجيا فى خدمة الشعب
‫خواطر 7 - الحلقة 16 - التكنولوجيا في خدمة الشعب‬‎ - YouTube

تحذير : أوعى حد يجيله ضغط أو سكر أو شلل ... ضعاف القلوب واللى عندهم أمراض مزمنة بلاش يتفرجوا
لسه طبعا القصة مخلصتش ... انتظروا الحلقة الثانية قريبا فى هذا الموضوع