هى السيينا وحشة يا جماعة؟

**Mohamed_Hamid** · 05-08-2013 07:39 PM

السلام عليكم ورحمة الله وبركاته
كل عام وانتم بخير

هو ليه دائما كل الاختيارات فى حدود ال40000 الى 50000 بتكون خالية من السيينا؟ مع انها عربية اوروبية وتبع ماركة فيات العريقة ! بلاقى كل الكلام على الفيرنا والاكسنت الشكل القديم واللانوس وحاجات تانية مع تجاهل للسيينا ولو حد حطها فى مقارنة او كاختيار الاقى كثير يقولوا لا بلاش.. عايز اعرف ليه عيبها ايه ولو لها عيب معروف له حل فعال ولا اى كلام ؟ ياريت توضيح وملاك السيارة يشاركونا لأنى عايز اشترى ان شاء الله ومحتار جدا...

شكرا لكم

**Gelgel2004** · 05-08-2013 09:14 PM

العربيه ممتازه و ناعمة و عالية
ال 1400 مصيانتها متازه و اعتماديه جدا اما ال 1600 لو متهانة بتبقى مكلفه جدا فى الصيانة

معايا ال 1400 و الحمد لله مريحانى جدا ...

**Mohamed_Hamid** · 06-08-2013 10:43 AM

المشاركة الأصلية كتبت بواسطة gelgel2004

العربيه ممتازه و ناعمة و عالية
ال 1400 مصيانتها متازه و اعتماديه جدا اما ال 1600 لو متهانة بتبقى مكلفه جدا فى الصيانة

معايا ال 1400 و الحمد لله مريحانى جدا ...

ربنا يبارك. طيب ال1400 سحبها عامل ايه مع التكييف؟ وقطع الغيار اسعارها عاملة ايه ومتوفرة ؟

المشاركة الأصلية كتبت بواسطة ahmedalaahosny

هى المشكلة انها تقييلة شوية ف البيع ومش اى حد بيفهم فيها لكن الاكسنت واللانوس والجوليت والحاجات دى بياعه وكل الناس بتفهم فيهم

مش مهم اعادة البيع انا مش بتاع تغيير كل شوية المهم الثبات وقلة المشاكل

**ahmedteam** · 06-08-2013 12:57 PM

فى صنايعيه كتيييير (ميكانيكيه و كهربائيه) بيرفضوا يشتغلو فيها و شفت ده قدامى علشان كده سمعتها مش قد كده

**Mohamed_Hamid** · 06-08-2013 11:24 PM

شكرا ياباشا على الافادة

**Ahmed_m7md_A5** · 08-08-2013 06:46 PM

انا معايا السيينا 1400 عربية سواقتها متعة لان كل مشاويرى وسط البلد و الزحمة فسهل تتحرك بيها و تركن و و و و

بس ناوى اغيرها لسبببن 1- شكلها التصميمي الخارجى وحش
2- لما نحمل ناس كتير فى الكنبة الخلفية بتنزل و ده مش حلو على مطبات مصرنا الحبيبية اسف انا اقصد الجبال اللى على الطريق

بس عامة انا كذا مره اطير من على المطب و العربية محصلهاش حاجة ( طبعا بتخبط ) بس احتمال مستقبلا ياثر على الشكمان ( بقالها معايا 9شهور)

حاجة تانية لازم تعرف اسعار قطع الغيار عشان التوكيل مثلا المرايا الواحدة اعتقد 600 ج و طرمبه الباور ب1000ج بس فى صينى و برازيلى و تركى ومصرى عشان كلهم كانوا بيصنعوها بس خلى بالك فى تجار يجيبوا البرازيلى ويقولك 2500 طرمبة الباور

استهلاك البنزين فى السفر و لا حاجة ههههه عمى راح بيها من اسيوط لمطروح بالتنك 49 لتر و كان بيشغل التكييف على فترات لكن وسط البلد و الزحمة تاكل كتييير تقريبا من غير التكييف 14 لتر = 100 كيلو هو على ما عرفت من مواقع عربية و اجنبية ان استهلاكها العام 7 لتر = 100 كيلو

واسعة و شنطتها كبيرة / عزلها رائع و تكيفها تلاجة

سوقها الاول و جربها تلاقيها حاجة ناعمة كدا ! الفتيس صحيح فيه سوسته للمارش و الخامس يترفع بصباعبن لفوق سنة لما تجرب هتعرف و متخافش مش وحشه القصة دى تعود مش اكتر

رغم ان العربية دى تتفوق على غيرها مع ذلك مش منتشرة كتير عيب التوكيل الحمار اظن

**Ahmed_m7md_A5** · 08-08-2013 06:49 PM

طبعا التكييف بياثر على السحب زى عربيات بالنظام ده

**Mohamed_Hamid** · 09-08-2013 04:15 AM

شكرا يا كدوانى باشا على الافادة وربنا يرزقك بالأحسن منها

**4fun14** · 09-08-2013 01:12 PM

لى صديق معاه سيينا ال 1600 العربيه ممتازه وصاروخ ومش بيشتكى من اسعار قطع الغيار ولا الميكانيكيه ولا اى حاجه..وانا قايله لو حب يبيعها هشتريها منه بدل اللانوس بتاعتى لان بصراحه الفرق كبير