الموضوع: حادثه جامده .. ساعدونى بسرعه ارجوكم ..

حمدا لله علي سلامتك .... ودي أهم حاجه
مع إن الشكل العام يخض لكنها بأمر الله مش صعبه وسمكري محترم حيرجعهالك ولا أكن حاجه حصلت ..... بس كل المشكله في قطع الغيار الداخليه إللي باظت والعفشه وأنا أنصحك تشتريها من التوكيل وتركبها بره علشان العربيه ترجه فابريكه تاني بأمر الله وقدر الله وما شاء فعل وفداك أي حاجه في الدنيا

فين الشباب و الردود .. مساعدتكم صرورية

قدر الله و ما شاء فعل و حمدا لله علي سلامه حضرتك. لو العربيه مأمن عليها يبقي تبلغ التأمين و احتمال تبقي total loss فعلا او حتي لو ما بقتش كده علي الاقل تتصلح في التوكيل اكيد و تتكلف زي ما تتكلف دي مش مشكله حضرتك بقي أما لو مش متأمن عليها فاعتقد انه هيبقي صعب تصليحها كلها في التوكيل لان هيعملولك مقايسه برقم وهمي لما تضيفه علي ثمن العربيه الاصلي بعد كده مع الاعتبار انك لما تيجي تبيع هتقول للي هيشتريها منك علي الحادثه دي فهتلاقي الخساره كبيره و الخلاصه لو في تأمين يبقي اعمل كل حاجه في التوكيل أما لو مفيش يبقي تجيب و تعمل في التوكيل الحاجات اللي محتاجه فن زي موضوع الايرباج ده لانه محتاج يتعمل هناك و لو في حاجه في العفشه هات قطع الغيار من التوكيل و ركبها بره أما بالنسبه للصاج فده تجيبه استيراد و السمكره و الرش برضه تعملهم بره و ده هيكون اسرع و ارخص من داخل التوكيل و لو صنايعيه شاطرين ان شاء الله يعملوها كويس.

شكرا لكل الردود ربنا يبارك فيكم.. اليوم بس عرفت اخد العربيه و اروح التوكيل .. اللي فهمته من قبل ما انزل العربيه ان المقايسه ب 1100 جنيه و التكلفه فعلا جايز توصل ل 30000 جنيه ..

انا مش مأمن و الحقيقه اتفاجات.. طلعت علي الحرفيين بس كل صنايعي يقولي حاجه شكل .. واحد يقولي دي الخبطه واصله الشاسيه و التاني يقولي لا في لوحه ف حته صغيره و الشاسيه تمام

انامش بفهم في الكلام دا خالص .. و التكاليف كل واحد بيقولي حاجه شكل واحد منهم قالي كله علي بعضه ها ادخل في 20 الف .. ما صدقتهمش و ما عنديش خبره نهائى ...

اضطريت اني ارجع بيها التوكيل تاني عشان اعمل المقايسه ويقولي كل حاجه بالضبط عشان ماحدش يضحك عليا من الصنايعينه..

المساعده الضروريه جدا جدا منكم دلوقتي تدلوني علي ناس ثقه في الحرفيين خصوصا السمكره..
وهل لو وديتها لمركز خدمه معتمد ها يكون حل كويس ولا تضييع وقت و فلوس ..

مساعدتكم ضروريه و ربنا يبارك فيكم كلكم ....