الموضوع: رولمان بلي سبارك

بسم الله الرحمن الرحيم
السلام عليكم و كل سنة و انتم طيبين و تحية مني للمنتدى و لأهل المنتدى الكرام
أولا شهادة حق :
بصراحة رأيي أن العربية دي أنسب عربية داخل المدينة و خاصة القاهرة بزحمتها و طبعا كل اللي في القاهرة بيقضي نص يومه تقريبا في العربية... هي بس ناقصها حمام و تبقى 100 100
و طبعا مش حتكلم عن استهلاك البنزين ما شاء الله و لكن لازم يكون ضغط العجلات مظبوط لأن الاستهلاك بيزيد لو العجل مريح...

ثانيا استفسار بقى بخصوص مشكلة قابلتني:

من حوالي 8 شهور أخدت أسرتي الكريمة و سيارتنا السبارك الحبيبة (موديل 2008 و ماشية 50000 كم )مشوار صغير لحد شرم الشيخ مع الشنط و الذي منه و الحمد لله كنت ماشي بمتوسط سرعه 110 - 120 و مشغلين التكييف و العربية موجبة معانا أحلى واجب و حتى موقفناش نسريح في الطريق... من الاخر اختبار في قوة التحمل و اجتازته بامتياز و كذلك الرجوع..
و لكن لما رجعت لاحظت صوت خشن في العجل و لما رحت مركز اوتوماستر في الحي السادس قالولي دا الرولمان بلي محتاج تغيير و ده عمرة الافتراضي، مكدبتش خبر و قلت غير يا عم و ماله و ده طبعا بجانب صيانة ال50000
المهم من شهر كده عدنا الكرة من تاني و ضربنا نفس المشوار... و لتاني مرة تثبت السبارك كفاءة و تروح و ترجع بكفاءة و كله تمام، ماعدا ان نفس الصوت بدأ يظهر تاني !!!
و لسه هروح أشوف ايه الموضوع و لكن حبيت أسأل أهل الخبرة هل رولمان بلي السبارك ضعيف أو فيه مشكلة في المشاوير الجامده ؟؟

كنت بروح اوتو ماستر في الحي السادس - مدينة نصر و ده مركز خدمة معتمد ، هم كويسين و شغلهم نضيف لكن اسعارهم غالية شوية ، فبقيت بروح لو فيه حاجة تستاهل و باقي الصيانة الخفيفة بعملها برة عند الميكانيكي أو البنزينة زي ما حصل في قصة الرولمان بلي...
ملحوظة : انا عربيتي سبارك عادية مش نيو سبارك