ارجوكم نصيحة لوجة الله

**drramy** · 31-08-2013 02:14 AM

انا عاندى مشكلة كبيرة وعايزكم تنصحونى
انا كان معايا عربية نوبيرا مو 99 وكانت جميلة ومريحانى لحد ما اتخبط فى نافوخى وقررت اشترى اوكتفيا وطبعا علشان انا معرفش حاجة عن العربية دى لبست فى عربية اوكتفيا مو2003 اتوماتيك ومن ساعة ما جبتها وهى مطلعة عينى مرة الفتيس يحصل فى مشكلة ومرة التكيف يحصل فية مشكلة الى ان حصلت المشكلة الاخيرة عاندى وهى ان العربية بتسخن والمية بتغلى فى الاربة وهوب جوان ونش سلندر ضرب نجى نحل المكنة القى البلوك مدمر من الماية العادية اللى كانت بتتحط فية وجميع مجارى المياة متاكلة وعايزة تغير بلوك طبعا سالت علية قالو هيعمل 4000الف دة غير الممصنعية والجونات والبوجهات يعنى ممكن تخش فى 6000 الف الراجل قالى انا ممكن اظبطهولك كدة بس المكنة هتاكل مياة قولتلة ماشى ياعم قفل وظبط
المشكلة العربية دى بقلها معايا وكملتش 6شهور وصرفت عليها حوالى 13000 الف جنية وانا طبعا راجل موظف والعربية دى خربت بيتى تنصحونى ابيع العربية دى واللا اصلحها مع العلم هيبقى انا كدة صرفت عليها 19000 الف من لحم الحى وهل لو غيرت البلوك دة العربية هترجع كويسة ومش هتفتح واللا بردو كل شوية هتعوز حاجة وقطع غيارها غالية قوى عليا
ارجو منكم النصيحة

**inspiron** · 31-08-2013 02:21 AM

حضرتك لم تُوفق في الكشف علي العربية دي قبل ما تشتريها..ونتيجة لكده ظهرتلك العواقب الوخيمة دي..شوف حضرتك..معني إنك تصرف 19000 جنيه علي العربية وبعدين تبيعها..يبقي انت بتجري ورا الخسارة.لأن عمر المشتري ما هيعملك حساب المصاريف دي.وهيشتري بسعر السوق.
رأيي الشخصي حضرتك تستعين بالله كده وتظبطها وتركبها وتفرح بيها.والأوكتافيا من العربيات اللي المصروف بيبان عليها.يعني متقلقش..بشرط إختيار الصنايعي اللي هيشتغل فيها بتأني.
وربنا يعوض عليك في الفلوس ( هي وسيلة ليست غاية )
ويوفقك لما فيه الخير.
تحياتي

**inspiron** · 31-08-2013 02:31 AM

أحمد زاهر شخصية مش كويسة !!!!! غريبة

عامةً في واحد تاني ممتاز إسمه رامي شعبان في العمرانية ناحية خاتم المرسلين كده..وده واد جدع ونظيف في شغله جداً ومش مفتري.

**wahba87** · 31-08-2013 03:29 AM

انا ليه تجارب مع عربية مستعملة قبل كدة , و الدرس اللى اتعلمته و انصحك بيه انك تتخلص منها فورا

المفروض أول ما كنت اكتشفت ان فيها مشكلة فى الفتيس كنت قلبتها بصراحة

**drramy** · 31-08-2013 03:37 AM

المشاركة الأصلية كتبت بواسطة wahba87

انا ليه تجارب مع عربية مستعملة قبل كدة , و الدرس اللى اتعلمته و انصحك بيه انك تتخلص منها فورا

المفروض أول ما كنت اكتشفت ان فيها مشكلة فى الفتيس كنت قلبتها بصراحة

يارتنى كنت عملت كدة من سعتها

**drramy** · 31-08-2013 03:41 AM

المشاركة الأصلية كتبت بواسطة wahba87

انا ليه تجارب مع عربية مستعملة قبل كدة , و الدرس اللى اتعلمته و انصحك بيه انك تتخلص منها فورا

المفروض أول ما كنت اكتشفت ان فيها مشكلة فى الفتيس كنت قلبتها بصراحة

يارتنى كنت عملت كدة من زمان بس انا كنت كل ما حاجة تبوظ اقول اصلحها وهتبقى كويسة لحد ما وصل انى صرفت عليها 13000 فى اقل من 6 شهور

**Khaled Lanos** · 31-08-2013 04:18 AM

ربنا يعينك في على المصاريف دي كلها..طالما النوبيرا كانت مريحاك بعتها ليه؟

بص ياباشا انصحك وعن تجربة اتخلص من العربية دي وربنا يعوض عليك في الفلوس اللي صرفتها..وإلا هتفضل تصرف تصرف وهتلاقي نفسك صرفت عليها يجي نص تمنها ومش هتتظبط زي الأول..بيعها وشوف حاجة اختها نضيفة..أو خليك في الكوري طالما مش هتقدر على مصاريف الإسكودا.

**Moratoz** · 31-08-2013 06:44 AM

بغض النظر عن حاله العربيه حضرتك خلاص قرفت وقفلت من العربيه دي الافضل تبيعها وتشوف كوري ما دام كنت حضرتك مستريح فيه وحاول تكشف كويس علي العربيه الجديدة ان شاء الله وربنا يعوض عليك المصاريف