الموضوع: أريد تركيب تكييف لادا 2017

بص هو حضرتك انا هحاول افيدك بقدر المستطاع

حضرتك اي تكيف في اي عربية بيبقي ممتاز بس بيفرق من عربية لعربية فكذا نقطة

اولهم العزل حضرتك لازم تكون العربية معزولة كويس عشان التبريد مايروحش علي الفاضي

حضرتك متورك 1600 يعني يشيل ويستحمل الا خلي عربيات 1100 وفيها تكيف وزي الفل

هيأثر علي السحب ! اكيد هيأثر لان اساسا المكنه خشنه ومش سحيبة (من وجهة نظري)

بس اكيد يعني حضرتك مش هتشغل التكيف وتقضيها غرز ولا سباق مثلا

وبردو يفضل عموما انك وانت مشغل التكيف ماتقرص فالعربية يعني ولا تمشي علي مهلك خالص ولا تقرص المعقول حلو بردو

التكلفة من 2500 ل 3200 تقريبا وقابلة للزياده

التكيف اللي هيركبلك نوعه ساندن ياباني

طبعا انا حاسبلك التكلفة بالعزل لان دي اول خطوة لازم تعملها تروح عند سروجي نضيف يعزل الكبود و تحت التبلوه كويس جدا وياسلام لو افرش الببان وياسلام لو اخد الارضية معاك ويراجعلك علي كوتشات الببان

وتشوف كهربائي متخصص وعمل الموضوع ده في اكتر من لادا وتسأل واحد واتنين وتلاته لحد ماتشوف افضل مكان وافضل سعر

وحضرتك لو دخلة علي الفيس بوك وكتبت تكيف ساندن هتلاقي بيج بتاع شركة بتركب التكيفات هتكلمهم وتستفر عن كل حاجه وتاخد فكره بردو


ناس كتير مركبة التكيف في الادا وعاجبها جدا واكيد مش هيبقي زي اليباني بس علي الاقل هيريحك من نار جهنم اللي بتبقي في الظهر

يارب اكون افدك ومتنسناش لو تميت الموضوع تعملنا تقرير صغير وتقيم للتكيف وربنا يكفيك شرها

لا لا التكيف بالتركيب في حدود 2500 والالف التانية عشان العزل وعشان لو في حاجه طلعت فالنص تبقي عامل حسابها

التكييف في حد ذاته ممتاز .. بس العربية مش مجهزة للتكييف ... هتحتاج تصرف عليها كتير ... عزل الكابينة كاملا من التابلوه و الأرضية والأبواب و السقف ... و كمان ممكن تيجي على نفسك وتصرف تعزل الزجاج بالعازل الحراري ممتاز جدا و لو كل العوازل الي سبق ذكرها خفف الحرارة 50% الـ 50% الثانيين هيكونوا بسبب العزل الحراري للزجاج ... انت بتتكلم في ميزانية حوالي 1500-2500 على حسب أنواع العزل والصنايعية لكل ما سبق
اما التكييف نفسه فـ دي أسهل حاجة تركيبة سهل أساسا و تكلفته حوالي 2500 ... ما انصحكش تسترخص في العزل بأي حال لأنك لما هتسترخص في العزل هتضطر تشغل التكييف على أقصى قوته ومش هيدي نتيجة و هيهلك الموتور و هيتهلك ذات نفسه من الضغط المستمر و برضه بدون نتيجة حقيقية ... يعني رأيي ممكن تدفع 3000 جنيه ويكون عندك تكييف ما يسواش 500 جنيه و ممكن تزول ألف او اثنين و يكون عندك تكييف محترم انت وميزانيتك و ظروفك شوف كده والله الموفق :)

المشاركة الأصلية كتبت بواسطة saddam

طبعا التكييف خارج التوكيل أفضل ﻷن تكييف ال لادا اﻷصلي سوبر فاشل وبره بيوفقولك حاجات ياباني وجديد عدا الكباس مستورد نظيف والتكييف المحترم يكلف 3200 أمامي و5200 تكييف أمامي وخلفي أما العوازل فتجيب العوازل من السبتية بحوالي 300 جنيه وأي سروجي بيحترم نفسه تديله 200 جنيه حيعزل لك العربية ودمتم للنضال
ملحوظة راديتر اللادا فاشل حتحتاج تكبره وحتركب مروحة إضافي على ثرموستات 72 إلى 82 وتوكل على الله بالتكييف نفسيتك حتتحسن

....كلام محترم ومن الاخر