عملت حادثة وربنا نجانى " نصيحه لكل واحد مش حاسس بأهمية حزام الامان

**medo2_0** · 05-09-2013 04:46 PM

[OVERLINE]كنت رايح كفر الدوار على الطريق الزراعى وقبل مدخل كفر الدوار فيه فتحه اهالى البلد عاملينها عشان توصل بين قريتين والعربيات بتقطع الطريق فيها... المهم انا كنت ماشى على اليمين وقربت من التقاطع وانا عارف ان ده تقاطع المووت والمفروض بهدى عنده دايما عشان الحوادث اللى بتحصل فيه انا ماشى على اليمين والتقاطع فى الشامل وفيه عربيه ميكروباص قاطعة نص الطريق وسايبه الحاره اليمين العربيات تعدى منه فانا مرضيتش اهدى عشان عارف ان السواق واقف وبيعديني فقلت اعدى بسرعه عشان يعدى بعدي وفجأ بدون اي مقدمات لقيت عربيه معدية من جنبه بتقطع الطريق وشيطانى ومن بعدها محسيتش بنفسى غير والناس بتطلعنى من العربيه..
والله العظيم انا قبل الحادثه بــ 5 دقائق شئ إلهى الهمنى البس حزام الامان وانا اصلا مش بفكر البسه وفعلاً لبسته ولولا انى كنت لابس حزام الامان كان ميت بجد انا اتكتبلى عمر جديد وربنا نجانى والهمنى بموضوع الحزام قبل الحادثه سبحان الله " نصيحة بجد لو هتمشى خطوتين بالعربيه البس الحزام
اسيبكم مع الصور وصوره توضيحية لكيفية وقوع الحادثه عربيتي تويوتا كورولا
وقدر الله ما شاء فعل...
[/OVERLINE]

**أبو صلاح** · 05-09-2013 04:52 PM

الف الف حمد لله على سلامتك

هي العربية اللي خبطت فيك دي 132 ؟ ولا انا شايف غلط
اصل لو هي انا اكاد اكون مش مصدق انها دخلت في كورولا ودي اضرار الكورولا ؟
الكورولا صراحة انا كنت فاكرها ورق

**medo2_0** · 05-09-2013 04:58 PM

ايوه والله ياباشا انا مش مصدق نفسى برضوا بس الحمد لله والله بس المشكله التوكيل قالى ان تكلفة الاصلاح مش هتقل عن 80 الف جنيه لان الايرباج طالما اتفتح بيتكلف لوحده 40 الف :(

**mashaly** · 05-09-2013 05:00 PM

الف سلامه عليك وقدر الله وماشاء فعل
بصراحه مش عايز اشتم الناس اللي معاها عربيات قديمه وخصوصا التكاسي بيسوقوا عافيه وبيتخانقوا مش بيسوقوا الواحد كل مايطلع بيتخانق ويسب ويلعن على الدخلات اللي بتدخلها الناس عليه لو مخدتش لبالك هتعمل مليون حدثه ربنا ينتقم من كل واحد معاه عربية ولا تروسيكل وبيأذي بيها خلق الله ربنا ينتقم منهم حسبي الله ونعم الوكيل والحمد لله انك سليم

**Haitham Basha** · 05-09-2013 05:12 PM

الف حمد لله على سلامتك يا باشا و الحمد لله قدر الله و ما شاء فعل . ذلك قدر الله أنجاك و نجاك ... فداك العربية كلها و فداك 8.000.000 جنيه مش 80.000 بس ... الحزام الحزام الحزااااااااااااااام يا جماعة ... لللهم قد بلغ اللهم فاشهد ...

**mohamed hussei** · 05-09-2013 05:20 PM

الف سلامة عليك ياباشا ممكن تشوف حاجات استيراد توفر شوية وفداك الفلوس

**أبو صلاح** · 05-09-2013 05:22 PM

المشاركة الأصلية كتبت بواسطة medo2_0

ايوه والله ياباشا انا مش مصدق نفسى برضوا بس الحمد لله والله بس المشكله التوكيل قالى ان تكلفة الاصلاح مش هتقل عن 80 الف جنيه لان الايرباج طالما اتفتح بيتكلف لوحده 40 الف :(

اهم حاجة سلامتك وحياتك دي بفلوس الدنيا

وحاول تشوف بدائل اصلاح خارج التوكيل ده لو مش معاك تأمين شامل على العربية

ربنا يعوضك خير