كلب لعين

**hamaka** · 09-09-2013 12:32 AM

انهارده جيت أطلع بالعربية ، بعد ما دورت بدقيقتين و نقلت الفتيس على ال R و بدأت اتحرك بالعربية عشان أطلع من الركنة يادوب اتحركت 50 سم و سمعت صوت عواء و دبدبة جامدة تحت رجلى ، حسيت ان فى مصيبة تحت طبعاً أكيد كلب قمت واقف على طول و مبطل العربية ، قعد يخبط و يرزع كده لمدة نص دقيقة و بعدين التخبيط وقف و لاقيت البيه طالع من تحت العربية و عمال يتلوى و يتنطط من الوجع ، المهم دورت و مشيت و عينكم ما تشوف الا النور ، عربية تانية ، ترزيع مع كل مطب تقريباً و العربية مع المطبات العالية بتنزل على الأرض تدب جامد ، و احساس هبد فى معظم النقلات خصوصاً النقلة من الأول للتانى اللى كان احساسى بيها بسيط خالص ، و حاجة اخر قرف ، تفتكروا ايه ممكن يكون حصل بسبب المصيبة السودة دى ، و الحمد لله على كل شئ أولاً و أخيراً....

**a7medsh3rawi** · 09-09-2013 12:56 AM

اكشف على الكبالن وجلد المقصات لان عضم الكلب ناشف واحتمال يكون اثر على حاجه منهم

**MuhamedNabil** · 09-09-2013 01:22 AM

Hamaka ازيك و عملت ايه فى امتحناتك !

نصيحة متمشيش بالعربية تانى قبل مترفعها فى اى بنزينة قريبة و بص بصة الاول على اثار الماكن الكان بيخبط فيها اكيد حتلاقى اثر ( ترلب ممسوح , دم كده يعنى).

**hamaka** · 09-09-2013 01:31 AM

المشاركة الأصلية كتبت بواسطة muhamednabil

hamaka ازيك و عملت ايه فى امتحناتك !

نصيحة متمشيش بالعربية تانى قبل مترفعها فى اى بنزينة قريبة و بص بصة الاول على اثار الماكن الكان بيخبط فيها اكيد حتلاقى اثر ( ترلب ممسوح , دم كده يعنى).

الحمد لله يا باشا ، ربنا كرمنا و عدينا ، تسلم يا باشا على السؤال :)

ربنا يسهل هحاول أعدى على أى بنزينة و انا رايح الشغل و أشوف الكلب ده عمل ايه ، تنصح ببنزينة معينة يكون فيها ناس بتفهم ؟؟

**MuhamedNabil** · 09-09-2013 11:25 PM

لا انا قصدى اى بنزينة ترفع فيها العربية و انت تبص عشان تاخد فكرة لو فى اى اضرار وضحة . او تطلع على طول على مركز الحدمة. عشان لو حاجة فى اولها تلحقها قبل متكبر

**hamaka** · 10-09-2013 04:03 PM

أنا روحت فعلاً لعز العرب امبارح ، رفعوا العربية و كان فيه أثار مخالب و خرابيش بس الحمد لله مش أكتر من كده كتأثير الكلب ، بس هما كده كده فكوا العفشة حتة حتة و فحصوها و قالوا هحتاج أبقى أغير المساعدين الأمامى و البطاحتين بتوعهم فى أقرب فرصة ، بالنسبة بقى لظهور الترزيع الزايد بعد اللى حصل ده مش لاقى ليه تفسير و أكيد الكلب مش هو اللى أثر على المساعدين ، موضوع النقلات بتاعة الفتيس على الصبح و انا رايح التوكيل كان تقريباً مش موجود و ده برضه مش فاهم سببه ، عموماً الحمد لله على كل شئ...