هاستلم السانديرو بكره إن شاء الله

**elsheikh2010** · 10-09-2013 09:02 PM

إن شاء الله هاستلم السانديرو بكرة من أباظة أيه الحاجات الي مفروض استلمها مع العربية والحاجات الي مفروض اتمم عليها .؟؟؟؟

**CarMania** · 10-09-2013 10:20 PM

مبدأيا كدا. الف مبروك وربنا يديك خيرها ويكفيك شرها
المفروض انك بتستلم مع العربية طقم العدة واستبن والكتالوج والضمان.
واعتقد انك فى صيانة الالف بتستلم طقم دوسات هدية

والمفروض انك تراجع على الدهان كويس وتشيل اى لزق من على الصاج لانه ممكن يكون مدارى تحتيه خرابيش. والافضل تستلم الصبح عشان الرؤية تكون واضحة.
ادخل عربيتك وتمم على الكهربا (كشافات ـ اشارات ـ ازاز ـ مساحات ـ اضائة داخلية ـ اضاءة طابلوة)
جرب تكييفك واتأكد انه بيسقع و المروحة الداخلية تمام ومش فيه اى اصوات غريبة فيه.
تمم على الكاسيت وخد معاك اكتر من cd من انواع مختلفة وجربهم وكذلك فلاشة. واعتقد ان الكاسيت بيبقى ليه كود بتاخده من الوكيل عشان الملفات الصوتية تشتغل كاملة.
اتاكد من الفرش وان كله تمام ومش فيه تقطيع او حاجة مش مظبوطة
خد وقتك واوعى حاجه توترك واتأكد من كل حاجه براحتك.
خلى مسؤل المعرض يوريك اماكن السوائل واتاكد انها تمام.
وتوكل على الله واتحرك واول ما تتحرك جرب فراملك واتأكد انها بتمسك العجل كله (العربية مش بتحدف مع الفرامل)
وركز مع العربية وانت ماشى وحاول تلاحظ لو فيه اى اصوات غريبة.

وبتتفق مع المعرض عشان يبعت معاك مندوب بورق العربية للمرور عشان الترخيص

**Haitham Basha** · 11-09-2013 12:54 AM

ألف مبروك يا باشا و ربنا يديك خيرها و يكفيك شرها و شر عفاريت الأسفلت ( الميكروباسات و التكاسي ) ... العضو الفاضل CarMania بصراحه كفا و وفا و مش لاقي حاجة تانيه تتقال بعد ما قيل ...

**lada2105** · 11-09-2013 05:03 PM

الف مبروووووك

**S O P H O S** · 26-09-2013 05:52 PM

مبروك يا باشا
وان شاء الله تطمنا

**محمد بلال** · 26-09-2013 07:05 PM

المشاركة الأصلية كتبت بواسطة elsheikh2010

إن شاء الله هاستلم السانديرو بكرة من أباظة أيه الحاجات الي مفروض استلمها مع العربية والحاجات الي مفروض اتمم عليها .؟؟؟؟

الف مبروك لحضرتك
ايه اخبار الاستب واى الاوتوماتيك حتنزل امتى

**egyptiandiver** · 26-09-2013 07:25 PM

الف مبروك وربنا يديك خيرها ويكفيك شرها

**sameh_yassin99** · 02-10-2013 04:45 PM

في البداية لازم أوضح اني اعرف اللوجان مش السانديرو.
لكن أظن الاحتياطات واحدة.

حاول اتأكد من التالي:
- الزجاج و القفل الكهربائي يعمل بكفاءة.
- جهاز التنبيه يعمل (الكلاكس) لأنه غالي نسبيا.
- الكاوتش ليس به شروخ لأنه في بعض الأحيان يشقق اذا تم تخزين السيارة بطريقة سيئة لمدة طويلة في الشمس.