الموضوع: تقرير بالصور عن تظبيط العفشة للماروتى

أصدقائى الأعزاء سكان كوكب سوزوكى
تم بحمد الله تضبيط العفشة ولسه مخلص من نص ساعة وزى ما الأستاذ Amr Axel منسق القسم طلب تقرير مصور فأنا النهاردة حبيت اشارك التقرير ده معاكم بكل التفاصيل المهمة والغير مهمة كمان .
بعد صلاة الظهر توكلت على الله وروحت للعفشجى ومعايا قطع الغيار التالية
عدد 2 كوبلن خارجى سعر الواحد 180 جنيه ودى صور بس للأسف مقدرتش اصور غير العلب الخارجية ونسيت أصور قطع الغيار نفسها قبل التركيب

عدد 2 مساعد خلفى سعرهم مع بعض 190 جنيه

عدد 2 كاوتشة كوبلن وطبعاً معاهم كام أفيز وشوية شحم

عدد 2 جركن زيت فتيس شيل 80w90 سعر اللتر 25 جنيه

وتم تجهيز غرفة العمليات لإجراء الجراحة ودى صورة الحج فتحى وهو بيجهز المريض للعملية

وحتلاحظوا الكاوتش مهوى ودا ليه قصة تم إكتشافها بالمصادفة أثناء تركيب الكاوتش بعد ما خلصنا شغل
وبعدين قام رافع العربية قصدى المريض وهوب

وإبتدا رحلة الفك والتركيب وشيل وحط لحد صلاة العصر قام الحج فتحى غاسل إيده وروحنا نصلى طب العربية يا حج والكاوتش اللى مرمى على الأرض حد يجيى يخده ويمشى . متخفش أقفل العربية وسيبها على الله ونعم بالله . ودينى يا حج فتحى لو حصل حاجة ولا حاجة إتخدت لأعورك
المهم بعد الصلاة إديته المفاتيح وقلت ليه كمل إنت شغل انا حوصل لحد البيت على الرغم إنى مش بحب أسيب العربية مع صنايعيى ولازم أكون قاعد وهو بيشتغل بس أعمل أيه عصافير بطنى صوتت وعملت عصيان مدنى وكان لازم اروح اتغدى
والحمد لله إنى روحت بدور على يوسف إبنى لا حس ولا خبر ومجاش جرى على باب الشقة زى عوايده لما اكون راجع من بره وبما إنى مع يوسف ماشى بعكس المثل الإنجليزى اللى بيقول No news is a good news مع يوسف بقى No news يبقى فيه حاجة حتبوظ

. وقد كان لقيته مطلع شنطة الشغل ومطلع ورق مهم منها وكان لسه بيسمى وبيبدأ مرحلة عصفاير الجنة لكن بفضل الله لحقته قبل ما أشحت على باب السيدة
المهم رجعت تانى وكان الحج فتحى خلص الكبالن وبيركب الفردة اليمين اللى كانت مريحة وببص لقيت فيها مسمار محترم راشق فى الكاوتش لآخره تخيلوا بقى لو الكاوتش مش تيبوبلس كان حصل أيه
طبعاً سيبنا المسمار زى ما هو أهو سادد مكانه لحد ما أخلص اروح أشيله والحم الكاوتش
المهم رفع العربية من ورا عشان يركب المساعدين الخلفى

ربط ظبط كله تمام أطلع معايا نجرب تمام حسابك كام 70 جنيه سلام سلام
طلعت شيلت المسمار ولحمت الفردة ومليتها نتيروجين
ونظراً لتأخر الوقت والإرهاق بالإضافة لنفاذ الرصيد المادى أجلت ظبط الزوايا والترصيص ليوم تانى وأجلت تغيير الزيت لحين ميسرة
العربية طبعاً بقت شبه صفيحة الزبالة قمت طالع على المغلسة أغسل واشطف . بس خلاص