تطبيق الحد الادني للاجور يناير 2014 وما يترتب عليه

**4fun14** · 19-09-2013 09:01 AM

ماتقلقش..لا هيقدروا يعملوا حد اقصى ولا حد ادنى
مش بس عشان مفيش فلوس وكارثيه طبع اوراق نقديه بدون قيمه..
عشان معندناش خبراء اقوياء ف الحكومه دى يديروا القوانين دى بشكل صحيح
انت لما تعمل الحد الادنى للتعينات الحديثه 1200..وانا راجل شغال من 4 سنين مثلا ومرتبى 1200
اكيد مينفعش الكلام ده..لازم اكون اعلى من حديث التخرج بحكم الخبره..والا تزيد الاسعار بسبب الحد الادنى وانا فعليا مزدتش اى حاجه
ولما تزودنى انا كمان اباه 1500,رئيس القسم بتاعى مينفعش يفضل ياخد 1400 زى ماهو وانا اعلى منه..
اذا هتمسك الهرم الوظيفى من اوله لاخره هتعليه
ومع كل سنه مع العلاوة السنويه..هتزيد العلاوة على الزيادات السابق ذكرها كله..
طيب انت بتتكلم فى مليارات طائله
--
ثم عندك مشكله الحد الاقصى اللى هتجبرك تصتدم بالحيتان واللى هيباه فيها نفس المشكله
لما الوزير مرتبه يتقلص مثلا من 100 ويبقه 50 الف
مينفعش مساعد الوزير ياخد زيه..ولا رؤساء مجالس الادارات..ولا المحافظين ..وهكذا
لازم تقلل مرتبات الناس اللى فوق رغم انك بحكم الحد الادنى هتضطر تعليهم
الموضوع مش سهل والمسئولين متفرغين لاحكام الانقلاب ليس الا

**memoo305** · 19-09-2013 10:22 AM

أصلا فكرة الحد الأدني بالنظام إلى قاعدين عمالين يداعبو بية أحلام الغلابة من أول حكومة شرف حتى حكومة الببلاوي فكرة خطاء.
مافيش بلد في العالم فيه أن المواطن بيأخد حد أدنى للأجور كل شهر . ودمتم على كدة.
يعني الموضوع لو أطبق بالشكل ده هيبقى هيشجع الناس أنها ماتستغلش وتأخد فلوس .وده ممكن يجيب أي بلد متقدم وراء . ما بالك بلد أصلا أقتصادة ضايع النتيجة الحتمية هتكون طبع فلوس بكميات كبيرة وبالتالي موجة كبيرة جدا من التضخم والإضمحلال الأقتصادة أكتر ما أحنا.
طيب الناس المتقدميين (الوحشيـــــــن) ما عندهم حد أدنى للأجور وزي الفل ؟ ليه بقى التشأم ده؟
الإجابة:
ياصديقي الحد الأدنى عندهم مرتبط بحاجة أسمها الأجر العادل للساعة . يعني العامل يشتغل ساعة ياخدx وساعتان ياخد 2x و....مش ياخد 1200ج في الشهر (بغض النظر عن العمل)
مش كده وبس .ده كمان أجر الساعة بيتم تحديدة عن طريق نقابة كل مهنة .يعني مش ممكن يكون عامل البناء معدل أجر الساعة عنده زي عامل النسيج زي عامل النظافة....
المنظومة متكاملة والدخول بالفهلوة المصرية لأستخدام شعارات لمجرد تحقيق نشوة لحظية للفقراء ستؤدي حتماً إلى وبال عليهم فيمابعد ....

**Imhotep** · 19-09-2013 10:58 AM

نقطة تحديد الحد الادنى خطوة مهمة بس مش هى كل القصة.... و لا حتى تحديد الحد الاقصى برضه..... دى خطوات مهمة بس لازم يكون معاها خطة متكاملة لاعادة هيكلة القطاع الحكومى ككل و دى قصة كبيرة عايزة سنين

الاثر المباشر لقصة الحد الادنى دى هو طبعا موجة تضخم كبيرة بدأت بالفعل بقالها فترة بس دى برضه بتتدخل فيها عوامل كتير..... السيطرة على التضخم بيقع العبء الكبير فيها على نمط استهلاك الشعب...... لازم الشعب يغير من نمط استهلاكه الشره و يتعود يستغنى عن السلع المبالغ فى تمنها او السلع اللى بيتم الاستهبال فى تسعيرها..... بس للاسف النقطة دى مش فى الثقافة بتاعتنا لسه..... احنا عندنا اللى متأصلة هى ثقافة الشكوى...... الناس تقعد تتكلم بالساعات فى الموبايل عمال على بطال فى كلام فارغ و حوارات معظمها ملوش لازمة و يرجعوا يشتكوا من الفواتير العالية خاصة فى القعدات العائلية و العزومات و الكلام ده و اللى بيبقى الغرض الحقيقى منها هو التباهى بالفشخرة الكدابة...... يعنى من الاخر سلوكياتنا هى اللى ممكن تحد من اثر التضخم و الاستهبال فى تسعير السلع علينا او ممكن تزوده بشكل كبير

قصاد ثقافة الشكوى من المستهلكين توجد ثقافة الربح 400 و 500% من التجار..... و التاجر اللى بيعتبر نفسه بيخسر عمره ما بيخسر من راس المال لكن التاجر بيعتبر نفسه بيخسر لما يقل هامش الربح بتاعه يعنى بدل ما يكسب 500% يكسب 200 ولا 300% يبقى هو كده بيخسر

بره اى سلعة التجار بيتملعنوا فى تسعيرها الناس مبتستناش الحكومة تتدخل لأ الناس عندها من الوعى انها تجيب مناخير اى سلعة الارض بسلاح المقاطعة...... لما ده هيبقى شئ متأصل فى ثقافتنا يبقى التجار تعملنا كمستهلكين اعتبار و متستهبلش فى تسعير السلع..... لكن طبعا الكلام ده مش حاصل و لا هيحصل فى وقت قريب و سلمولى على الكيا كارينز اللى الهاى لاين تمنه وصل 220 الف بزيادة 80 الف جنيه عن الشكل القديم ..... و لولا انها لقت ناس تشتريها بسعر 220 الف ماكانتش استمرت عليه

**JAM** · 19-09-2013 12:32 PM

لازم يتم إقرار التسعيرة الجبرية بتاعة زمان... ساعتها فعلآ زيادة المرتبات دى هيكون ليها فايدة.
بس تعالو هنا..... المخصصات اللى هيتم بيها رفع الحد الأدنى جاية من انهى بند كان تم تخصيصه لحاجة تانية فى الموازنة العامة..؟

**Imhotep** · 19-09-2013 12:40 PM

الحكومة تبدأ حصر المستشارين وتعد اقرارات للرواتب تمهيدا لتطبيق الحد الاقصي للاجور - جريدة البورصة

**3mr Farrag** · 19-09-2013 01:31 PM

الحكومات بتاعتنا فكرها متبلد
و دايما بتفكر في الحلول البتبهدلنا اكثر من انها تنفعنا
مافيش اي فكر اقتصادي في اي حاجه
ومافيش حلول جزريه انها تزود مواردها غير انها تزودها عن طريق الشعب
تزود عليه كهربا ولا بنزين ولا السلع اللي بتزيد سعرها كل يوم عن التاني

يعني علي اقل تقدير لو الحكومه عايزه فعلا تزود دخلها و مش هقول اقتصادها دلوقتي
تهتم شويه بالاراضي الصحراويه القريبه من المدن و تبيع
احنا قاعدين لا يزيد عن حوالي 3% من مساحه مصر
و الناس بتصدق ان الدوله بتنزل اراضي للبيع

مورد ذي ده هيدخل مليارات للبلد مع الاهتمام بمعاير البنا السريع و تقديم الخدمات الضروريه للاراضي من كهربا و مياه و رصف طرق و مواصلات ذي المترو

حاجه ذي ديه هتقلل الازدحام في الشوارع و تزود دخلها مع تحويل بعض الشركات الكبيره و المؤسسات الحكوميه للمدن الجديده او قريبه منها
مع بدء في تطوير المترو بجد
مش بقالهم يجي اكثر من 10 سنين بيقولوا هيطوروا المترو و الكلام الهبل ده

ديه عالم بليده و لا فاهمين في اي حاجه غير يفحتوا الشعب و خلاص
ويشحتوا من الدول شويه ملاليم ولا يجيبوا ولا يودوا

ده بس بند واحد هيفرق فرق شاسع لو اهتموا بيه
وغيروا كتير لو فكروا شويه و اهتموا

الفكره ديه لو اتطبقت صح هتفرق في حاجات كتير جدااااا في البلد و للناس

**amrezzat82** · 19-09-2013 03:48 PM

ايه التخلف ده -- المفروض يحطوا قيود على الأسعار و الربح المبالغ فيه فى كل حاجة .. ده حتى قطر اللى فيها أعلي دخل فرد فى العالم بتعمل كده و اللى مش عجبه بيقفل او يروح في ستين الف داهية
.يخرب بيت التخلف اللى حيكون سبب فى زيادة فى الأسعااااااااار تاني و تالت

**besso33** · 20-09-2013 05:23 PM

اعتقد ان مفيش زيادة ل 1200 جنيه ولا حاجة بدليل انه رحلها لشهر يناير،، دي عملية تسويف مش اكتر علشان الدنيا تهدي لغاية ما يمرروا الدستور الجديد بعد ما مرروا عيشتنا

**S O P H O S** · 20-09-2013 05:42 PM

لا اعتقد ان في زيادة من الاساس
وده هيخش تحت بند
اجمالي الدخل السنوي وبيشمل كل شئ
والله اعلم

**sha2e** · 21-09-2013 01:43 PM

المشاركة الأصلية كتبت بواسطة jam

لازم يتم إقرار التسعيرة الجبرية بتاعة زمان... ساعتها فعلآ زيادة المرتبات دى هيكون ليها فايدة.

سياسة التسعيرة الجبرية اثبتت فشلها من سنين للجوء التجار لخلق سوق موازية "سوق سوداء"
ويتم بعدها تعطيش السوق من السلع من السوق الاساسيه وظهورها بأضعاف ثمنها فى السوق السوداء والتى اثبتت التجربه عدم القدرة على ملاحقتها مهما كانت المحاولات

المشاركة الأصلية كتبت بواسطة imhotep

قصاد ثقافة الشكوى من المستهلكين توجد ثقافة الربح 400 و 500% من التجار..... و التاجر اللى بيعتبر نفسه بيخسر عمره ما بيخسر من راس المال لكن التاجر بيعتبر نفسه بيخسر لما يقل هامش الربح بتاعه يعنى بدل ما يكسب 500% يكسب 200 ولا 300% يبقى هو كده بيخسر

هو ده اساس المشكلة ..
هل في دولة محترمه فى العالم بيكون فيها نسب الربح بالصورة دي ؟؟

المشاركة الأصلية كتبت بواسطة imhotep

بره اى سلعة التجار بيتملعنوا فى تسعيرها الناس مبتستناش الحكومة تتدخل لأ الناس عندها من الوعى انها تجيب مناخير اى سلعة الارض بسلاح المقاطعة...... لما ده هيبقى شئ متأصل فى ثقافتنا يبقى التجار تعملنا كمستهلكين اعتبار و متستهبلش فى تسعير السلع..... لكن طبعا الكلام ده مش حاصل و لا هيحصل فى وقت قريب

فكرة المقاطعه صعبة حاليا لان كل السلع تقريبا الان نسبة الربح فيها فاحش ومفيش بدائل
فاستحالة تقاطع كل المنتجات فى كل المجالات هتعيش ازاي ؟

المشاركة الأصلية كتبت بواسطة amrezzat82

ايه التخلف ده -- المفروض يحطوا قيود على الأسعار و الربح المبالغ فيه فى كل حاجة .. ده حتى قطر اللى فيها أعلي دخل فرد فى العالم بتعمل كده و اللى مش عجبه بيقفل او يروح في ستين الف داهية
.يخرب بيت التخلف اللى حيكون سبب فى زيادة فى الأسعااااااااار تاني و تالت

انا شايف ان ده الحل الوحيد لعلاج التضخم "الغلاء" بمصر
وهو تحديد حد اقصى لهامش الربح لكل من المنتج والتاجر
وبكده هيتم تحجيم التضخم بدون اللجوء الى سياسة التسعير الجبري

الموضوع: تطبيق الحد الادني للاجور يناير 2014 وما يترتب عليه

LinkBack

أدوات الموضوع

عرض

-

-

-

-

المواضيع المتشابهه

شراء سيارة بعرض سعر مختلف واكبر من فاتورة الشراء هل يترتب عليه ضرر للمشترى؟؟

بدء تطبيق قانون الضريبة العقارية يناير المقبل

((( أقيموا عليه الحد مرتين )))

25 يناير - 28 يناير - 11 فبراير هتبقى اعياد ايه السنة الجاية ؟

لكل من تكالبت عليه الهموم وضاقت عليه الدنيا وغلب عليه التشاؤم

الكلمات الدلالية لهذا الموضوع

المفضلات

المفضلات

ضوابط المشاركة