الموضوع: تقييم في السرييع كورولا 2014 :)

الحمدلله ربنا كرمني واشتريت العربيه من حوالي 3 اسابيع من عند سمير ريان
بس الورق اتاخر اسبوعين عقبال ماوصل وروحت عملت مشكله و صوتي علي لحد مالورق جه بعدها بيومين

يادوب لسه مرخص من اسبوعين وسبحان الله مجرد ماركبت النمر بعدها بنص ساعه دخل فيا تاكسي الله يسامحه من ورا الاكصدام خرج من مكانه من الجنباب بس متكسرش ولا المسامير اتكسرت مجرد مادخلته بايدي الكلبسات ركبت مكانها والحمدلله محصلش فيها حاجه جامده اوي طبعا الاكصدام اتجرح وللاسف كنت واقف بالعجلتين اللي ورا علي المطب فالتاكسي خبط في التانك بس الحمدلله جت بسيطه التانك اتحك علي بسيط بس الحمدلله والشكرلله راضي بقضاء الله

المهم شكل العربيه جميل جدا وخصوصا من قدام والداي لايت عامل شغل عالي وناس كتير بتشاورلي اقفله هههه انا برضو من فتره قبل معرفه كنت بعمل كده ههههه

العربيه واسعه جدا جداااااااااااا ماشاء الله انا 190 سم تقريبا بقعد قدام مستريح جدا وارجع اقعد ورا علي نفس الظبطه بقعد ويكون في فرق بين ركبتي والكرسي

وسع كبير علي الفئه ده

الانتيريور خاماته حلوه والبلاستيك ملمسه كويس والنور بتاع التابلوه ازرق نفس نور الراديو

التابلوه طبعا مش بلاستيك هو جلد طري كده انا في الصور كنت شايفه وحش بس لما ركبتها عجبتني بتجمع بين الكلاسيك والحديث

عموما مش هدخل في تفاصيل لكن بوجه عام القعده مريحه وواسعه ووضعية القياده ممتازه

بالنسبه للعزل اديله 9 من 10 كويس جدا

بالنسبه للموتور سحبه ممتاز جدا استهلاك البنزين لسه محسبتوش ولكن السحب مع التكييف ممتاز جدا
والعربيه فيها وضعيه سبورت ليها زرار تدوس عليه تلاقيها اتحولت لوحش ههههه التجاوب بتاع دواسة البنزين بيزيد والباور بيتقل .

العربيه فيها نظام الايكونومي ستاندارد بس لما تدوس جامد بيقفل او لما تدوس زرار السبورت

الموتور صوته مش مسموع جوا العربيه خالص تقريبا لو ماشي هادي لو قرصت شويه تسمعه بس واطي قوي الخلاصه انك متحسش بيه ولا يزعجك

الفتيس استجابته كويسه ومش بيضيع العزم بتاع العربيه عكس بتاع السيراتو لاني مجربه ال 6 سرعات كان بيضيع عزم العربيه شويه لكن الكورولا تحس انه صاحي معاك علطول

لما بجيبه علي وضه التيبترونك بيوريني 7 سرعات انا مش فاهو ازاي مع انه المفروض ان السي في تي مبيبقاش فيها نقلات بس عموما هو 7 نسب اماميه ونقله غير محسوس نهائي ومش بيضيع عزم العربيه تحس العربيه متحفزه مجرد ماتدوس

الباور ناعم وسلس جدا وشكل الدركسيون جميل والباور بيتقل مع السرعات كل ماتزود يتقل اكتر لكن لما تبقي هادي بيكون خفيف جدا وبصراحه ممتاز لانه بيساعد في الزحمه وعلي السرعات يخليك ماسك العربيه

التكييف كويس معلتهوش عن 3 انا من النوع اللي مبجيبهوش علي وشي او جسمي بخليه بعيد بس بيخلي العربيه ساقعه

الفرامل بتاعتها محتاجه تعود لانها قويه قوي وبتمسك بسرعه وتقدر توقف العربيه في اي ظروف لكن في الزحمه بتقططم جامد لو مش متعود عليها ممكن تلبسك في اللي وراك

الثبات بقي ممتاز ماشاء الله حدث ولا حرج انا بركب فنتازيا كتير وعارف معني الثبات
انا وصلت بيها 150 ومعرفتش ازود الطريق قفل عليا 150 كانت ثابته تماما ومفيش اي نوع من القلق او الاهتزاز بالعكس كنت باخد غرز ضيقه وخليت واحد بتاع النترا يتجنن ويجري ورايا بس مجابنيش من الغرز اللي كنت بعملها

الملخص الثبات ممتاز جدا لحد 150 مع الغرز كمان انا مجربتش اكتر من كده بس اعتقد توصل ل 180 مستريح ثبات تقريبا زي الفنتازيا مع الفرق في طعم العربيتين

العفشه طريه بس لما بدخل في عين القطه او في مدقات او حتت مكسره كنت بحس بترزيع جامد وده شيء كان مضايقني جدا بس الناس هنا اقترحت اروح اربط العفشه وفعلا اتحسنت بنسبة 80 في الميه او اكتر تقريبا مبقاش في ترزيع ولما تتربط في صيانة الالف في التوكيل تكون العفشه ريحت اكتر هتبقي كويسه العفشه بوجه عام كويسه جدا لعربيه بالثبات ده

الشنطه واسعه وممكن تتني الكنبه

المرايا الجانيه رؤيتها كويسه بس مش بتجيب النقطه العمياء

العربيه متقفله من تحت كويس جدا التقفيل ممتاز

بالنسبه للارتفاع فانا بالكتير بيكون معايا واحد بس في العربيه يعني حوالي 200 كيلو العربيه معايا مبتحكش مع العلم اني بتعمد اخد المطبات العاليه قوي ومن غير ماقف خالص

العربيه نازل فيها فانوس شبوره خلفيه ستاندرد

وفيها 5 مستويات للنور الامامي تتحكم فيهم من البكره تحت الدركسيون

العداد لحد 240

ونازل فيها TRC و VSC ستاندرد حاولت وانا ماشي علي 120 اشغلهم واخد غرز ع العاصي قوي بس مرضيوش برضو لان العربيه معومتش مني والزرار بتاع الستابيليتي موجود جنب زراير المرايات تشغله او تقفله

العربيه فيها ايموبيلايزر وفيها مفتاح تفتح وتقفل الايرباج التاني

وفيها شيء رخم صوت انذار للحزام تقريبا بيقعد اول 4 دقايق يصفر و كل شويه بيقعد يفتكر ويصفر تاني لما تحط الحزام بيسكت وبيحس لما يكون في حد قاعد جنبك ولازم يحط حزامه
يعني بيقعد يصفر اول 4 ددقايق ويسكت لو حطيت الحزام او لو مش هتحطه هيقعد كل مثلا ربع ساعه يرنلك يفكرك ولو حد جنبك بيحس بيه

باختصار العربيه كويسه اوي وهتعمل مبيعات قويه جدا الموديل ده ممتاز شكلا وموضوعا
واول موديل يكون تويوتا وشكله حلو

اي اسئله انا في الخدمه