عاااجل مطلوب حل لمشكلة تكييف اوكتافيا ٢٠٠٨

**abohalmos** · 20-09-2013 01:33 AM

السلام عليكم جميعا انا من المنضمين الجدد لسكودا اوكتافيا a5 .. موديل ٢٠٠٨
و تم و لله الحمد الكشف علي السيارة في مركز وهدان في ٦ اكتوبر و تحديد طلبات العربية و تم شراء قطع الغيار من الهاشمية في احمد سعيد و تظبيطها عند ميكانيكي معرفة في فيصل ..
و حاليا تبقت مشكلة التكييف في العربية ... التكييف تم تغيير حساس حرارة الجو
و تم التأكد من تشغيله من التابلوه .. و تم شحن الفريون عند احد العاملين بالتوكيل و معاه ورشة في الحرفيين .. و اشتغل الكومبريسور زي الفل .. و الماسورة بتاعته كانت متلجةً..ثم بعدها بقليل فصل الكومبريسور بعد ربع ساعة من عمله .. و تم قياس شحنة الفريون و كانت منقصتش و لاقيت ماسورة الكومبريسور مش باردة .. و قالي المهندس اللي شغال في سكودا انه معني كدة .. انه مفيش تسريب في الدورة و المشكلة في فالف الكومبريسور هو اللي بيعلق و يمنع دخول الفريون للكباس .. فلما سألته عن الحل .. قاللي قدامي ٣ حلول :
١- تركيب كومبريسور و سربنتينة اصلي في التوكيل و باللوازم .. هاتكلف ١٠ الاف جنيه
٢- تركيبهم استيراد بتوع تويوتا و هايكلفوا ١٦٠٠ جنيه . بس هايحتاج قطع في المواتير و تعديلات في العربية و تغيير كتاوت .. بس هايدي اداء كويس
٣- تركيب كومبريسور و سربنتينة ماليزي .. هاتكلف ٤٠٠٠ الاف .. بدون تعديل و التركيب في ثلاث ساعات
ايه رأي خبراء سكودا .. اعمل ايه ؟؟
المفأجاة اننا طول طريق العودة .. التكييف شغاال زي الفل ..و مفصلش خالص رغم تدوير و تبطيل العربية كذا مرة ...
فهل فالف كومبريسور ٢٠٠٨ ممكن تصليحه ؟؟؟ و عند مين ؟؟
برجاء الرد سريعا بالله عليكم

**wawamoha** · 20-09-2013 02:18 AM

باشا و الله اعلم بيعملم عليك شغل ..
الكمبروسور ده عليه كمبيوتر يمكن كان فيه حاجه ناقصه ساعتها ففصل
لانه مش منطقي يشتغل تاني
انا عندي نفس العربيه .. و بوديها عند واحد محترم قوي في الزيتون اسمه الحاج سعيد
بالنسبه ليا كان السربنتينه عليها تراب وورق شجر ..فكان التبريد بتاعها ضعيف فيضطر الكمبروسور العادي انه يضاعف مرات الشغل علشان يكفى ...يقوم الكمبيوتر بتاع الكمبروسور فاتح فالف كده يسرب الفريون علشان الضغط يقل و بكده الكمبروسور مايتحرقش - طبعا لدرجه معينه
ممكن يكون نفس الحاله اللي عندك و الله اعلم

**abohalmos** · 20-09-2013 03:36 AM

المشاركة الأصلية كتبت بواسطة wawamoha

باشا و الله اعلم بيعملم عليك شغل ..
الكمبروسور ده عليه كمبيوتر يمكن كان فيه حاجه ناقصه ساعتها ففصل
لانه مش منطقي يشتغل تاني
انا عندي نفس العربيه .. و بوديها عند واحد محترم قوي في الزيتون اسمه الحاج سعيد
بالنسبه ليا كان السربنتينه عليها تراب وورق شجر ..فكان التبريد بتاعها ضعيف فيضطر الكمبروسور العادي انه يضاعف مرات الشغل علشان يكفى ...يقوم الكمبيوتر بتاع الكمبروسور فاتح فالف كده يسرب الفريون علشان الضغط يقل و بكده الكمبروسور مايتحرقش - طبعا لدرجه معينه
ممكن يكون نفس الحاله اللي عندك و الله اعلم

الف شكر لاهتمامك
الواحد مش عارف يعمل ايه .. لدرجة اني بعد ما روحت البيت نزلت تاني من شوية
و قعدت حوالي ساعة بالعربية الف و ازود و اقلل السرعة و اطفي و اشغل التكييف
و في كل مرة التكييف شغااال زي الفل و تسقيع تلاجة حتي فتحة التكييف الخلفية اللي بتدي هواء لوراء شغالة زي الفل

انا مش فاهم حاجة ؟؟؟؟
انا سمعت عن حد ممتاز اسمه احمد في ارض اللواء
يا تري حد جربه ؟؟ او حد عنده فكرة الواحد المفروض يعمل ايه دلوقتي

**pharaoh8880** · 20-09-2013 04:39 AM

متابع لان عندي نفس المشكلة تقريبا التكييف مشحون و تمام اوقات بيشتغل حلو جدا و بيسقع ممتاز و احيانا بيفصل مع العلم ان معايا فابيا 2001 و الكهربائي اللي رحتله قاللي بلف الكمبروسور دي نفس مشكلة الاوكتافيا a5.

**inspiron** · 20-09-2013 12:56 PM

مطلوب من حضرتك تدور العربية وتشغل التكييف وتظبطه علي درجة 18 وتظبطه علي وضع اوتو وتقفل دايرة الهواء متخليهوش يدخل من برة العربية.ومتتحركش بيها وتسيبها دايرة والتكييف شغال.اعمل كده وقولي ايه الاخبار

**abohalmos** · 20-09-2013 03:19 PM

المشاركة الأصلية كتبت بواسطة inspiron

مطلوب من حضرتك تدور العربية وتشغل التكييف وتظبطه علي درجة 18 وتظبطه علي وضع اوتو وتقفل دايرة الهواء متخليهوش يدخل من برة العربية.ومتتحركش بيها وتسيبها دايرة والتكييف شغال.اعمل كده وقولي ايه الاخبار

يا بوحميد .. انا راكن العربية من ساعتها و عملت اللي قولت عليه و التكييف شغااال كويس ... إيه رايك ؟؟؟

**madridy1001** · 24-10-2013 04:12 AM

لو التكييف شغال وبيجيب سالب يبقا هتعمل زي ما عملت بالظبط ...ومكنتش مصدق والله....هتشتري wd-40 وهترش الاول علي فوطه وتمسح الحساس الي موجود جنب فانوس الشبوره الايمن وانته واقف قصاد عربيتك هتلاقيه لجوه كده ...تمام...تاني حاجه تبقا عربيتك طفيها شايل المفتاح من الكونتاك ...وبايدك تخبط بيها فوق التبلوه خبطه لا هي قويه ولا هي ضعيفه...صدقني ده كان الحل ومن يومها مجبش سالب...وكنت دايخ علي المشكله دي والله...بالتوفيق

**mo7a_mo7a** · 24-10-2013 03:57 PM

ما دام التكييف بيشتغل متقلقش نفسك علي الفاضي
الصنايعية مش حتخلص منهم
خليك زي ما انت وجرب العربية كام يوم وكده كده احنا داخلين علي الشتا ومش حتحتاج التكييف كتير
وان شاء الله تكون سليمة

تحياتي