الموضوع: تقرير وتحليل فيات برافو 2013 (تركيز على المشاكل)

بص حضرتك .. اغلبيه الحاجات اللي حضرتك ذكرتها دي بتبقي بالتعود يعني بعد فتره من الاستخدام بتبرمج نفسك عليها و بتلاقي نفسك اتعودت عليها و بتدوس علي الزراير من غير ما تبص و حتي التكييف برضه بتتأقلم معاه و الفتيس برضه بتظبط سواقتك عليه و لذلك الموضوع ما يقلقش لانه مسأله وقت انما مشكله فيات الحقيقيه هي التوكيل المتعب بتاعها اللي عمري ما شفت حد بيشكر فيه و ده يمكن له تأثير جامد علي مبيعاتها و انتشارها يعني لو كان فاهم في العربيه كويس كان يبقي الحال افضل من كده كتير و كان وصّل الاقتراحات بتاعه المستخدمين لفئات إيطاليا يعني هي عربيه ممتازه و لكن use at your own risk زي ما بيقولوا

المشاركة الأصلية كتبت بواسطة land_cruiser

اغلبيه الحاجات اللي حضرتك ذكرتها دي بتبقي بالتعود يعني بعد فتره من الاستخدام بتبرمج نفسك عليها و بتلاقي نفسك اتعودت عليها

دا حقيقي فعلا بدأت أتعود على الفتيس كويس بس كون انك تشتري عربيه بمبلغ كبير وتبقى شايل هم التعامل مع الفتيس..دا في حد ذاته هاجس كبير
بس اللي مش عارف أتأقلم عليه التكيف ؟؟؟ هتقلم عليه ازاي !!

يا لهووووووووووووووى
يا للهوووووووووووووول
ده أنت بهدلت العربية تماما يا ريس
يعنى كل العربيات الجديدة فيها مشاكل الجولف و الجيتا و الأوكتافيا و الصنى و ال 508 و اللينيا (بالتبعية علشان ال dual logic)
تعيش البوما و الشارك إذا

انا معايا 2009 و بيحصل معايا نفس مشكلة التكييف و كنت فاكره بايظ و الفتيس برضه
بس موضوع الفتيس بيظهر اكتر معايا لو طالع مطلع زى كوبرى اكتوبر كدة و الدنيا واقفة !!
يعنى كل شوية اديها حرق بنزين على الهادى دة بيسخنها اوى
فى واحد قالى فى الزحمة اقلبها مانيوال مش هتعمل معاك كدة !!!!!
السؤال اللى نفسى اسألوا لكل مالكى البرافو .. هو انا لما احب انقل الفتيس من الاتوماتيك للمانيوال (يعنى اديله تكة شمال) لازم و العربية واقفة خالص ولا ممكن و انا ماشى ؟؟
علشان انا سمعت ان لازم تبقى العربية واقفة تماما و تختار قبل ما تتحرك مانيوال ولا اوتوماتيك

المشاركة الأصلية كتبت بواسطة A7mad Tal3at

أنا معايا برافو 2013 - 120 حصان تيربو p6
اشتاريتها في آخر 2012 ب 169 ألف وماشي بيها لغاية دلوقتي 19 ألف كيلو
طبعا العربيه فيها مميزات كتير جدا جدا جدا يمكن أبرزها قوة الموتور والتسارع الممتاز ودا طبعا بفضل التيربو
بس انا عايز اركز على العيوب اللي في وجهة نظري شايفها (فـااااااادحـــه)
أولا: مشكلة الفتيس (طبعا هو فتيس إيزي ترونيك)..من خلال التجربه اتضح ان الفتيس في الزحمه بيعمل مشاكل وليه طريقة تعامل معينه..انا ساكن في 6 اكتوبر والحياه عندي هنا مش زحمه الحمد لله
لكن لما بنزل بالعربيه أي مشوار لوسط البلد أو وقفت في زحمة محور ولا دائري ولا غيره بتطلعلي رساله على الشاشه بتقول Clutch Over Temperature مع اني عارف كويس اوي طريقة التعامل مع الفتيس الإيزي ترونيك وهي اني لو هقف اكتر من خمس ثواني بروح جايب الفتيس على ال n (بمور بمعنى أصح) ومع ذالك بردو الرساله بتظهر
طبعا ظهور الرساله مش معناها ان الفتيس فيه مشكله لأ دا مؤشر لإن الدبرياج قرب يحصله الجلاشه..لما كلمت طوارئ فيات حكيتله على المشكله وانا في الزحمه كان الرد كالآتي (أقف على أي جمب يافندم وسيب العربيه تبرد شويه) 0_0
طيب أقوله إيه طيب !! جايب عربيه ب 170 ألف علشان لما أبقى نازل مشوار زحمه آخد عربية أخويا الأسترا !! ولا عربيه ب 170 ألف علشان أقف على جمب يافندم على مالعربيه تبرد!! حاجه تجنن
ملحوظات:
-الرساله مابتظهرش لحطة وقوفك في الزحمه..لأ يعني بعد 10 دقايق زحمه كده ولا حاجه الرساله تبدأ تظهر
-اللي بيحصل ان الرساله بتظهر وخلاص..يعني وانته في الزحمه مابيحصلش حاجه لأ عادي العربيه ماشيه مافيش مشاكل..بس بيبقى قلبك متقطع وانته مش عارف تعمل ايه للعربيه وللدبرياج اللي بيتحرق
-انا داخل على صيانة ال20 ألف ومتوقع طبعا لما أحكي للتوكيل على الموضوع دا هيقولي أصل انته بتسوق غلط !! ومش بعيد يقولي طقم الدبرياج عندك شكرا محتاج يتغير

موضوع الفتيس ده على حسب استخدامك ليه ! بمعنى ان انا فى الزحمه الشديده زى كوبرى اكتوبر على طول بمور لل N زى مانكون سايق مانوال بالظبط العربيه زى الفل مفيش اى مشاكل ولا اى warning وكمان انا مجرب الزحمه الشديده لحد ساعه و نصف و ولا الهوا انما موضوع ال 5 ثوانى دا انساااااااااااه خالص انا جربتو و الmsg طلعتلى فا متحاولش


نيجي بقى للمشكله الفادحه الثانيه:


التكيييف
التكيف في مشكلتين الأولى عادي ممكن يتغاضى عنها وهي فتحة التهوية الشمال تقريبا كده ملهاش لازمه..توزيع الهوا سيئ جدا..يعني تلاقي وشك نصه اليمين متلج ونصه الشمال بيتحرق :)
المشكله التانيه وهي الأخطر..تيجي تقف بردو في زحمه بعد 10 دقايق او ربع ساعه كده تلاقي التكييف بيطلع هواء مش ساقع اول ما الزحمه تفك والعربيه تجري التكييف يرجع تاني كويس
طبعا ممكن يكون عندي مشكله معينه..بس مشكلة إيه دي اللي تظهر وانا لسه ماكملتش 20 ألف كيلو
يعني بردو جايب عربيه ب 170 ألف علشان لما أبقى رايح مشوار زحمه ومحتاج التكييف أسيب عربيتي وأروح أبلطج على أخويا علشان آخد الأسترا D:
الله يرحم اللانسر البومه (3 سنين فحت في العربيه) ومقالتش بم
واهو اديني مستني معاد صيانة ال 20 أما اشوف التوكيل هيقولي ايه على التكييف


التكييف ياسيدى ك اداء انا اديلو 9 / 10 عشان الفتحه الشمال مش بتوزع الهوا كويس لكن كاداء وبروده و لا اجدع كورولا ! انا كنت راكب كورولا و عارف انا بقول ايه اصلا تكييف البرافو Denso made in jaban
حاول تنظف فلتر التكييف واكشف على موضوع الهوا الساقع و انت واقف !

المشكله الفادحه التالته: (غباء السوفت ويير)
نفسي أروح لفيات في إيطاليا وأقولهم يا جماعه احنا في 2013
نظام الميديا أغبى مايمكن..مقسوم نصين..نص بتاع الراديو والسي دي ونص بتاع البلوتوث وال USB طبعا مفيش aux
النص الأولاني بتتحكم فيه من منطقة السي دي والنص التاني بتتحكم فيه من الطاره (صباح اللبخه)
وعلشان تحط حاجه على الفلاشه أو السي دي لازم تتسحل
يعني لو انته مرقم ال tracks من 1 ل 30 طريقة قرايته بقى بتكون أي حاجه بتبدأ بواحد ليها أولوية يعني يقرأ (1 وبعدين 11 وبعدين 12 وبعدين 13 وهكذا) يدخل بعد كده على 2 وبعدين 21 وبعدين 22 وهكذا
وطبعا علشان فيات لسه عايشين في 1988 السي دي مابيقراش دي في دي عليه داتا :)

المشكله الرابعه هي ان التوكيل مالهوش غير فرعين واحد في جسر السويس وواحد في الضراسه
يعني انته لو بعيد عنه (هتتعب هتتعب هتتعب)
وبمناسبة الكلام عن التوكيل لو سلمت العربيه الساعه 9 الصبح مش هتستلمها غير 4 او 5 يعني لابتوبك معاك وأكلك معاك وعيش يا معلم من الآخر هتقضي اليوم هناك..مش موضوع بقى دقه وبياخدو راحتهم في التصليح والجو دا لأ انته ممكن تسلم العربيه وتفضل شايفها مركونه محدش قربلها لمدة ساعه او ساعه ونص مثلا
بالنسبه لقطع الغيار الصراحه مقدرش أحكم لإني معملتش الحمد لله أي حوادث ومسألتش ومش عايز أسأل علشان حاسس اني هتصدم..معملتش غير صيانة ال 10 ودي تقريبا عاديه علشان الزيت سعره معروف والفلتر معروف بس طبعا (الضريبه هي المشكله)

في مشاكل تانيه بقى بس دي بتبقى عارف قبل ماتشتري انها موجوده زي ان العربيه واطيه من المقدمه شويه وزي ضيق مكان الجلوس الخلفي والشنطه المحندقه

وفي مشاكل تانيه بس كلها حجات عرضيه حصلت معايا انا بس وكلها عيب صناعه زي:
- البلوتوث أو (blue & me) كان لما بيشتغل بيطلع صوت زنه ودي اتغيرت في الضمان بس رجعت تاني D:
- في صوت صفاره مع الفرامل من ساعة ماشتريت العربيه ورحتلهم 3 مرات وكل مره "دا شوية رمل وشيلناهم".."دا مش عارف ايه وصنفرناه"..وماااازالت الصفاره مستمره
- في شرخ صغير في الدركسيون في المكان اللي بيخرج منه الإيرباج ولما كلمتهم قالولي دا طبيعي
طبعا هو مش طبيعي خالص مالص بس انا مستني لما اروحلهم في الصيانه
- بالمره بقى علشان ابقى قولت كل حاجه فرش الكرسي اللي جمب السواق اتفك من ورا وعملوه في التوكيل مره بس (كـالـعـاده) إتفك تاني

مشكله صوت الصفاره بتاع التيل دا عندى نفس المشكله وكل اما احلها يرجع الصوت يا راجل دا انا غيرت طنابير فى الضمان
بص انا سألت هنا فى المنتدى Formulator كان بيقول انه عادى مش عارف بقه !

الخلاصه اني حاسس ان العربيه دي غير مؤهله للمشي في مصر بزحمتها بطروقها بمطباتها
وحاسس ان المفروض العربيه يحصل فيها تجديد يعني دي مش مواصفات 2013 خالص دي أخرها 2009
لكني لسه بحبها :)

فى رايى الشخصى مفيش عربيه بتستحمل الطرق القزره بتاعت المحروسه غبير الكورولاااا
بس الواحد لو مشى بالمبدأ ده عمره ما حيركب عربيات

مل اخر العربيه تحفه بكل المقاييس بس فيها شويه حاجات لازم تتعود عليها زى اى عربيه