الموضوع: اول تقرير عن الجولف 7

ده اول تقرير للعربيه وان شاء الله اتابع معاكم اول باول المستجدات

اولا: التابلوه والخامات



العربيه بسم الله ما شاء الله خامات ممتازه جداا وتضح جدا في التابلوه والحتت اللي حوالين لوحة العدادت انا كنت ركبت الفوكاس والاوكتافيا الجديده والفنتازيا والكورولا الجديده
وبصراحه فعلا العربيه تتفوق عنهم جميعا الجولف مركزين في تفاصيل صغيره جدا تحسسك فعلا بالاهتمام والتركيز انهم يطلعو حاجه افضل من باقي ال rivals
مثلا الحتت الblack piano اللي في طاره مديه شكل وملمس رهيب
ال silver matte ال في ال console فخم جدا ومدي العربيه شكل جميل جدا
الكروم حوالين جميع فتحات التكيف وحوالين الdashboard نفسها شكله راقي جدا
القماش على الابواب شكله محترم جداا
الطاره الجلد المالتي شكلها تحفه بمعنى الكلمه وهيا مقشوطه كده من تحت وانت ماسكها تديك احساس رائع بالفخامه ورياضيه جدا في نفس الوقت
اضائة التابلوه بليل مخليه التابلوه في الليل احسن كمان من النهار
اضائه بيضاء منتشره في كل حته ومؤشر السرعه احمر مديها شكل رائع جداا

ثانيا: الثبات والعفشه والتحكم
دي صوره مبدايه كده للعفشه المالتي لينك معلش هيا مش واضحه

انا مش هفتي كتير الصراحه في النقطه دي لاني طبعا لسه مضغطش على العربيه
في حاجه بس للساكن مثلا في مدينة نصر او شيراتون او مصر الجديده هيعرف قصدي
لو انت مثلا جي من شيراتون الطريق اللي اوله oasis ورايح مدينة نصر متجه الى كبري الماظه الطريق اللي يطلقون عليه الدائري الصغير في لفه كده يمين بيبقه فيها على شمالك smilys
اخدتها ب 130 وكان شيء لم يكن..

نيجي بقه للعفشه تعتبر ناشفه نسبيا بس العربيه الصراحه بتمتص جدا مطبات الهوا والحجات دي

التحكم انا قصدت اكتب الكلمه عشان الثبات عن التحكم يفرق ازاي بقه
انا لما سقت الفنتازيا كانت عربيه ثابته جدا ثابته لابعد الحدود الجولف بقه تفرق عنها الرشاقه في التحكم وال feedback بتاع الطاره احسن والعربيه مرنه اكتر
الفنتازيا ثابته جدا طبعا بس فعلا تحس الطاره numb شويه عن الجولف اللي فعلا تقدر تلخصها عن الفنتازيا انها more fun to drive

ثالثا: العزل
الصراحه العربيه عزلها عادي جدا يعني مش وهم يعني اقدر اقول انها زي احسن حاجه بسيطه من البي ام 316i اللي كانت محبطه بالنسبالي في النقطه دي فقط الصراحه والفنتازيا
يعني بعد ال 120 بيبقى في صوت هوا بسيط مسموع وصوت الاطارات بيعلى طبعا...
الكراسي تحسنت كتير عن الجولف 6 الصراحه والكرسي اللي جنبك ما بيعلاش ويوطى بس زبطينه حلو اوي

رابعا: الفتيس

طبعا ده مهم ل ناس كتير اوي من اسباب بعد فئه كبيره عن العربيه الحقيقه انا مش فاهم ليه؟؟!!
ببساطه الdsg من احسن الحجات اللي في العربيه واللي مخليها احسن من عربيات تانيه كتيير
اولا العربيه بتنقل في سرعه فوق الخيال مؤشر ال rpm بيتنفض من مكانه مش بينقل مش بتحس نهائيا بالنقله وده بيخلي العربيه مريحه جدا
انا فعلا مش بحس اي نقله خالص الا لو كبست جامد اوي عشان بتسقط نقله بس مش اكتر
يعاب عليه بس انك هتلاقي العربيه بتنط على الاول بس ده انا شايفه طبيعي جدا بسبب ان ميكانيكية عمله كده اما الحمد لله محستش بنتشه خالص لحد دلوقت
ثانيا الفتيس ده مديك range حلو اوي اوي في السادس والسابع ف تقدر تطلع سرعات عاليه جدا وال rpm قليل يعني ال 120 ال rpm بيبقى 2 بالضبط او 2 الا كمان

خامسا: الفرامل

لسه مجربتهاش اوي هيا disc brakes at front and rear, ventilated discs at front
والعربيه في 7 ايرباج و فيها ABS,EBD,ASR ESP
و ELECTRONIC DEFFRENTIAL LOCK

واخيرا: التسارع

ميزة العربيه الاساسيه اللي تفرقها عن اي عربيه
العربيه ما شاء الله وانت دايس حاجه بسيطه اكني واحد حارق في عربيته على الاخر
انا لسه محسبتهاش بالضبط بس فعلا حاجه تخض العربيه تخوف فعلا
ومن اي طلعه من الوقفه لو دست بنزين حبه بسيطه بلاقي لمبة الtraction تنور على طول

الموقف اللي حصل معايا كان واحد بفيرنا والالنترا الجديده بيشدو مع بعض بعد مطب النادي الاهلي اللي على الاوتوستراد على طول
انا سمعت صوت مواتيرهم ورايا هما ماسكين يمين وانا في النص كانو ورايا يجي بحوالي مسافة 20 متر تقريبا لما بداو يشدوا
سمعت صوت مواتيرهم لما بداو على طول وبتاع الفيرنا كان ناحيتي ف خفت لحد فيهم يخبطني ولا حاجه واول ما بتاع الفيرنا قرب مني
وكان بوز عربيته عند شنطة العربيه عندي بالضبط هيعدينم على يميني وهو طبعا كان واخد سرعه قمت كابس شويه ال rpm وصل 4
و الالنترا على يمينه مزنوق وقبل ما الفيرنا يبقى جنبي حتى
انطلقت وسيبتهم هما الاتنين في المرايه يشدو مع نفسهم...

مقارنات بسيطة
ال bmw f30 كانت more responsive عن الجولف في الhandling وتديك احساس عن الجولف انك ممكن تاكل الطريق مع اني الجولف خرافيه برضو
اعيب على البي ام في العزل الصراحه مزعجه بس محدش يفهمني غلط انا بتكلم في فئه بعينها وعلى سرعات كبيره
في التسارع البي ام تديك احساس باندفاع افضل بس اعتقد عشان الدفع الخلفي اما الجولف استجابتها افضل بالذات في السرعات العاليه وعلى فكره فتيس الجولف نقلاته مش محسوسه اكتر
ال f30 ليها هيبه اكتر كده وانت سايقها وكرسيها اللي تحت الارض بيديك احساس انك راكب فيراري
مشكلة ال بي ام ال Premium انها قله اوي بالنسبه لكونك راكب بي ام يعني المفروض انك
داخل بي ام فخامه بقه وبتاع وتفاجىء بالوقع المرير...طبعا ال idrive يدي شاشة الجولف بالجزمه
اللي عجبني الصراحه في الجولف انها فعلا عربيه تتقارن بالبي ام على عكس باقي العربيات التانيه من الاوبل استرا والفوكاس
تعقيب اخير الفولفو ال s60 انا كنت عملتلها تست درايف العربيه اللي يميزها الصراحه كراسيها الجلد اللي فوق الخيال بجد حاجه وهم مريحه لابعد الحدود والتابلوه في رايي الافضل حاليا
ولكن العربيه الصراحه ك steering اقل من الجولف بمراحل و حتى ال 180 حصان بتوعها مش عارف فينهم الصراحه وزن العربيه وفتيسها مش مساعدينها نهائي.....
انا عارف طبعا ان التقرير اقل بكتيير من المتوقع بس انا قلت حاجه كده تصبيره في وقت الفراغ وان شاء الله التقيل جي باذن الله ومعلش انا عارف مفيش اي نظام والكلام عايم بس باذن الله واحد واحده بالخبره كله هيتظبط...

ودي شوية صور لعربيه كانت في المعرض سوده نفس اللون

المشاركة الأصلية كتبت بواسطة monamize4

ما شاء الله ,, ربنا يباركلك فيها

و لو كود الفتيس مكتوب ف الكنتالوج ,, ياريت تقولهولى

ربنا يخليك و هشوفلك موضوع الكود ده..