مشكلة اكصدام كورولا مفكوك

**Abdelmoneem** · 28-09-2013 02:52 PM

السلام عليكم،

عندي مشكلة في اكصدام عربية كورولا 2010، أنا اشتريت العربية مستعملة والاكصدام في ترييحة ومتربط بمسمار قلاووظ من الجانبين، بس كان مربوط كويس ومشي معايا فترة كبيرة كويس.

المشكلة إن كل شوية المسمار القلاووظ بقى يفلت والاقي الاكصدام فك من الجانب من عند السوكة اللي فوق العجلة وكل ما أوديه للسمكري يقول لي "اللي مصممين العربية عاملين الحتة دي ضعيفة كده بكليبسات عشان أقل خبطة هي اللي تتفك" ويربطه تاني بمسمار قلاووظ ويرجع يتفك تاني بعد ما اسيبه،
أنا لاحظت إن فيه مكان كده عاشق ومعشوق في الاكصدام جنب المسمار على طول، يعني ممكن أضغطه بإيدي يرجع مكانه بس بعدين يتفك تاني،، أنا بصراحة زهقت من السمكري لأنه واضح إن معندوش حاجة يعملها غير مسمار القلاووظ اللي من غير خبطة بيتفك، لو خدت العربية ومشيت على سرعة 180 كيلو مثلا هيتفك لوحدة من ضغط الهوا. ولما استفسرت في التوكيل المهندس قال لي لو في قطع في الاكصدام مش هينفع أعمله بمسامير قلاووظ والكلام ده هقولك نغير الاكصدام كله!

لو حد يقدر يفيدني في الموضوع ده أو يعرف حد يكون فاهم في موضوع ربط الاكصدام ده يبقى جزاكم الله خيرًا.

**amrelsaqqa** · 28-09-2013 03:05 PM

تقريبا حامل الاكصدام او طقم الكليبسات ده بيتباع بس بشرط ان الكليبسات اللى في الاكصدام نفسه تكون سليمة

والا يا تغير الاكصدام كله يا تقضيها مسامير الاووظ ومسامير شك تربط الاكصدام في كرتير العجل

**eng.salama93** · 28-09-2013 04:47 PM

ممكن حد يعملهولك بمسامير برشام .. هتعيش أكتر من المسامير العادية

**Abdelmoneem** · 28-09-2013 04:58 PM

المشاركة الأصلية كتبت بواسطة amrelsaqqa

تقريبا حامل الاكصدام او طقم الكليبسات ده بيتباع بس بشرط ان الكليبسات اللى في الاكصدام نفسه تكون سليمة

والا يا تغير الاكصدام كله يا تقضيها مسامير الاووظ ومسامير شك تربط الاكصدام في كرتير العجل

طقم الكليبسات بتتباع فين؟ وهي المفروض خاصة بالكورولا ولا الطقم ده لأي عربية؟

أنا قبل كده سألت في البرجسي وفي التوكيل عن كليبسات تثبيت الاكصدام وقالوا مافيش على ما أتذكر.

ومسامير الشك دي إيه؟

المشاركة الأصلية كتبت بواسطة amrelsaqqa

ممكن حد يعملهولك بمسامير برشام .. هتعيش أكتر من المسامير العادية العجل

يعني قصدك في الحرفيين مثلا؟ ومسامير البرشام دي اللي بتبقى باينة كأنك مخيط الأكصدام غرزتين صح؟

**eng.salama93** · 28-09-2013 05:02 PM

لا يا عم مش لدرجه الحرفيين ... أي واحد بتاع ألوميتال مثلا بيستخدم مسامير البرشام
هتروحله و هيحطلك بدل المسمار العادي اللي عندك مسمار برشام .. و ما مظهره مبيبقاش انك مخيط الأكصدام بالعكس مظهره انضف من المسمار العادي
و هو دا المسمار

**amrelsaqqa** · 28-09-2013 05:50 PM

مش عارف والله بتتباع فين بس دول بيركبوا على الرفرف من جوة والاكصدام يركب عليهم ، ده بفرض ان الاكصدام نفسه سليم تماما

مسامير الشك دى اللى هى ساعات بيسموها مسامير شيشة اللى هى مسمار صغير جدا ورفيع يعنى طول 1.5 سم وسمك 1.5 ملى

دى لما يكون الاكصدام مش راكب على العربية اوى خصوصا لو المشكلة في الاكصدام نفسه ، بييجى السمكري يدق المسامير دى بحيث تربط الاكصدام في الكرتيرات بتاعت العجل يقوم يمسك شوية وشكله يظبط على العربية
..
يعنى في الصورة دى الكليبسات بتبقى ورا الاكصدام متثبتة في الرفرف ، دى اللى بتتغير ولما انا كنت بظبط الاكصدام قالولى بتتغير وبتتباع بس ما اهتميتش وقتها وما سألتش هى فين

الحل التانى اللى تمشى بيه حالك هو ان المسامير بتتدق على داير الاكصدام في كرتير العجل ، يعنى على اقصى يمين الاكصدام في الصورة مع الكرتيرة السودا بتاعت العجلة

**Abdelmoneem** · 28-09-2013 07:46 PM

need help fixing loose front bumper - Club RSX Message Board

يا جماعة المشكلة دي نفس مشكلتي بالظبط، ونفس الشكل عندي، مكان المسمار بايظ ومكان الكليبسات سليم، في ناس في الموضوع ده بتقول إنها خرمت الإكصدام جنب خرم المسمار وربطته بقفيز (زي قفيز الطاسة)، إيه رأيكوا؟

**eng.salama93** · 28-09-2013 08:28 PM

حتي لو ملقتش الكلبسات بتاعتها أعمل مسمار البرشام بيبقي شكله نضيف و مبيتفكش أبدا
و انتا مش هتشتريه لأنه بيتباع ب الميه علي بضعهم و لو انهم مش غاليين بس مش هشتري المسدس بتاعه مخصوص عشان مسمارين ولا حاجة
انتا تروح لواحد من بتوع الألوميتال و تقوله ركبلي مسمارين برشام ف المنطقه دي و خلاص ... و توريله الأخرام و خلصت علي كدا و هتديله 5 جنيه بالكتير اوي

**Abdelmoneem** · 28-09-2013 08:55 PM

المشاركة الأصلية كتبت بواسطة eng.salama93

حتي لو ملقتش الكلبسات بتاعتها أعمل مسمار البرشام بيبقي شكله نضيف و مبيتفكش أبدا
و انتا مش هتشتريه لأنه بيتباع ب الميه علي بضعهم و لو انهم مش غاليين بس مش هشتري المسدس بتاعه مخصوص عشان مسمارين ولا حاجة
انتا تروح لواحد من بتوع الألوميتال و تقوله ركبلي مسمارين برشام ف المنطقه دي و خلاص ... و توريله الأخرام و خلصت علي كدا و هتديله 5 جنيه بالكتير اوي

تمام، ألف شكر يا باشا، أنا بقارن ما بين فكرتك وفكرة القفيز وإن شاء الله ربنا يهدينا للحل الأفضل لحالتي.