الموضوع: تظبيط كلاكس الأوبل ... بالصور

أصدقائى الأعزاء
لاحظت من فتره إن فى ناس معانا بتشتكى من كلاكس الأوبل الأصلى ... وبيبحثوا عن بديل
مع إنه عندى الحمد لله زى الفل ... وصوته عالى لدرجه إن أصحابى بيسموا عربيتى ( الجامبو ) عشان صوت الكلاكس بتاعها زى بتاع الجامبو :)

طبعا الكلاكس عشان مكانه مش كويس أوى فهو ساعات مع الغسيل أو المطر لما بيوصله ميه فرده منه بتفصل وصوته بيبقى عره جداااا
المهم انه مره عمل معايا كده وروحت للكهربائى وظبطه الشتاء اللى فات ... وانا عرفت الطريقه وعملتها النهارده عشان واحده كانت فاصله خالص النهارده
دى صوره الكلاكس الهيلا الأسبانى اللى فى الأوبل



ودى صورته من الجهه التانيه اللى هانتشتغل منها



هانجهز سلكين كهربا والأفضل يكونوا محملين عشان يستحملوا جهد الكلاكس ( لو عندك فيشه وراكب فيها سلكين يبقى أفضل طبعا )
طول السلك الواحد مش أقل من ٤٠ سم
هاتوصل كل سلك فى طرف من الطرفين النحاس اللى فى مدخل الكهرباء اللى عليه السهم
هاتربط طرف منهم فى السالب بتاع البطاريه ... وتخلى الموجب فى إيدك تلمس منه للموجب بتاع البطاريه عند الحاجه ( كأنك بتدوس على الكلاكس من جوه )
طبعا مع أول تلميس هايكون الكلاكس فاصل ... وهنا هانبدأ مرحله الشغل ..... يكون معاك مفك نجمه وتيجى على المكان اللى عليه السهم التانى ... وتبدأ تلف ( حوالى ربع لفه فى كل مره)
والأفضل إنك تهوى المسمار شويه وتبدأ تلمس .... أول ما يبدأ يجيب معاك صوت .. تبدأ تلف واحده واحده لغايه أما توصل للنغمه اللى انت عاوزها ... يبقى خلاص يا أستاذ ... ألف مبروك وإنزل تحت العربيه تانى وأربط الكلاكس زى ما فكيته
ملاحظات
الكلاكس انا فكيته عادى من غير ما أفك الإكسدام ( بمفتاح ١٣ مشرشر )
أنا عملت الموضوع ده بإيدى النهارده
أنا عارف إن كتير مننا عارف الطريقه دى بس أنا شايف إن كلاكس الأوبل عالى جداا فقلت ممكن الطريقه دى تفيد حد
حتى لو الكلاكس مش فاصل والاتنين شغالين ممكن تعلى صوته بالطريقه دى
عذرا للإطاله وأتمنى تكون بفايده للجميع
تحياتى