عايزة نصيحة خبراء المنتدي في صيانة الماروتي

**الإسلام حياتي** · 04-10-2013 08:01 PM

السلام عليكم "أعضاء المنتدي الكرام " كنت عايزة أسأل عن الصيانة الدورية للماروتي أنا عندي ماروتي 2009 والعربية تقريبا مش بعملها صيانة الكيلومتر خالص وهي معدية 25 ألأف كيلو.. لأني مش بفهم في الميكانيكا فكنت عايزة أعرف هل التوكيل بتاعها كويس وأسعاره عاملة إيه ؟ ولا أوديها لميكانيكي أحسن ؟ وهل التوكيل لازم أروح أبو رواش ولا في مكان أقرب ؟ وهما ينفع يأخدوها وبعدين يرجعوها ولا لازم أنا أوديهاهم ... وشكرا علي الرد مقدما وربنا يكرمكم

**micromoud** · 04-10-2013 08:23 PM

هتوديها للميكانيكى هيطلب منك حجات تشتريها عشان تغيريها وهتروحى للعفشجلى يشد العفشة

رأيى وديها للتوكيل احسن من وجع الدماغ بتاع الصنايعية ... فى التوكيل موجود فى فرع الدقى بتروحى الصبح تديهم العربيه وتقولي للمهندس المسؤول ملاحظاتيك على العربيه وهما بيشتغلوا فيها لو لقوا حاجه محتاجه تتغير بيسألوكى الاول نغيرها ولا لا وبيقوليك هيسلمهاليك فى حدود الساعه كام وقبل ما تستلمى العربيه بيقوليك عالصيانه ومصاريفها وبتدفعى الفلوس وبتستلمى العربيه مغسوله وممكن المهندس يجى يجرب العربيه معاكى لو لسه فيها مشكله ,,,

**lidosasa** · 04-10-2013 11:27 PM

4 سنين من غير أى صيانات نهائى ولا حتى تغيير فلاتر ؟؟؟ لو عربية تانية غير توتة كانت عملت معاكى دقات نقص كتير وعطلت منك فى نص الطريق

**الإسلام حياتي** · 04-10-2013 11:59 PM

المشاركة الأصلية كتبت بواسطة lidosasa

4 سنين من غير أى صيانات نهائى ولا حتى تغيير فلاتر ؟؟؟ لو عربية تانية غير توتة كانت عملت معاكى دقات نقص كتير وعطلت منك فى نص الطريق

لأ غيرت الزيت الموتور والفلاتر قبل كده وهي فعلا عطلت بيا كذامرة بس بتكون حاجات خفيفة مش جامدة بس دلوقتي ساعات بلاقي العربية بتسخن والعزم بتاعها بيقل فقلت أنقذ ما يمكن إنقاذه ..

**micromoud** · 05-10-2013 12:05 AM

هو اكيد لو اعتمدتى على الصنايعيه و اشتريتى مستلزمات العربيه من بره هتوفرى حوالى نص التمن او اكتر ,,

**dr.hazem** · 05-10-2013 02:05 PM

لا انصح بالتوكيل ابدا...
حضرتك هتعملي الصيانات عادي عند ميكانيكي كويس...
العربية طالما 26 الف نقول محتاجه الاتي
تغيير فلتر الهوا
تغيير البوجيهات
تنظيف الكربيراتير وظبط الكهرباء
تغيير مية العربية والك؛ ف على خراطيم الميه والراديتير لو محتاج تسليك والبحث عن سبب ارتفاع الحرارة بما فيها الثيرموستات لو محتاج يتغير...
تغيير سير الدينمو...
التشييك على التيل الامامي ورجلشة الخلفي...
تربيط العفشه..
ترصيص الكاوتش وظبط الزوايا...
ومجبتش سيرة الزيت والفلتر لاني مش عارف حضرتك غيرتيه امتى وبتحطي نوع ايه....
لو حضرتك في القاهرة قريبه من المطرية.. في ميكانيكي ممتاز هناك..
وطبعا هتشتري القطع وتروحيله...

تحياتي

Sent from my Xperia Arc S using Forum Runner

**Amr Axel** · 05-10-2013 04:21 PM

في حالة عدم وجود ميكانيكي ثقة و شاطر
اذن ارجحلك التوكيل بس اعملي حسابك في مبلغ بعد الفترة دي كلها و لو ابو رواش قريب وديها و فيه فرع الهايكستب بس لناس بتشتكي منه و انا شخصيا ليا تجربة سيئة معاهم
بتحجزي الأول بالتليفون و بتوديها و تشوفي قبل ما يبدأوا شغل ايه اللي هيتعمل و تتكلف كام الأول عشان لو مش مستعدة و لو اي ملاحظات او مشاكل في العربية بتبلغيهم و بعدين يبدأوا الشغل و بتستلميها في الاخر و تاخدي الفاتورة بكل اللي تم و الوقت ع حسب

و المفروض يتم كده بعد الفترة ديه بدون صيانات
تغيير سوائل العربية كلها زيت الموتور و فلتر و زيت الموتور ع حسب انهي نوع و بتغيريه كل اد ايه او اخرة مرة امتي غيرتيه و زيت الفتيس المفروض اول 15 الف يتغير و بعدين كل 15-20 الف ع حسب و و زيت الفرامل و مية الريداتير يتغيروا لأن بيتم تغييرهم بالكامل كل سنتين او 30-40 الف ك
تغييير فلتر هوا و بنزين
تغيير بوجيهات و احتمال تحتاجي تغيري ابلاتين و كوندينسر مع ضبط كهربا العربية و يفضل تنضيف الكربراتير قبل تغيير البوجيهات
احتمال تحتاجي تغيري سير دينامو و مش بعيد كاتينة و بلية كاتينة بسبب عدد السنين اللي مرت
ضبط زوايا و تربيط عفشة و ترصيص اذا لزم الامر و مراجعة حالة الكاوتش و انصحك ان الكاوتش لو متغيرش من ساعة ما جبتي العربية يبقي اخره السنة دي و تغيري للامان و السلامة لأن الكاوتش المفروض صلاحيته بدون تركيب 5-6 سنين و بعدها معرض للانفجار لو تم استخدامه
فحص للتيل الامامي و رجلاش لفرامل اليد لو محتاجة