حادث مروع !!!

**miguel** · 08-10-2013 04:07 PM

السلام عليكم يارجالة !!!
اولا ربنا يسترها علينا جميعا !!! انا عملت حادثة علي الطريق الصحراوي وانقلبت بيا العربية عومت جامد جدا مني وانا علي سرعة 90 \ 100 تقريبا وربنا سترها الحمدلله علي كل حال !! اللي حصل في العربية السقف اتكعم الكابوت والاكصدام الامامي والرفارف و2 فانوس امامي و2 مراية جانبية والبربريز والسربنتينة يعني التكاليف مايقرب من 18000 الي 20000
العربية مؤمن عليها ودي السنة الثالثة ليها وعاملة 25000 كيلو شركة التأمين ممكن تصرف 80% من الاصلاحات
انا محتار م بين خيارين اصلح العربية وارجعها زي الاول وبعد كده ابيعها ولا التأمين ياخد مني العربية مقابل 30% من قيمة العربية فين حين اني لو العربية رجعت تاني وحبيت ابيعها ممكن تجيب كام ؟؟؟

وربنا يسترها علينا كلنا !!!

**Eng_hatemfathy** · 08-10-2013 05:38 PM

انا لسه حاصلى الموقف ده ومن غير تأمين وكنت فى حيره لانى عربيتى عامله 24 الف كيلو ولسه فى الضمان ومكملتش سنتين وااضرار كانت اقل يعنى سقف وباب وزجاج بس ولكن التكاليف كانت زيها تقريبا يعنى فى رينج العشرين الف وكان الخيار انى اصلحها بعشرين وهيطلع عينى شهر ولا شهر ونص واكيد هتخانق مع الصنايعية وفى الاخر ممكن متطلعش صح وهامشى بيها مقريف ولما اجى ابيعها اخسر كمان عشرين بس البيع هيكون بصعوبة لانى هقول على الحادثة
او انى اخسر نص تمنها بالظبط وابيعها حادثة فبصراحة بعتها بنص تمنها واستعوضت ربنا فى الفلوس واشتريت دماغى وضميرى وراحتى ومزاجى فرأيي انك تشوف تاجر حوادث وتبعهاله بعيد عن التأمين والافلام دى لان 30% قليل جدا

**amr.elsayed** · 08-10-2013 05:54 PM

صلحها فى التوكيل على حساب التامين وحتدفع 2000 جنيه وبعد كدة قيم العربية لو شغالة كويس كمل بيها
لو مش راضى عنها بيعها بس ساعتها حتجيبلك اكتر من ال 30 % بتوع التامين وتكون انت الكسبان وفى نفس الوقت مش حتقرف نفسك مع الصنايعية وحتتصلح كويس

**ahmedsrs** · 08-10-2013 06:22 PM

بيع احسن عمرها ماهترجع ذى الاول وهتقرفك قرف السنين

**Eng_hatemfathy** · 08-10-2013 08:55 PM

المشاركة الأصلية كتبت بواسطة miguel

تمام كده !! الف سلامة عليك !! وربنا يسلمها !!!
وطب جبت واحده تانية ولا اية ؟؟

ربنا كريم ابتلى ورزق -فلله الحمد والمنة رزقت بمال واجلت سداد دين معين وجبت اللى قدامى وتمن البيع وحطيتهم فى كروز زيرو بعدما روحى طلعت فىالبحث عن مستعمل نضيف وصاحبه صادق
للاسف البيع فى مصر مبنى على الغش الا ما رحم ربى وشفت مهازل خلال اسبوعين وفى الاخر توكلت على الله واشتريت كروز

لو هتعرف تبيع دلوقتى لتاجر توكل على الله
انا ممكن اديك تليفون اللى خد عربيتى هوا من المنصورة وشغال فى الحوادث واوصل فيها للى تقدر عليه
او توكل على الله واستفاد بالتأمين وصلح فى التوكيل وبيع بعد كده بتمن قليل وهنكون كسبت 18 الف اللى هما بتوع التأمين ولو اتباعت بعد كده ب 50 الف فانت الكسبان

**wassim_nasser** · 08-10-2013 09:13 PM

مبدأيا حمدلله علي سلامتك و الحمدلله علي كل حال .. انا رأيى من رأي عمرو .. صلح علي حساب التأمين والتوكيل ملزم يرجعها زيرو و حتي لو برة التوكيل فيه ورش كتير ترجعهالك زيرو و انت ف الاخر دافع بالكتير 3 4 تلاف جنيه واهى قاضية مشاويرك و حتي لو حبيت تبيعها بعدين هاتجيب مبلغ مش بطال .. اما لو بعتها حادثه هاتريح دماغك لكن هاتخسر جامد وانا ضد الحل ده لأنى مش شايف منه اي فايده ده غير انك اسعار الزيرو دلوقت غالية

**adel_edrees** · 10-10-2013 07:44 PM

معلش أولا حمد الله على السلامة ثانيا صلحها فى التوكيل و ما تبيعهاش خردة ثالثا ما عرفناش أيه السبب فى العومان أنت بتقول 90 - 100 و العربية عامت هل الكاوتش هو السبب و ألا العربية كان فيه مشكلة و ألا العربية بتعوم أصلا و ألا الطريق و ألا أنت دخلت منعطف حاد و قاسى و ما عرفتش تلم نفسك فالعربية عامت جزاك الله خير ما تنسناش بالأجابة لأن السؤال ده ممكن يفرق فى حاجات كتير جدا هل عمود الأتوان و ألا موضوع الكاوتش هو اللى بيفرق و العربية بتاعتك أنت بالذات أصلا فيها مشاكل من ناحية الأتزان وأنت كنت مش منتبه لها طمنا ربنا يخليك