الموضوع: انا ركبت مثبت سرعة للبيجو 301 speed limiter ,cruise control

المشاركة الأصلية كتبت بواسطة Akram.Gamal

اها و انا عايز افهم بقا هو ايه وظيفتهم يعنى بالظبط

خصوصا فى الطرق المهببه بتاعتنا دى


و شكرا ع الموضوع طبعا :d

دراع مثبت السرعة بيتركب تحت دراع النور علي الشمال,,
بيكون عامل زي دراع الراديو والكاسيت والموبيل اللي تحت دراع المساحات بالظبط واللي بيقولو عليه مالتي فنكشن multifunction

ودراع مثبت السرعة بيكون فيه وظيفتين,, الأولي مثبت السرعة Cruise Control
والتانية محدد السرعة Speed Limiter



لو أنت ماشي علي طريقة مفتوح وسرعتك 90 أو 100 وعايز تثبت علي السرعة دي,
بيكون فيه بكرة صغيرة بتختار منها وظيفة المثبت وبيتكتب علي الشاشة بتاعت الكيلو متر CC أختصار للوظيفة اللي بتختارها وجبنها السرعة اللي هتحددها,,
وبتضغط ضغطة علي الزرار اللي بيزود السرعة او الزرار اللي بينقص وساعتها المثبت بيشتغل علي السرعة اللي العربية ماشية عليها,,

وظيفة مثبت السرعة الأساسية أنو يحافظ علي ويحسن أستهلاك البنزين,
يعني فيه شاشة في الطابلوة في الهاي لاين طول مانت دايس بنزين بتحسب لك معدل أستهلاكك بيكون كام لتر لكل 100 كيلو,,
لو أنت دايس جامد طول الوقت في خط مفتوح ممكن تلاقيها من 12 ل 13 لتر بنزين لكل 100 كيلو,
ولو دايس خفيف في خط مفتوح هتلاقيها في الرينج الطيعي حوالي 7 ل 8 لتر بنزين لكل ,100 كيلو متر,

لما بتشغل مثبت السرعة بقي هتلاقي إن الأستهلاك دا بيقل وممكن يوصل من 6 ل 7 لتر بنزين لكل 100 كيلو متر,,!!
ودا لأن العربية بتاخد اللي هيا عايزاة بس ومش بيكون فيه حمل زايد من رجلك علي دواسة البنزين,, وعشان بتفضل محافظة علي نفس السرعة اللي أنت مختارها سواء 90 أو 100 كيلومتر في الساعة,
علي عكس لما بتكون دايس أنت برجلك ممكن كل شوية تزود شوية وتنقص شوية, ودا هيبان قدامك علي الشاشة هتلاقي الرقم وأستهلاك البنزين بيزيد كتير عن لما بتكون مشغل المثبت,
وكمان العوامل التانية اللي بتأثر علي الأستهلاك ظروف الطريق لو أنت علي مطلع هتلاقي الاستهلاك والرقم بيزيد,, ولو أنت علي منزل وشيلت رجلك من علي دواسة البنزين هتلاقي أستهلاك البنزين 0 لحد ما تبدأ تدوس تاني,,

*المثبت عندهم في أوروبا مهم جدااا, مش عشان يريح اللي سايق علي قد ماهو بيوفر وبيفرق في أستهلاك البنزين لانه غالي جداً عندهم,,
*واللي بيشتري العربية هناك بيدور علي العربيات اللي بتعمل أعلي أكتر كيلومتر بأقل أستهلاك بنزين أو ديزيل,
واللي بيساعد العربية توصل للإستهلاك الأقتصادي دا المعلن عنه في الكتالوج هوا مثبت السرعة,,,
إلا لو الواحد رجليه حساسة أوي علي دواسة البنزين ودا صعب ومتعب وممل عن تجربة أنك تحاول توصل لنفس طريقة أستهلاك مثبت السرعة الأقتصادية برجليك,

المثبت بقي فيه زرارين من ورا,, واحد بيزود السرعة اللي فوق,, واحد بيقلل السرعة,
زي زراير دارع المالتي فنكشن بالظبط اللي بيعلو الصوت وبيوطو الصوت,, نفس التصميم ونفس المكان لسهولة الأستخدام,,
وفيه بكرة صغيرة بتختار منها الوظيفتين بتوعه اللي هما المثبت والمحدد,

ولما بيشتغل المثبت ولنفترض انك كنت مشغلة علي 90 كيلو متر,
لو حبيت تفصلة بيكون بأنك بتضغط علي الزرار اللي علي أول الدراع من الجنب الشمال,
أو أنك تلمس الفرامل لمسه بسيطة ودا أفضل واللي بعمله, لأني ببقي بفصلة لسبب إن فيه زحمة أو مطب,, فهوا طبيعي وأتوماتيك وأنت بتدوس فرامل بيفصل ومش بيشتغل إلا لما ترجع تشغلة من الدراع تاني,,

حاجة تانية لو أنت مشغلة وحاسس أنك عايز تعدي عربية عشان الطريقة بيضيق ولا بيوقع زلط زي بتوع النقل أو لأي سبب تاني,,
ساعتها منتش متضطر تزود السرعة من الدراع, أنت ببساطة بتدوس بنزين لحد ما تعديها وممكن تدوس لحد ما توصل 100 أو 110 أو 130 حتي,,
ومجرد ما تعديه وتشيل رجليك من علي دواسة البنزين, العربية سرعتها هتفضل تقل براحة لحد ما ترجع لل 90 تاني وهتلاقيها ثبتت سرعة علي نفس السرعة تاني اللي كانت عليها ومكتوبة علي الشاشة لوحدها,,



الوظيفة التانية للدراع هوا محدد السرعة Speed Limiter
دا لو أنت ماشي ومش عايز تزود عن سرعة معينة ولنفترض 90 كيلو متر عشان الرادار ميصوركش لو الطريق عليه كاميرات مستخبية,
وفي نفس الوقت مش هتقدر تشغل مثبت السرعة عشان كل شوية بتهدي وتدوس بنزين وبتدخل يمين وشمال وتعدي عربيات ودا مينفعش طبعا تشغل مثبت معاه,,

في الحالة بتشغل محدد السرعة عشان متسرحش وتعدي السرعة وتتصور وانت بتعدي عربية وتدفع غرامة,,
عندهم برة الغرامات بالنقط,, وبعد عدد معين من النقط ممكن تسقط الرخصة عنك ومتسوقش تاني, عشان كدا محدد السرعة مهم عشان يلجمك أنت والعربية :)

لكن هنا طبعاً أحنا عايشين بحرية زي الفل وعيشتنا زي الفل,,