العربية عامت منك قبل كده ؟ وعملت ايه ؟

**2CODE** · 14-10-2013 09:58 PM

الموضوع ده المفروض نتبادل فيه الخبرات عن الموضوع ده

يعني وانت بتلم العربية وبتعدلها ناس بتقول لك تفرمل وناس تقول لك تدوس بنزين

وانا هبدأ بنفسي

انا عن نفسي "من عدة تجارب مع الموضوع ده كانت معايا شيفرولية لانوس" كنت بسيب العربية ولا بنزين ولا فرامل وبعدلها بالدريكسيون بس من غير ما المس ولا الفرامل ولا البنزين لكن محصلتش معايا ولا مره بالريو لغاية دلوقتي والحمد لله "طبعاً مفيش وجه مقارنة بين العربيتين"

ياريت لو كل واحد يقول لنا تجربته الناجحة وايه اللي حصل له وعمل ايه

**amrelsaqqa** · 14-10-2013 10:05 PM

لو العربية مش قادرة تدخل الملف بشيل رجلى من ع البنزين واشعر فرامل
لو لقيتنى بفقد السيطرة ع العربية بعدلها بالراحة بالدركسيون بس ، والحمد لله جميع المواقف اللى حصلتلى في حياتى كانت تعتبر حاجات بسيطة

معتقدش ان في عربياتنا اننا ممكن نلمها بالضغط على البنزين لان ده غالبا بيبقى علاج مشكلة الـ oversteer ودى غالبا مش بتحصل الا مع الدفع الخلفى وخصوصا العربيات الامريكى القديمة

**Ahmed Nasser** · 14-10-2013 10:26 PM

مرة العربية عامت منى بس ماكنش فية حد ورايا
شديت فرامل اليد وخمست ساعت ماشديت فرامل اليد كانت سرعتى نزلت للـ 80
والحمدلله ربنا سترها

**amz2011** · 14-10-2013 10:30 PM

متابع

**aw2100** · 14-10-2013 10:41 PM

بالنسبة للاسكودا عموما صعب قوى عربية تعوم منك لو عفشتها كويسة وراكب كاوتش محترم وخصوصا الفليشيا اللى معايا والحمد لله !!!

**youssef_u** · 14-10-2013 11:44 PM

لو العربيه عامت منك و بقت ماشيه بالجنب زي الصوره دي

يبقا الحل انك تزود بنزين عشان تلم العربيه وبلاش تدخل في الoversteer و دوست فرامل هتلاقي العربيه بتخمس بيك

**lanos2004** · 15-10-2013 12:09 AM

عديت على بقه زيت وفقدت السيطرة تقريبا ثانيه او اتنين ولميتها دركسيون
انفجار كاوتش امامى فردة يمين سرعه 140 كلبشت فى الدركسيون لحد اما وقفت
طلعت على رمل واسفلت والعربيه الدركسيون بقه ميه وعدت على خير
فى المواقف دى برفع رجليا من كل الدواسات واسيطر دركسيون فقط

**dr.hazem** · 15-10-2013 12:17 AM

كل الموضوع في الجر الامامي هل العربية عملت اوفرستير ولا اندرستير؟؟؟
لو العربية عملت اندرستير حله ببساطة انك ترفع رجلك من على البنزين وتوجه دركسيونك بالراحة وترجع تدوس بنزين بالراحة ...
ده بيحصل كتير مع الخطا الشائع بان الواحد يغير فردتين ويحط الاتنين الجداد قدام والصح انه يحطهم ورا...

اما الاوفر ستير واللي معاه العربية بتعوم من ورا في الملفات فالتحكم اصعب بكتير وفي الحاله دي القاعده الأساسية ان اتجاه الدركسيون يفضل متوجه للاتجاه المرغوب بالاساس حتى لو هتوصل انك تلف الستيرنج عكس اتجاه العربية وطبعا ترفع رجلك عن البنزين ومتضغطش فرامل عشان متفقدش تحكم الستيرنج بتاعك...
وربنا يستر طريقنا جميعا..
تحياتي

Sent from my Xperia Arc S using Forum Runner