سيبت الايطالى و اشتريت بيجو 207 و الحمد لله !

**Moe86** · 15-10-2013 06:13 PM

كنت بدور على حاجة اوروبى هاتشباك فى حدود 35-45 ألف , فيات برافا عجبتنى جدا و شايف ان مفيش عربية موديل 98-2001 بالامكانيات و السعر دة (غير كرايسلر نيون, 2000cc و اوتوماتيك كمان !! )
موضوع قطع الغيار مش مشكلة لأنى عارف تجار فيات جديد و استعمال و لاقيت حاجتها متوفرة و رخيصة

شوفت حوالى 15 عربية على مدار 6 شهور, للأسف كلهم كانوا متبهديلن خالص و ماشيين كتير قوى (شوفت واحدة ماشية 400 ألف كيلو !!) و فى الاخر لاقيت واحدة لقطة (مستوردة من ايطاليا و مختلفة عن اللى فى مصر تماما, 1600 مش 1300 و فيها ABS و 4 ازاز كهربا و فتحات تكيف خلفية و حاجات تانية كتير) بس محصلش نصيب و اتباعت قبل ما اشتريها بيوم !

بعد كدة زودت ميزانيتى ل 50-70 ألف و اختياراتى بقت:
رينو ميجان هاتش (شكلها مش عاجبنى ولا من برة ولا جوة)
فيات جراند بونتو (الموتور ال77 حصان مش نافع, و النسخة التربو بتاعتها جامدة طبعا بس معدية ميزانيتى)
ألفا روميو 147 (فخمة و جامدة جدا بس قديمة بالمقارنة بالتانيين و انا مقنع ان اى حاجة ليها عمر افتراضى)
ألفا 156 (مش هاتشباك و قديمة نسبيا برضو)

فى النهاية اشتريت بيجو 207 2007 من شهرين و الحمد لله عجبانى جدا, و بالمقارنة بجراند بونتو ال1400 فى فرق واضح فى الخامات الداخلية و الثبات على السرعات (مثلا 207 وزنها 1250 كيلو انما جراند 1050 تقريبا) و أداء الموتور طبعا (ال207 اللى معايا 1600 109 حصان)
التكيف تعبان زى بتاع فيات و الأوروبى كله عموما!
و اتأكدت ان أوماترا اللى مطلع عينى من 2007 اسوء توكيل فى العالم, لأن توكيل بيجو اللى فى ناس بتشتكى منه اصلا احسن بمراحل و قطع غيارها أرخص بكتييييير من بونتو كلاسيك اللى كانت معايا, حد يتخيل مثلا ان فانوس ال207 الخلفى فى التوكيل ب 450 جنيه بالضريبة!

واحد عارفه اشترى بيجو 301 بدل فيات لينيا, لأنى اقنعته ان بنفس سعر اللينيا (سواء الفئة اللى ب130 او 150) ال301 هتبقى افخم و فيها كماليات اكتر بكتير, و طبعا توكيل بيجو احسن بكتيييير من أوماترا

انا لسة بحب فيات/ألفا بس اشتريت عربية عجبانى من غير ما تطلع عينى مصاريف سواء تصليح أو قطع غيار

BTW the Peugeot proved to be a way better ........*magnet than the FIAT ;)

**rotanamasoud** · 15-10-2013 07:08 PM

بالرغم انى بركب فئه اقل منك بس تحس ان الفرنساوى له طابع احساس حاجه كده فى الجينات زى البصمه بتميزه
وكنت راكب فيات 27 كرهتنى فى كلمه فيات بالرغم انها كانت تانى يد من الزيرو وبتاعت خاله صاحبى يعنى مضمونه

**Silent~Dream** · 15-10-2013 08:18 PM

الف مبروك و ربنا يباركلك فيها و يكفيك شرها و شكرا لنقل التجربه

**saddam** · 15-10-2013 09:22 PM

صديقي المواطن
بالتوفيق ومبروك وشكرا لمشاطرة اﻷعضاء تجربتكم القيمة وإلى اﻷمام
ودمتم للنضال

**sonybony** · 16-10-2013 06:02 AM

المشاركة الأصلية كتبت بواسطة el diesel

أولا ألف مبروك على العربية وربنا يديك خيرها ويكفيك شرها
أوماترا خلاص ان شاء الله هاتبقى تبع الفطيم بادارة جديدة و فكر جديد بدل العك اللى هما عاملينوا ده
وكان ليا تعليق على ألالفا 147 و 156 اللى ذكرتهم ان 147 فيها تكنولوجى مش موجودة فى الرينو و فى البونتو
وال156 بمبلغ 70 ألف تجيب 2003 vip تتقارن بالمرسيدس و البى ام

عربيه اعشقها الالفا روميو بس للاسف نقص في قطع الغيار وغاليه جدا كمان خساره ده غير انه قليل اللي يفهم فيها بس هو للاسف فين الصنايعي اللي يفهم غي اي حاجه اصلا