الموضوع: معلومات عن الرباعية سوزوكي فيتارا 98

كل عام وانتم بخير وعيد سعيد عليكم

SUZUKI VITARA

نظرا لاني استفدت من خبرات ناس كتير هنا في المنتدى وكنوع من رد الجميل وتبادل الخبرات والمعلومات قررت اعمل موضوع عن السوزوكي فيتارا و خصوصا بعد ما لاقيت الكلام عنها قليل شوية فكل حاجة حكتشفها والاقيها حطرحها باذن الله في الموضوع واي حد يمتلكها بردوا ممكن يساعدني يحط اي معلومات تفيدنا كلنا من اول الابرة للصاروخ او يصحح معلومة حستقبلها منه بصدر رحب وانا عن نفسي حتكلم بالاخص عن الفيتارا موديل 1998 2 باب كربراتير لان دية حتبقى محور تجربتي ومفيش مانع لو حد عندة موديلات اقل او اكبر منها ممكن يطرح مشاكل صادفته وايه كان الحل و قطع الغيار والصنايعي الي عجبة واشتغل فيها كويس سواء ميكانيكي وكهربائي الخ.

يلا توكلنا على الله نبتدي :

- كتالوج السوزوكي الفيتارا أون لاين على النت مترجم من الروسية الى اللغة العربية الرابط :

كود:

  http://translate.googleusercontent.com/translate_c?depth=1&hl=ar&ie=UTF8&prev=_t&rurl=translate.google.com.eg&sl=auto&tl=ar&u=http://suzuki-cat.ru/%3F%26action%3Dgroup%26region%3DUS%26modeltitle%3DSidekick%26model%3DSE416%26modif%3D28%26gr%3D5&usg=ALkJrhgbShNwrsNGYBDhuHU54FaAhsd2Nw

- كتالوج باقي أنواع السوزوكي علشان محدش يزعل :

كود:

  http://translate.googleusercontent.com/translate_c?depth=1&hl=ar&ie=UTF8&prev=_t&rurl=translate.google.com.eg&sl=auto&tl=ar&u=http://suzuki-cat.ru/%3F%26action%3Dmodel%26region%3DUS%26modeltitle%3DSidekick%26model%3DSE416%26modif%3D28&usg=ALkJrhgDfbo5z4DY_bzNWRkffW5VWUwwLA

- قطع الغيار :
موجودة معظمها ياباني تجاري والاصلي تتعب علية شوية .

اسم العربية في الكتالوجات SE416
وفيه منها كربراتير وانجكشن حقن و3 باب و 4 باب وكابورليه .

منافذ بيع قطع الغيار :

- توكيل سوزوكي ( امام سعودي بشارع المساحة الدقي ) .
- ليدرز ( 42 شارع ايران متفرع من شارع محي الدين ابو العز قريب من جامع اسد ) راجل محترم وذوق .
- السرساوي ( قريب من شارع التحرير بجوار الكوبري - الدقي ) راجل صريح ومحترم.
- محمد ( قريب من مركز البحوث اخر السور الحديد اول شارع خش فيه يمين حتلاقية على ايدك اليمين مسافة 150 متر كدة محل صغير ) حركي وبتاع شغل .

فيه ناس في وسط البلد بس مرحتلهمش لسه كمان لو عرفت عنهم معلومات او اي حد تعامل معاهم يا ريت يحط العناوين .
- سوزوكي سنتر في التوفيقية فوق اسماك ابو غالي.
- وآشا فى التوفيقية


مرضتش احط ارقام التيلفون علشان معرفش الادارة بتسمح بكدة ولا لا .

قطع الغيار الجيدة :

- سير ( الكاتينة التكيف المروحة ) sun .
- البوجيهات نوع NGK صناعة يابانية مقاس 16 .
- 3 اولسيهات ليست متوفرة كلها بالتوكيل اولسيه امامي والكامة وخلفي ستجدها بس نوع ياباني .

- بلية الكاتينة نفس بلية السوزوكي سويفت موجود منها تجاري صنع فى اليابان والنضيف يطلق عليها NTN .

- فلتر بنزين متوفر عند محمد بس بلاستك ومش حديد وعلى كلامة مش بتنزل حديد والفلتر ممكن يتنظف على فكرة.

- فلتر هواء متوفر عند ليدرز مستدير.

الزيوت الجيدة :

- وولف مستورد أو شيل مصري نصف تخليقي 10w40 المدى 7000 كيلو للعربيات الى فوق 100 الف كيلو.

- زيت الكرونه لا يتغير ابدا بل يزود عليه فقط علشان الكرونه فيها زيت تخليقي كامل مدى العمر ولو حبيت تزود او اضررت في اقصي الظروف تغيرة استعمل نوع زيت وولف 75w حتحتاج حقنة طبية كبيرة ب 6 جنية لو حتزود او مسدس والكرونه فيها مسمارين التزويد من الجنب والمسمار الى تحت علشان تفضي الزيت.

الفتيس الصغير :

يطلق عليه فتيس غرز بسيط جدا بغيارين :
غيار امامي : علشان تشغل اربع عجلات 4WD ودة للمناطق الترابية والوعرة مطلوب فيها عزم مش سرعة.

غيار خلفي : علشان تشغل عجلتين 2WD ودة للمشي العادي والجري.

العربية على شاسية محترم جدا ونظام التعليق جميل و حلوة لشوارع مصر المكسرة والمطبات وهى مرتفعة عن الارض

- نظام التعليق لنوع 2 او كما يطلق عليها 3 باب انشف بس ملاحظتوش صراحة العربية مش ناشفة كويسة .

- نظام التعليق في 4 باب انعم شوية ومجربتهاش للامانه .

بعض الموصفات :
- العربية على شاسية مش علب



- يوجد منها نظام اي بي اس .


- تكييف هواء .
- يوجد منها اتوماتيك وعادي .



- يوجد منها كربراتير و حقن ونصائح كثيرة انك تبعد عن الحقن.

- زجاج كهربائي .
- سنتر لوك .

- ماسحة خلفية .

- جنوط (195R15) .


- مقاس الكاوتش (P255/60R15)



معلومات جديدة مهمة :

- كان فيه اشاعات بتقول ان الفيتارا محدش بيشتغل فيها غير ناس معدودة على الاصابع بس زي تامر بركات ومحمد عابدين بس اكتشفت ان الكلام ده مش مظبوط تماما .

- فلتر زيت الماتور نفس فلتر التويوتا كورلا الصغير ممكن تجيبة من اي محطة والقديم كان صب زيرو .


ولنا لقاء قريب ان شاء الله

يتبع ....


تنبيه اداري بعدم وضع اعلانات او مشاركات خارجة عن سياق الموضوع
الادارة

ترس الفلام للفيتارا

ما هو ترس الفلام ؟

يعتبر ترس الفلام مهمة جدا في عملية ادارة محرك السيارة ويرتبط الترس بتروس المارش الكهربائي عند عملية ادارة مفتاح الكونتاكت ثم ينفصل المارش عن ترس الفلام بعد عملية الادارة .

- ماذا يحدث عند تضرر سنون الترس
سماع صوت غريب عند ادارة المحرك ولا يدور محرك السيارة بسهولة من اول مرة بسبب ان ترس المارش لا يعشق جيدا بهذا الترس .

- امكانية توفر قطع غيار ترس المارش للفيتارا
يصعب توفر ترس جديد نهايك عن سعرة المرتفع ويوجد منه استيراد و سعره يترواح ما بين 300 الي 500 في الوكالة طبعا طماعيين وجشعيين بالاضافة كان مستوى الترس الاستراد غير جيد والخيار الاخر انتظار فك ترس من ماكينة ويصبح هذا الخيار غير جيد في بعض الاحيان نهايك ان الترس المحلول يصبح غير جيد ايضا.

- ما الحل ؟
لاحظت وجود لحام بالترس يربط سنون الترس بالرق الخاص بالترس والرق هو الجزء المستدير الذي يوجد به مسامير ربط الترس بالماتور ؛ يوجد جانبين للترس الجانب الاول المتضرر من المارش والجانب الاخر في معظم الحالات يكون سليم ؛ تذهب الى خراط لفك وصلات اللحام فيفصل سنون الترس عن الرق ثم يتم قلب اتجاه السنون الجيدة على نفس الرق ليواجة جانب المارش ثم يتم ظبط حواف الترس مع الرق بمطرقة ثم يتم عملية الرف بماكينة المخرطة ليتاكد من عندم وجود اختلال في اتزان الترس عند الدوران وعملية الرف مهمة جدا لكي لا يتضرر الماتور من اختلال التوازن ومن ثم تذهب الى لحام محترف ليلحم السنون بالرق مرة اخرى ستكلفك هذه العملية 25 جنية فقط بدلا من 500 جنية وفي هذه التجربة احسست بانتصار عظيم على جشع التجار .

واليكم صورة توضحية للعملية الجراحية