تصنيع سيارة من الخشب (فكرة للنقاش)

**YahiaAshraf** · 16-10-2013 11:23 PM

بسم الله الرحمن الرحيم

مشروع تصنيع سيارة بالكامل من الخشب

الحقيقة الفكرة دى عندى من سنين ولكن طورتها من قريب و هعرضها عليكم

فاكرين لما كنتوا بتروحوا مرسى مطروح زمان وبتاجر لعيالك او بتاجر ليك ما يسمى ( بالكرنك ) زى العجلة بس بدركسيون كده كانك راكب عربية لو تفتكر كان فيه منه راكب واحد و 2 راكب و 4 راكب

اهو الفكرة هتبقى على ال 4 راكب

الشاسيه فقط هيبقى من المعدن وباقى السيارة بما فيه التابلوه كاملا من الخشب

أمثلة توضيحية

عندك خيارين
1- يا اما هتعملها بمحرك عجلة ( يعنى عجلة باسلوب شيك )

2-أو هتعملها بمحرك بنزين عادى

لو بمحرك عجلة :-

الفكرة اخدتها من واحد أمريكى صنع عربية بورش من الخشب وبمحرك عجلة

واليكم التفاصيل

يتبع

**YahiaAshraf** · 16-10-2013 11:23 PM

الاضافة اللى من عندى بقى وهو ان نغطى العربية كربون بالكامل زى ما بنشوف بعض السيارات عاملينه وبكده محدش هيكشف ان العربية ممكن تكون عجلة مع زجاج فايمه وتبقى حاجة اخر تمام

تانى حاجة بس هى محتاجة تعديل على محرك العجلة

بدل ما احنا بنسوق العجل كده

أنا عدلت الفكرة بحيث كانى سايق عربية بجد و هيبقى جهد سواقة أقل

(رسم تخيلى )

لما هنيجى نسوق هندوس على دواسة 1 و 2 معا بحيث بتزود سرعة بالاتنين هى محتاجة دراسة بقى بحيث انى اعدل العجلة انها تبقى كده شوفت ناس عاملاها بس مش عارف ازاى

التابلوه و الحاجات دى هتتصمم خشب وبعدين هنحط سفنج مضغوط و يتغلف بفرش جلد

وطبعا هنركب زجاج عادى زى أى عربية
الفكرة بقى ان لما العربية تتصنع ناخد نفس المقاسات يعنى لو نموذج مثلا فيات اونو ناخد نفس المقاسات بالملى يعنى لو وصلت انى اركب شبكة الاونو او الفانو تركب عليها

الفكرة التانية بقى وهى ان العربية تعمل بمحرك بنزين فدى هتبقى مكلفة شوية و محتاجة جهد كبير علشان تتعمل

انما فكرة ان العربية تمشى بمحرك عجلة هى بدل ما اشترى عجلة اشترى عجلة باسلوب شيك وهى تبقى معدة للاستخدام داخل المدينة يعنى تروح مشوار صغير تروح الكلية بتاعتك بيها كده يعنى و هكذا

الفكرة داخل دماغى لدرجة انى بفكر اصنع نموذج على شكل فولكس فاجن باسات شكل 2006 - 2011

طبعا هيلزمك انك قبل ما تبتدى تتفق مع نجار مع بتاع زجاج سيارات و مع حداد ومجموعة كده تجمعهم فى مكان وتشرحلهم فكرتك علشان يبتدوا ينفذوا يعنى مثلا لازم بتاع الزجاج يبقى موجود علشان النجار اللى هيعمل يبقى عامل حساب مكان تركيب الزجاج بطريقة معينة ميصممش ويجى يركب الزجاج ميركبش وهكذا

ياريت تشاركونا رايكم و اقتراحاتكم فى الموضوع

تحياتى

Yahia Ashraf

**Salamonti** · 17-10-2013 02:27 AM

عملت حساب العوامل الجوية؟
احنا كلنا عارفين قابلية الخشب لتغيير شكله حسب العوامل دي ومابيرجعش تاني زي ما كان
مطر - رطوبة - تراب - شمس - درجات حرارة

عملت حساب العفن والسوس والحشرات اللي بتحب الخشب زي الصراصير والعناكب والنمل وخلافه؟

عملت حساب فرق الوزن اللي أكيد هايكون لصالح الصاج أو الالومونيوم طبعا ؟؟

عملت حساب لفرق قوة وصلابة الهيكل اللي أكيد برضه لصالح الالومنيوم أو الصاج ؟

عملت حساب لامكانية وسهولة اصلاح اي تلفيات ممكن تحصل في الهيكل؟
وده برضه يصب في صالح الصاج أو الالومونيوم

عملت حساب لمدى أمان الركاب لو حصلت حادثة ؟
برضه نقطة لصالح الصاج او الالومنيوم
متخيل لو حصل حادث وعرق خشب من دول انكسر واخترق جسم الراكب ؟!

عملت حساب البيئة؟
كميات الخشب اللي هاتتهدر في تصنيع هياكل عربيات
تأثير ده عالأشجار والاحتباس الحراري
الخشب خام مهدد بالنفاذ اذا لم نستخدمه باعتدال
لاحظت ان اقلام الرصاص مابقتش تتعمل من الخشب؟
لاحظت ان اكياس الفاكهة ماعدتش ورق زي زمان ؟
لاحظت ان اللحوم بقت بتتباع في اطباق فوم غير الكرتون بتاع زمان؟
كل ده ليه ؟؟

آخر نقطة..
صناعة الهيكل الخشبي اللي شفناه في الصور ده يتكلف أكتر من تكلفة هيكل صاج أو الومنيوم !!
اختار كدة عربية من ماركة وموديل تكون قطع غيارهم رخيصة وتقدر تجيب منها نصين فاضيين بسعر رخيص جدا اكثر مما تتخيل
تبقا خدت الصاج فاضي ارخص من تكلفة الهيكل الخشب الفاضي
وافرش انت الدواخل براحتك بنفس الطريقة اللي كنت هاتعملها في الخشب

دي اول انطباعات جت في بالي بمجرد ما قريت موضوعك
وانا واثق اني لو قعدت فكرت شوية وتعمقت في تفاصيل الموضوع هاطلع حجات كتير تانية تخليك تصرف نظر عن حاجة زي كدة
الفكرة غير مجدية لا اقتصاديا ولا حتى على أي مستوى تاني

اللي عملها ده حد فاضي ومعاه فلوس زيادة وغاوي شهرة او حابب يتمنظر - مالهاش حل تاني !!

**adelghanem** · 17-10-2013 02:59 AM

المشاركة الأصلية كتبت بواسطة Salamonti

عملت حساب العوامل الجوية؟
احنا كلنا عارفين قابلية الخشب لتغيير شكله حسب العوامل دي ومابيرجعش تاني زي ما كان
مطر - رطوبة - تراب - شمس - درجات حرارة

عملت حساب العفن والسوس والحشرات اللي بتحب الخشب زي الصراصير والعناكب والنمل وخلافه؟

عملت حساب فرق الوزن اللي أكيد هايكون لصالح الصاج أو الالومونيوم طبعا ؟؟

عملت حساب لفرق قوة وصلابة الهيكل اللي أكيد برضه لصالح الالومنيوم أو الصاج ؟

عملت حساب لامكانية وسهولة اصلاح اي تلفيات ممكن تحصل في الهيكل؟
وده برضه يصب في صالح الصاج أو الالومونيوم

عملت حساب لمدى أمان الركاب لو حصلت حادثة ؟
برضه نقطة لصالح الصاج او الالومنيوم
متخيل لو حصل حادث وعرق خشب من دول انكسر واخترق جسم الراكب ؟!

عملت حساب البيئة؟
كميات الخشب اللي هاتتهدر في تصنيع هياكل عربيات
تأثير ده عالأشجار والاحتباس الحراري
الخشب خام مهدد بالنفاذ اذا لم نستخدمه باعتدال
لاحظت ان اقلام الرصاص مابقتش تتعمل من الخشب؟
لاحظت ان اكياس الفاكهة ماعدتش ورق زي زمان ؟
لاحظت ان اللحوم بقت بتتباع في اطباق فوم غير الكرتون بتاع زمان؟
كل ده ليه ؟؟

آخر نقطة..
صناعة الهيكل الخشبي اللي شفناه في الصور ده يتكلف أكتر من تكلفة هيكل صاج أو الومنيوم !!
اختار كدة عربية من ماركة وموديل تكون قطع غيارهم رخيصة وتقدر تجيب منها نصين فاضيين بسعر رخيص جدا اكثر مما تتخيل
تبقا خدت الصاج فاضي ارخص من تكلفة الهيكل الخشب الفاضي
وافرش انت الدواخل براحتك بنفس الطريقة اللي كنت هاتعملها في الخشب

دي اول انطباعات جت في بالي بمجرد ما قريت موضوعك
وانا واثق اني لو قعدت فكرت شوية وتعمقت في تفاصيل الموضوع هاطلع حجات كتير تانية تخليك تصرف نظر عن حاجة زي كدة
الفكرة غير مجدية لا اقتصاديا ولا حتى على أي مستوى تاني

اللي عملها ده حد فاضي ومعاه فلوس زيادة وغاوي شهرة او حابب يتمنظر - مالهاش حل تاني !!

اراء وجيهه تحترم

**eng.octooo** · 17-10-2013 05:39 PM

اولا مش هاينفع تمشى بيها لازم ترخيص ( انا عارف انها عجلة بس ابقى اقف فى كل لجنة وقولهم انها عجلة هههه) غير الوزن الى انت بتحركة برجليك مع مقاومة الهواء !! متعب جداا بس ك فكرة هيا حلوة

**YahiaAshraf** · 17-10-2013 06:24 PM

فكرة انى اصنعها من معدن ده لو هعملها بمحرك بنزين و كانها عربية عادية زى أى عربية انما الفكرة انا بقول عجلة على شكل عربية

اكيد هيتعمل عازل للخشب يعنى المكون الرئيسى خشب انما هيتعزل من كل حته و هيبقى فوقيه كربون اسود