تعديلات علي شيفرولية اوبترا

**mmelg505** · 18-10-2013 04:23 AM

السلام عليكم ورحمة الله وبركاتة

اخواني الاعزاء انا عامل الموضوع دة علشان اللي عاوز يعدل علي عربيتة وكلنا نستفاد بخبرة بعض انا معايا اوبترا من سنتين وماشاء الله عربية جميلة بكل ماتحملة من معني العربية سعودي2005 ايرباج وتحكم من المقود لكن للاسف مفيش abs وياريت لو حد عندة خلفية ازاي نركب abs لان العيب الوحيد فيها هوة الفرامل
وانا عملت بعض التعديلات لاني بحب السرعة
1-فتحت علبة البيئة وعدلت قيها علشان الصوت وفعلا بعد التعديل اتحول الصوت من صفارة الي رياضي والعربية فرقت في التسارع وصوتها وهيا شغالة هدي جداا لكن لما الاربي ام يعلي عن ال3 بتتحول صوتها بيعلي عن الطبيعي وسرعتها كمان
2-الفلتر في فلتر رياضي نفس الاصلي بالضبط موجود علي الانترنت ebay وسعرة غالي شوية لكن نفس الاصلي بنمط رياضي 500جنية تقريبا
انا بس نفسي حد يفدني في التعديل في نظام الفرامل او حتي لو اشتري طنابير رياضية هل هيفرق .
وعلي فكرة انا عندي خلفية عن اعطال كتير واسبابها وحلولها وان شاء الله كلنا نستفيد من خبرة بعض

**FAR!D** · 18-10-2013 05:45 AM

انت معاك لاسيتي ولا ايه؟؟؟ لو لاسيتي يبقى ربنا يباركلك فيها فعلا عربيه حلوه اوووي انضف من الاوبترا المصري 100 مره
عموما هوا فيه منها بينزل abs و tcs لكن انت تحولها ل abs اعتقد حيبقى صعب و مكلف جدا لانك حتدخل في دايره فرامل كامله زائد جوز طنابير و غير كده حتحتاج كونترولر جديد طبعا
و الفلتر الرياضي موجود لكل العربيات و يركب مكان الفلتر الاصلي لكن الموضوع ده هنا قتل بحثا لاختلاف الناس بين انه بيفيد او لا لكن انا اعتقد انك حتركب فلتر رياضي لو المكنه محتاجاه و ده لو فيها تربو و سوبرتشرجر غير كده يبقى اضافه بلا معنى
و اللعب في علبه البيئه متاح ولو عايز اداء اكتر شيل الحشو خالص بس استحمل النعرررررررر ده غير انه مضر للبيئه ( عارف انها مش فارقه اصلا مع اي حد ولا انا هههههههه) و عموما اي تعديل للعربيه انشالله علبه مناديل لا يعادلها نشوه و متعه لصاحبها
بالتوفييييييق

**M I D O** · 18-10-2013 05:50 AM

شبة مستحيل العربية تتحول ل فرامل abs

**د.عماد صلاح** · 18-10-2013 02:55 PM

العربيه ممتازه وعيبها فعلا الفرامل و صوت السلانسيه عالي شويه

**abou-yahia** · 18-10-2013 04:08 PM

نقطه نظام معلش

Abs مالوش علاقه بقوه الفرامله نهائيا

كل الفكره انه بيخليك لما تيجي تفرمل تقدر تتحكم في توجيه ابعربيه من غير ما العربيه تعوم منك

لزياده قوه الفرامل في العربيات عموما وعن تجربه في الاوبترا تحديدا

زيت الفرامل يتغير كل سنتين علي الاكثر مع سحب الهواء من الدوره من العجله الشمال بجهاز شفط وبلاش طريقه المكاركه عشان بتبوظ السيرفو

الكاوتش يكون محترم يعني يا تركب كوري بمعامل تماسك aa يا تركب بردجيستون تورنزا بيفرق جامد عن تجربه

الجنوط الرياضيه بتخلي التهويه احسن للتيل والطنابير

التيل الاصلي وممكن الريمسا احسن حاجه
ممكن طبعا تجيب طنابير وتيل احسن ذي ebc

الفلتر الرياضي مكان الاصلي من غير تعديل oem k&n ده حيحسن الاداء بعد 3000 لفه وحيزود التوب سبيد سيكا
لاكن عيبه انه حيكتم العربيه علي السرعات الاقل

نظره عامه علي الفلتر الرياضي
بتقول ان الاهم انه يحسن من سرعه تدفق الهواء ويكون الهواء بارد عشان نسبه الاكسجين تكون اعلي
وبصراحه مش حيفرق مش مع الاوبترا فقط لا اغلب اللي بيحط فلتر بيفكه

ممكن لزياده الاداء نعمل الاتي
بوجيهات ngk ايريديوم حتحسن الحرق والتسارع وحتحسن استهلاك الوقود بشرط ان نمط القياده يثبت

تغيير مواسير نظام العادم الي 2 بوصه عشان تقلل الضغط العكسي علي الموتور
وممكن تركيب عازل علي الهيدرز
لان كل ماتخلي الشكمان يحتفظ بحرارته بيحسن من تدفق العادم
وكمان حيقلل من الحراره الزياده في حوض الموتور

ديه ممكن التعديلات الممكنه غير مكلفه ليها اثر ايحابي علي العربيه

تحياتي