البيجو الـ 308

**hdabawy** · 20-10-2013 01:20 AM

السلام عليكم ورحمة الله وبركاته
اولا احب ابارك للى استلم الـ 301 ربنا يباركله فيها يا رب
ثانيا احب اواسى الحاجزين ولسة ماستلموهاش على صبرهم
ندخل فى الموضوع
انا طبعا كنت ناوى على الـ 301 بس كنت هجيبها تقسيط بس انا شايف ان طابور الانتظار طويل فعايز آخد رأيكم فى حاجة انا ظهرت قدامى 308 حالتها كويسة جدا موديل 2009 وعاملة 87 الف كيلو محتاجة بس 2 مساعدين خلفى لكن باقى العربية سليمة ومشيت بيها عجبتنى جدا وصاحبها طالب 90 الف جندى فإيه رأيكم اجيبها ولا حد له رأى تانى
برده هدردش معاكم شوية انا عارف ان الزيرو زيرو لكن ذى ما قلتلكم انا عايز اجيب الـ 301 تقسيط وطبعا كلنا عارفين قطم الوسط فى التقسيط فلما لقيت الـ 308 بصراحة رجعت حسبته تانى وقلت انا هجيبها كاش ولو فيها حاجة هتتعمل يبقى ده مقابل التقسيط للـ 301 مع الفرق طبعا انى مش كل شهر هصرف على قطع غيارها لكن التقسيط شهرى ده من وجهة نظرى طبعا رأيكم يهمنى جدا جدا
وفى حلة لو هاخد الـ 308 هل سعرها دة معقول ولا لأ واخبار قطع غيارها ايه فى المعقول ولا غالية انا دورت هنا فى المنتدى على مواضيع خاصة بيها لكن قليلة جدا مش عارف ليه
انا مستنى ردودكم
وياريت لو فيه قائمة بأسعار قطع غيارها
اه نسيت اقولكم ان العربية استيشن

**Haitham G** · 20-10-2013 02:58 AM

بص حضرتك فى البداية كده موضوع السعر مش حاقدر افيدك فيه بس بكل تاكيد ال 308 احسن من 301 وطبعا مش محتاج اقولك ان الزيرو حاجة تانية بس دى حاجة ترجعلك طبعا و بالنسبة لأسعار قطع الغيار اغلى من ال 301 بس مش اللى تعتبر غالية
بعض الأسعار اللى اعرفها
تيل فرامل 570 تقريبا
فانوس امامى 1500
فوج لايت 550
مراية كهرباء 1700
اكصدام امامى 3400
ده اللى انا فاكره و لو افتكرت حاجة تانية حكتبها وبالتوفيق

**saddam** · 20-10-2013 02:12 PM

صديقي المواطن
الستيشن ليست بياعة كال 301 وقطع غيارها قطعا ستكون أقل والبيجو 301 أنا شايف بوادر إنتشار ليها في الجمهورية مما يدل على قرب وصول قطع غيار التجاري وقوة سرعة البيع مستقبلا أما السعر فهو ده ثوبها ومتوسط سعرها والكيلومتر عالي ولو عايز فيه وحده شبه زيرو برضو إستيشن لسه شايفها إمبارح في جمارك مطار القاهرة بس زيرو فيها حادث تافه في اﻹكصدام اﻷمامي واﻷيرباجات 2 منفجرة ولكن العربية بأمانة جديدة ولا أظن عدادها موصل 10 آلاف ممكن بكره بسرعة تروح تعاينها والمزاد يوم 24 بعد أربع أيام في نادي الجيزة شارع البحر اﻷعظم تدفع 5 آلاف تأمين دخول مزاد مشتريتش تاخدها وإنت مروح ولو إشتريت حتسيب 30% من قيمتها
أنا لو من هواة الشكل ده مكنتش سيبتها لفطة فعلا جدا خالص أوي
وبالتوفيق وإلى اﻷمام ومن نصر إلى نصر
ودمتم للنضال

**hdabawy** · 20-10-2013 04:19 PM

انا متشكر جدا لحضراتكم بس افهم من كدة انكم بتفضلوا الـ 301 مع التقسيط عن الـ 308 المستعملة
رأيكم دة غالى عليا جدا وربنا يهدينا لما فيه الخير

**Haitham G** · 20-10-2013 05:25 PM

هو مش موضوع تفضيل لى انا اقصد لو مش حيفرق معاك المستعمل يبقى اركب 308 احسن من 301 ده رأيى عن تجربة بس انا معايا النسخة الهاتش باك معرفش الاستيشن تفرق قد ايه فى الثبات بس حاول تشوف موديل احدث وتكون ماشية اقل شوية هى حتكون اغلى طبعا بس الحالة حتكون افضل و بالتوفيق .

**amromdiab** · 14-11-2013 01:54 AM

المشاركة الأصلية كتبت بواسطة saddam

صديقي المواطن
الستيشن ليست بياعة كال 301 وقطع غيارها قطعا ستكون أقل والبيجو 301 أنا شايف بوادر إنتشار ليها في الجمهورية مما يدل على قرب وصول قطع غيار التجاري وقوة سرعة البيع مستقبلا أما السعر فهو ده ثوبها ومتوسط سعرها والكيلومتر عالي ولو عايز فيه وحده شبه زيرو برضو إستيشن لسه شايفها إمبارح في جمارك مطار القاهرة بس زيرو فيها حادث تافه في اﻹكصدام اﻷمامي واﻷيرباجات 2 منفجرة ولكن العربية بأمانة جديدة ولا أظن عدادها موصل 10 آلاف ممكن بكره بسرعة تروح تعاينها والمزاد يوم 24 بعد أربع أيام في نادي الجيزة شارع البحر اﻷعظم تدفع 5 آلاف تأمين دخول مزاد مشتريتش تاخدها وإنت مروح ولو إشتريت حتسيب 30% من قيمتها
أنا لو من هواة الشكل ده مكنتش سيبتها لفطة فعلا جدا خالص أوي
وبالتوفيق وإلى اﻷمام ومن نصر إلى نصر
ودمتم للنضال

الي الأخ صدام
سؤال هااااااااام جداااااااا
بعيدا عن هذه السيارة اللتي رأيتها في جمارك مطار القاهرة
عندي تساؤلات اتمني ان تجيبني عليها.
هل يوجد سيارات تباع في مزادات المطار دائما؟
اين توجد تحديدا ؟
و كيف اعرف مواعيد المزادات او مشاهدة هذه السيارات؟
هل أسعار السيارات المعروضة في الجمارك تقل عن السوق بكثير ؟

اسف لكثرة الأسئلة اخي صدام