الموضوع: دراسة بسيطة بالارقام عن الازمة المرورية في القاهرة و محاولة أيجاد حل لها

الاخوة و الاخوات الكرام / أعضاء منتدي نايل موتورز

أسعد الله يومكم بكل الخير ...

في الاونة الاخيرة أجبرتني ظروف العمل للذهاب الي منطقة شبرا لأجراء بعض الاختبارات و المعاينات بأحدي الورش هناك , المهم أنني لاحظت من خلال هذه الرحلة و قراءات كمبيوتر رحلات السيارة و المعلومات المسجلة لدي الجي بي أس المعلومة التالية :

متوسط أستهلاك البنزين و صل الي : 10.00 لتر / 100 كم
متوسط السرعة : 16 كم / س
أجمالي المسافة المقطوعة : 17 كم

ماذا يعني هذا الكلام ؟ و ما هي أهميته ؟

من خلال أستخدامي لسيارتي علي مدي أكثر من عامين حتي الان و الاستهلاك الطبيعي للبنزين هو كالتالي :
- علي الطرق السريعة (و بسرعة حتي 120 كم/س) : حوالي 7.0 لتر / 100 كم
- داخل المدن (و بسرعة متوسطة قدرها 40 كم/س ) : حوالي 8.0 لتر / 100 كم كحد أقصي
- المتوسط العام لسيارتي يتراوح مابين الرقمين 7 و 8 و في الغالب تسجل 7.8 لتر / 100 كم

أذا السير وسط القاهرة (رمسيس - شبرا - الجيزة - كوبري أكتوبر - ....) يسجل زيادة في معدلات الاستهلاك بسبب الزحام المروري و التوقفات التي أدت الي أنخفاض السرعة الي 16 كم /س


الألنترا md من السيارات الحديثة و المعروفة بأقتصادية تشغيلها و أنخفاض استهلاك البنزين بها بالاضافة الي انها ماتزال جديدة و أنا أتابع عمل الصيانات الدورية بشكل منتظم و جيد بما يعني أن حالتها ممتازة و معدلات أستهلاكها أقل مايمكن لذا وددت أن أجري تلك الدراسة البسيطة كمثال كي اقيس فرق الاستهلاك في البنزين

- الفرق في زيادة متوسط الاستهلاك الذي تم تسجيله في رحلة الذهاب : 2 لتر / 100 كم
- أجمالي المسافة المقطوعة (تقريبا) : 20 كم
- الزيادة الفعلية في الاستهلاك خلال تلك المسافة المقطوعة : 0.40 لتر
- أجمالي الزيادة في الاستهلاك في رحلتي الذهاب و العودة : 0.80 لتر

أذا يوجد 0.80 لتر يوميا زيادة في الاستهلاك بسبب الزحام , طيب لو أنا بأعمل المشوار ده كل يوم و لمدة 5 أيام في الاسبوع سيكون أجمالي الفقد في الاستهلاك هو 4.00 لتربنزين

طيب نشوف كده في كام عربية بتدخل وسط البلد أيوميا
أعتقد أن الرقم لن يقل عن 1,000,000 عربية و ذلك وفق حسابات مبدئية قمت بها بأستخدام برنامج بسيط جدا علي الاكسيل

أذا أجمالي الفقد في البنزين أسبوعيا لن يقل عن : 4,000,000 لتر

طيب ده بفرض أن كل العربيات اللي ماشية دي من نفس نوعية عربيتي يعني الحالة مثالية و لكن ...
- يجب الاخذ في الحسبان أن هناك سيارات قديمة (يعني أستهلاك أعلي و فقد اعلي)
- هناك سيارات لايتبع قائدوها تعليمات الصيانة (فيوجد فقد اكبر في البنزين)
- هناك سيارات بمحركات اكبر مما يعني زيادة نسبة الفقد في الاستهلاك
- لم يتم أدخال سيارات الاجرة و التاكسي و الميكروباص في تلك الدراسة مما يعني أن الرقم قد يكون أكبر من ذلك

اذا أجمالي الفقد في البنزين المستهلك قد يصل الي حوالي 5,000,000 لتر و هو أقل تقدير حتي الان

طيب في الشهر كام ؟
- نضرب الرقم السابق في 4 أسابيع يكون الناتج 20,000,000 لتر بنزين
طيب في السنة ؟
حوالي 240,000,000 لتر بنزين (فقد أو فرق أستهلاك)

الكلام ده بس في وسط القاهرة يعني في نطاق حوالي 20 كم , و طبعا لسه الجيزة و القليوبية و مدينة نصر و مصر الجديدة و هي المناطق ذات الكثافات المرورية العالية

بذلك يكون اجمالي الفقد في البنزين قرابة 1,000,000,000 لتر بنزين (مليار لتر) سنويا علي أقل تقدير

طيب نترجم بقي اللترات دي لجنيهات بمتوسط 1.5 جنية لكل لتر (بأعتبار ان المتوسط هو متوسط بنزين 80 , 90 , 92)
أذا التكلفة ستكون 1.5 مليار جنيه سنويا بنزين مهدر في الهواء


طيب لو ركنا العربيات دي ووفرنا المليار و نص جنيه دول بالاضافة لما سنوفره من عدم أستخدام سياراتنا أصلا بتوفير الاستهلاك الاصلي سيصل أجمالي الوفر في الاستهلاك الي قرابة ال 10 مليار جنيه بندفعها من جيوبنا في الهواء

هنا لو تم أستخدام الاموال دي في مشروعات داخل وسط المدينة لتوفير بدائل زي أيه :
- أماكن أنتظار متعددة الطوابق علي اطراف القاهرة ووسط المدينة
- مواصلات نظيفة و أمنة و بطاقة نظيفة (كهرباء - غاز - .....)

دي فكرة خطرت لي و بدأت أحسبها في رأسي و أنا في العربية لمدة ساعة و نصف علي كوبري اكتوبر في مسافة لاتزيد عن ال 6 كم

ياتري أيه رأيكوا و هل من حلول أخري أو أقتراحات لحل تلك الازمة التي تتفاقم كل يوم ؟

الأزمه بتاعة المرور ليها كذا طريقه للحل

1- إلغاء سواقين الميكروباص والتوكتوك
2- اصلاً دلوقتى فين وفين لما بتلاقى عسكرى مرور واقف فى الشارع
فمنطقة زى الطالبيه بالهرم الطريق قبلها واقف علطول علشان سواقين الميكروباص واقفين فى تلات حارات وسايبين حارة واحده بس اللى شغاله ( ده لما بتكون عربيه واحده بس اللى عطلانه بتلاقى الطريق واقف جداً)
3- أهم حل ان موضوع هندسة المرور ده علم يدرس فى كلية الهندسه المدنيه وفيه ناس بتشتغل فى التخطيط والإشارات وعمل حلول للتغلب على مشاكل المرور ولكن للأسف المهندسين بتروح تدى دورات للضباط فالضابط بياخد حصتين وينزل يطبق وهوه مش مؤهل لذلك ( مخه تخين أصلاً إلا من رحم ربى )

4- طبعا العمل على إلغاء التقاطعات عن طريق عمل كبارى ستيل ( حديد ) سريعه جداً فى التنفيذ
5- العمل على إلغاء اليوتيرنات وكذا دوله عامله الحلول ديه

الخلاصه ان احنا لو عاوزين حلول احنا مش هنتعب علشان نفكر فى حلول احنا هننقل تجارب الدول الأخرى
بس المشكله فى الإداره

من ضمن الحلول برضه ان الطريق ميتقفلش لما يكون محافظ معدى او مدير امن لانه لو حس انه بيروح فى بيته فى ساعتين هيعمل بجد علشان يحل المشاكل ديه