الموضوع: استفسار عن الشقق فى جسر السويس وقباء

المشاركة الأصلية كتبت بواسطة greenday

2- خلف حديقة بدر (المنطقة دى ماروحتهاش قبل كده بس اسمع ان كل الشباب اللى عايز يتجوز بيروح يشترى هناك سواء تمليك او ايجار قديم بسعر رخيص فياترى اى عيوب المنطقة هناك يعنى مشاكلها فى ايه بالظبط)

المنطقة دي أنا عندي بيت فيها و هيه مناسبة جدا للشباب اللي لسه متجوز أو هيتجوز و أكتر من 80% من الناس هناك زينا كده مؤهلات عالية و شباب .
الأسعار تتراوح ما بين 80 و 150 ألف لمساحة 115 متر مربع و ده على حسب التشطيب و المسافة من الشارع الرئيسي و الدور .

مشاكلها أن فيها عزبة في أول ش 20 أو وطنية و دي فيها شوية شباب كده عربجية بتوع مشاكل بس أنا عمري ما اتعاملت مع حد منهم و لا حصلي مشكلة هناك ( أنا في المنطقة من 1989 ) .

كمان لو عندك عربية ممكن تتعب شوية عشان الركنة الا لو حطيتها في جراش و فيه جراشات كتيرة هناك ....

لو احتجت حاجة من هناك بلغني و أنا ممكن أعرفك على حد من السماسرة اللي بتعامل معاهم و يمكن تكون جار جديد معانا ....................

المشاركة الأصلية كتبت بواسطة greenday

شكرا على ردك يا باشا بس هو ما فيش مشاكل عندك فى المياة والكهرباء والصرف يعنى المياة مبتقطعش كتير او الكهرباء وبالنسبة للعزبة اللى حضرتك بتقول عليها هل لازم الواحد يعدى عليها ولا فى عمارات مبنية بعيد عنها وهل المنطقة عمرانة وفيها ناس كتير ولا لا معلهش لو انى بتقل عليك شوية بالأسئلة بس لو عندك معلومات عن مدينة قباء يبقى تمام قوى لانى ناوى إن شاء الله اروح اشوف الأماكن دى كلها مع بعض

مياه , كهرباء , تلفونات , غاز كله موجود

و كمان انترنت شبكات و لاسلكي
و وصلات دش يا عم
مفيش حاجة بتقطع
عيش

العزية ما أظنش لسه ليها تأثير دلوقتي , أنا بسمع انهم بيعملوا مشاكل بس عمري ما شفت حاجة بنفسي .
و الدنيا عمرانة مش بقولك هتحتاج جراش عشان عربيتك .

قباء للأسف معرفش حاجة عنها بس لو عايز تروح المنطقة بتاعتنا تحت أمرك قولي و أنا ان شاء الله نازل مصر بكرة بالليل ممكن نتقابل السبت آخر النهار و تقابل السماسرة اللي أعرفهم هناك

متابع جداااااا

المشاركة الأصلية كتبت بواسطة greenday

4- شارع عمر بن الخطاب (اعرف انه من اشهر الشوارع هناك ومن المناطق النضيفة فهل فى شقق باسعار كويسة يعنى فى حدود 100 الى 120 الف جنيه ولو فى حد راح هناك ياريت يكلمنا عن شكل المنطقة واسعار الشقق فيها)


منتظر ردودكم

أنا ساكن فى المنطقة دى بس هيا اسمها (تقسيم عمر بن الخطاب) بس الأسعار اللى بتتكلم فيها مبقتش موجودة فى المنطقة دلوقتى الشقة 110 و لا حاجة تعملها (180-2xx) حسب الشارع و قربها من جسر السويس بس هيا ميزتها و اللى مغليها انها مش عشوائيات يعنى متقسمة و مرخصة و لو عاوز أى حاجة اسأل و ان شاء الله أفيدك

بالنسبه للنزهه 2 أو خلف حديقه بدر زى ما بيقولوا عليها.....

الشقق واسعه والاسعار رخيصه والخدمات متوفره وأتفرجت هناك على شقتين وكنت هاخد شقه هناك بالفعل لان قدامها وسع كبير جدا وبحرى وعداد الكهربا راكب وكله تمام وقسط كمان...والشقه كانت 140 متر ب 110 الف ريسبشن كبير جدا و3 غرف وحمامين ومطبخ كبير جدا.. واول بلكونه ...لكن لاحظ انها طوب أحمر وتشطيبها هيكلفك مبلغ محترم جدا...ولو معكش عربيه وبتروح متأخر المنطقه بتبقى بعد مسافه معينه مقطوعه ومليانه كلاب...وأشهر حاجه وأغلاها شارع الخمسين...والمنطقه قدامها شويه لما تبقى زى قباء مثلا.....


بالنسبه لجمال عبد الناصر..إتفرجت هناك على شقق والمنطقه عمرانه بالفعل وجميله طبعا والخدمات متوفره....لكن الميه مبتطلعش من غير موتور كشأن أغلب القاهره دلوقتى والمنطقه فعلا ترابيه بغباء زى ما صديق عزيز حذرنى والشوارع ضيقه الى حد ما ....يميزها انها معظمها ساكن مش منطقه جديده...شفت هناك شقه 160 متر تانى بلكونه تتقسم اربع غرف وحمامين ومطبخ واسع جدا جدا....بمقدم 70 والباقى على 7 سنوات بإجمالى 160 الف....لكن غير مرخص كله..يعنى عشوائيات وممكن تلاقى مشاكل فى توصيل الكهرباء ...فمتاخدش حاجه غير وراكب فيها العداد والاسانسير والواجهه متشطبه ...ده هيبقى أغلى شويتين تلاته بس هتريح دماغك...


قباء.....

أقرب منطقه لمصر الجديده والمطار وصلاح سالم....

يميزها عمرانه اسعارها رخيصه نسبيا ..المتر فى حدود الالف يزيد أو ينقص حسب الشارع والموقع والدور والتشطيب...

يعيبها ..الشوارع ضيقه مفيش مكان لركنه العربيات غير بصعوبه جدا وبالصدفه ..الجراجات قليله ...زحمه ودوشه من عند سوق القنال وكل ما تخش جوه تبقى أهدى...

الشواره مدغدغه وتحتاج للتمهيد ...مرور قطار السويس على اطراف المنطقه....

لكن فى المجمل أنا وقع إختيارى على قباء لأنها أقربها لعملى وأرقاهم فى المستوى بالنسبه لمقدرتى الماليه....

أسف للإطاله ......وتقبل تحياتى...