الموضوع: ايه الفرق في مواصفات المازدا 3 الشكل الجديد بين الخليجي والمصري؟

المشاركة الأصلية كتبت بواسطة ashouhdy

ground clearance 118 onlyyyyyyy

علي فكرة، ده و هي محملة أقصي حمولة... و هي مش محملة بتبقي 155
عادة العربيات مباتبينش الارتفاع بحمولة أو من غير و ده بيعمل لخبطة.

هي واطية شوية بس مش قوي يعني... أنا شايفها معقولة و لو إني مجربتهاش بحمولة... و عموما هي تعود و تعتمد علي نوعية الطرق اللي في المناطق اللي متعود تمشي فيها... يعني أنا مثلا كان معايا اسكورت كانت بتحك في بلاعات الشارع!!!

المشاركة الأصلية كتبت بواسطة m_eraky

ربنا يباركلوا ف العربية يا شباب
بس انا مستغرب جدا من موضوع ال 4 عجلات دا و ازاي مفيش فردة استبن
يعني لو العجلة اتخرمت الواحد يعمل اية؟؟



و ياريت يا جماعة اللي يعرف اسعار قطع الغيار الاساسية في التوكيل كام يعرفنا

هو كان فيه تقرير بأسعار قطع الغير كلها في التوكيل وخارج التوكيل و كمان مقارنات، الشباب هنا عملوه و نشرينه في المنتدي... دور كدة في الحاجة المنشورة من أربع و خمس أشهر هتلاقيه.

المشاركة الأصلية كتبت بواسطة mazda3mazda

و خد عندك كمان حبة تفاصيل ساعات مبتبقاش واضحة...

بالنسبة للهاي لاين 2011 sedan

--------------فيها:
جنوط 16 (4 فقط)
كاوتش toyo 205/55 r16
فرده احتياطي مؤقته (ميزتها بتوفر مساحة في الشنطة زي ما سمعت و عيبها بتخسر فرده كاوتش و جنط)
فتحه سقف بدرجتين
ضبط الدركسيون أعلي و أسفل و إطالة
فرامل abs, ebd, bas
خاصية اضائة الفلاشر عند الفرملة المفاجئة علي سرعة عالية (لم اجربها لأن العربية لسة بتتلين لكن شكلها مواصفة أساسية مش كماليات... وديه مفيده جدااااااا في مصر عشان الناس الغشيمه اللي مبتسيبش مسافة و بتلزق فيك و هي فراملها علي قدها)
immobilizer + جهاز إنذار (من غير shock/tilt sensor أو ultrasonic)
cd, mp3/wma
aux in في الكونسول
6 سماعات (مش bose)
اريال مدمج في الزجاج الخلفي
عدد اتنين مخرج طاقه، واحد مكان الولاعة و التاني في الكونسول
جرب نظاره علوي
طارة و فتيس جلد
bi-xenon (بدون afs)
فوانيس شبورة أمامية فقط
فرامل و أضواء خلفية led (الاشارة و الرجوع للخلف لمبات)
نور فرامل ثالث علوي
مفتاح ريموت قبل للطي (إمكانية فتح وغلق الاربع نوافذ و فتحه السقف بالريموت. و امكانية فتح الشنطة) ( انا بصراحة مش عارف ازاي اقدر اقفل الزجاج و فتحة السقف من الريموت ممكن لو سمحت تقولي اعملها ازاي ؟)
مرايات ضم
ضبط مرايات كهرباء
فتح و غلق جميع النوافذ و فتحه السقف بضغطة واحدة من كرسي السائق ( فين الزرار اللي بيعمل ده)
شاشة معلومات إضافية monochrome (يعني مينفعش تتعدل و تشغل فيديو أو كاميرا ركن خلفية زي الشاشة بتاعت الgps) لكن فيها (ساعة، مقياس حرارة، تحديد سرعة قصوى، متوسط استهلاك بنزين، استهلاك البنزين اللحظي، ضبط ميعاد الصيانة، التحكم في بعض الخصائص مثل ارتفاع صوت الاشارات، معلومات عن الراديو و الcd)
4 عتب بلاستيك
الجزء الأسفل من الاكصدام الخلفي فيبر أسود مش بلون السيارة و ده ميزة كبيرة في مصر!
مراية بضوء في كرسي السائق (مالهاش أي لازمة للرجالة طبعا!)
أضواء الصالون أمامية و خلفية و أضواء قراءة
كروز كنترول
تحكم في الراديو و الكروز كنترول و شاشة المعلومات من الطارة
2 وسائد هوائية أمامية فقط
5 أحزمة أمان... أحزمة الامان الأمامية المفروض فيها pretensioners و load limiter (مجربتش الخاصيتين دول طبعا!)
حركة كرسي السائق يدوي أمام/خلف، أعلي/أسفل، ظهر الكرسي (بدون خاصية الحركة الاضافيه لمساندة فقرات الظهر)
خمس مساند للرأس (غير معروف إذا كانت active ولا لأ)
كنبه قبله للطي (مجربتهاش الحقيقة بس غالبا موجودة - مش عارف إذا كان فيه تكاية خلفية ولا لأ)
تكيف اوتوماتيك
حساس ضوء و مطر

--------------مافيهاش:
Dcs, tcs
فوانيس afs
رادار النقطة الميتة (أكيد طبعا!)
خاصية منع فتح الأبواب بدون الريموت (خاصية إضافية في جهاز الإنذار)
فيها مسند الكونسول بيفتح فقط لكن لا يتحرك للأمام كتكايه
usb
cd changer
حساسات ركن أو كاميرا خلفية
بلوتوث
كراسي جلد أو تدفئة
كراسي كهرباء بالذاكرة (عيب كبير لو بيسوق العربية كذا واحد)
إشارات بالمرايا (و عدم وجودها ميزة في مصر!)
بخاخات فوانيس (أعتقد مش موجودة في المزدا أصلا)
مساحة خلفية (أعتقد مش موجودة في السيدان أصلا)
مفتاح بصمة أو مفتاح ذكي
مرايات تعتيم
زجاج خلفي معتم
gps
عتب المونيوم
فيها شكمان واحد فقط من غير حلية نيكل
أنوار عدادات معتمة
مفتاح غلق الوساده الهوائية للراكب الامامي
غلق أوتوماتيكي للأبواب مع السرعة أو مع نقل الفتيس
قياس ضغط الاطارات

انا آسف اني تقلت عليك بس انا لسه جايب العربية جديد و محتاج مساعدة في استكشافها

المشاركة الأصلية كتبت بواسطة aaldrene

هو الفرق اللي بين المصري والخليجي في الكروز مقابل بتدور من غير مفتاح(توتش) والكاسيت 6 cd والجنط الخامس ومراية التعتيم (الحاجات المؤثرة القوية يعني )
بيتهيالي لو مصر كانت فيها الحجات دي وشالوا الكروز كان هيبقي افضل لان مصر نادرا لما بتحتاج الكروز
:(

مفتاح البصمة هو اللي مقصر في نفسيتي قوي قوي قوي الحقيقة
و كمان حساس الركنة فعلا مش بشوف العربية اللي ورايه و أنا بركن
الجنط الخامس مش مشكلة قوي يعني... الواحد ما بيحتاجش يغيره غير كل فين و فين، و لو حصل و احتاج يغير يبقي هيحتاج يدفع فلوس بس مش أكتر، الواحد مش هيبقي خسران قوي يعني... و ال cd changer أصلا راحت عليه، الواحد دلوقتي بيبقي ماشي بالموبايل عليه كل حاجة و بالبلوتوث علي FM أو حتي الAUX... و بالنسبة للمراية برضه كانت هتبقي لطيفة بصراحة، لكن أرجع و أقول إن المشكلة في مصر إن الناس بتمشي و هي طافية النور مش انها بتبقي ماشية بالنور العالي... عموما لو حد ضايقك بالنور فوته و اديله الزينون العالي هيعرف غلطته!!! هاها
بس الكروز مهم و مريح برضه في السفر أو مثلا لو ماشي باليل علي المحور و مش عايز تجري... له استخداماته المهمة برضه.

المشاركة الأصلية كتبت بواسطة aaldrene

وعلي فكره انا جربت موضوع ان العربية تتفتح من جوه والريموت مش فيهاالانزار بيشتغل علطول .
:(

كدة زي المصري بالضبط... الخاصية التانية ديه هي إنك تدوس علي زرار الlock مرتين خلال ثلاث ثواني فيتربس الباب... و الحرامي اللي عايز يكسر الزجاج و يدخل هيضطر يقضيها شعبطة و هو داخل و خارج!

المشاركة الأصلية كتبت بواسطة aaldrene

بس العربية عاملة معاك ايه وعامل ايه مع التوكيل انا سامع عنه سمع خير :(

العربية زي الفل الحمد لله... راضي عنها جداااا
أنا امبارح الصبح كنت بنضف العربية من جوة لأول مرة و اكتشفت إن فيها عتب المونيوم أمامي مش بلاستيك... مكنتش شايفه عشان لاصق الحماية عليه.
فيه تكاية خلفية بحامل كوبايات و مثبتات مقاعد الأطفال.
طي الجزئين الخلفيين 40 أو 60 أو الاتنين معا.
اشارة تغيير الحارة و ده بقي اختراع مذهل بالنسبة لي (أنا عارف إن مفيش حارات في شوارع مصر، بس بتفيد والله... فيه ناس بتفهم لما بتشوف الاشارة و توسع)... تلمس الاشارة من غير ما تحركها للاخر فتنور ثلاث مرات و تقف من نفسها بعد ما تكون غيرت الحارة، و ده بيخليك تستسهل استعمال الاشارة طول ما إنت ماشي... هو أكيد موجود في الخليجي كمان، بس في الموديلات القديمة كان بيحتاج يتظبط في الكمبيوتر علي ما أعتقد.

التوكيل معرفش والله... هو سمعته وحشة... بس عموما أنا فيه حاجات معينة هي اللي بتدايقني في التوكيل غير الاسعار و كدة... أنا هجربه في حاجة كدة و هبقى أقول لكم... هطلب منه يظبط النور الاوتوماتيك علي الدرجة القليلة... عشان هو دلوقتي بينور بدري عن ما الواحد متعود في مصر، فساعات باضطر أطفيه يدوي... لو عرفوا يعملوها يبقي مؤشر أني مش هيبقي عندي أي مشكلة معاهم في المستقبل... لو قالوا ماينفعش أو مش عارفين إزاي أو معندناش الكمبيوتر أو طلبوا مبلغ مبالغ فيه هيبقي نهارهم مش فايت و هسيحلهم! :)

المشاركة الأصلية كتبت بواسطة ahmad_alim

مفتاح ريموت قبل للطي (إمكانية فتح وغلق الاربع نوافذ و فتحه السقف بالريموت. و امكانية فتح الشنطة) ( انا بصراحة مش عارف ازاي اقدر اقفل الزجاج و فتحة السقف من الريموت ممكن لو سمحت تقولي اعملها ازاي ؟)

للفتح دوس دوسة طويلة بدل دوسة واحدة... هتلاقي الأبواب عملت unlock و بعدها بثانيتين الزجاج كله يتفتح أوتوماتيك
و للغلق دوس دوسة طويلة بدل دوسة واحدة... هتلاقي الأبواب عملت lock و بعدها بثانيتين الزجاج كله اتقفل أوتوماتيك

المشاركة الأصلية كتبت بواسطة ahmad_alim

فتح و غلق جميع النوافذ و فتحه السقف بضغطة واحدة من كرسي السائق( فين الزرار اللي بيعمل ده)

هو أنا شكلي لخبطتك ... أنا كان قصدي إن كل زجاج من الاربعة ينفع تقفله بone touch يعني هتحتاج أربع دوسات علي كل مفتاح... تدوس علي كل مفتاح فيهم للاخر (عشان ساعات بيبقي زجاج السواق بس هو اللي ينفع معاه كدة)... و لو مش شغال عندك يبقي احتمال لما البطارية كانت مفصولة بيكون محتاج يتظبط تاني... لو ده حاصل عندك قول لي و أقول لك علي الطريقة

المشاركة الأصلية كتبت بواسطة ahmad_alim

انا آسف اني تقلت عليك بس انا لسه جايب العربية جديد و محتاج مساعدة في استكشافها

يا فندم مفيش أي مشاكل... أنا الحقيقة استفدت من المنتدي ده فبحب أساعد الناس زي ما ساعدوني.